神仙家: 7月 2010

2010年7月31日星期六

iphone4

31/7/2010

舊同學KEN話我知佢係巿中心賣左佢部16G IPHONE，$8400，嘩！好高！佢朋友係先達賣$9000添！咁厲害？有些心思思添！

上網睇左陣討論區，晚上同盈去食飯拿埋出去，再諗諗先，浩浩話$9500就賣吧。

係灣仔食野，好好味，跟住係隔離188問價，幾間打電話都係話$9000，唔多捨得，算！

諗諗下不如再問埋先達，反正過海經九龍。

因為泊車係附近，趕趕地，隨口問左3間 ( 原來先達有過百間店！真係大鄉里！ )，都$9300，都好啦，就賣左！ ( 其實如果行上樓上問，應該會好價D添，有人賣到 $9500-$9700 )

今早影的相變左遺照添！

唉，回來時又有些唔捨得！咁都賣左，其實我都唔係講到咁中意的，好似好衰！為錢乜都做得出！

回來即刻係APPLE.COM訂番2部16G，但計落又冇理由唔賣的，遲3個星期用，淨賺4千幾喎，算吧，期待新機，D人話多數有早冇遲的，希望吧！

*****************************************************

30/7/2010

晚上驗完車，番巿中心數碼通出機！YEAH！好靚！

真係好靚！好中意！多謝浩浩！

無限數據 PLAN：$398月費 + $12 行政費 + $36 X-POWER
32G機價： $5280 回贈 $ 4700，= 機價 $580
簽2年約，分24期回贈

*****************************************************
29/7/2010
話說很早很早的時候已經想出IPHONE。

早到是第一代IPHONE，幾年前，大概係07年左右，當時香港仲未有行貨，但有次朋友聚會食飯，見到朋友仔有部由美國代買的IPHONE，朋友仔示範播片後，即時愛上！

朋友仔好好，話可幫我叫朋友係美國代買多部俾我，嘩，好開心啦！日夜上網找有關資料、仲係7-11買左本乜IPHONE指南睇定先添。

但不久朋友仔話俾我知佢部壞鬼左，唔夠3個月，要去維修，佢話咁易壞，唔建議我買，所以就咁不了了之了。

之後，換左幾部電話都冇出IPHONE，因為貴啦唔抵等等，但IPHONE因為呢個朋友成為左一個情意結。

到今年年初份電話約就到期，剛好IPHONE 3GS俾各網絡商平售，於是又心思思想出，阿妹同D朋友仔都話好好，上網又快咁，又可以FACEBOOK等等，咪睇份約5月到期時有冇仲平的PLAN。

到左5月，據說會出IPHONE4喎，咁到底仲買唔買3GS呢D遲早被取代的物品呢？即管看看新品質素同價錢再決定，或者出新，舊會超平都唔定喎。同埋完左合約，月費都只係65元，仲平左，咁又唔趕喎。

呢輪一直留意新機IPHONE 4情況，雖然又話接收唔好等，但都解決到，都可接受，價錢都唔算貴，同埋舊機又冇勁減喎，咁邊有人仲出舊機架。

之前登記左數碼通，昨天收到SMS，有得預訂，上網見人POST左各網絡商的比較表。

點都唔係3出，都係數碼通穩陣，等到2pm即去登記，塞左一輪先入到，成功訂左，明天取貨！

********************************
本來諗住同浩浩一人一部，但1個id只可訂一部，之前笨又冇登記多個人名，到晚上已經訂唔到了，討論區的人講下午已經要等，晚上仲邊有貨丫，算吧，或許註定我應該等白色吧。

2010年7月30日星期五

倒數

2010年7月29日星期四

酒席改期 + 惡夢

今早發左個夢，唔知算唔算惡夢，但一定唔係開心囉。
******************************************************
話說結唔成婚，早幾日再上彩福傾左改期的事，當然附加左張借回來的證明文件。

但來年成本高、巿道好，於是要加價。
其實有幾個paln的。
PLAN A：明年8月前擺番，可用番原本菜單，唔使加錢。
PLAN B：9-12月，用新菜單，再加一，仲有min charge。
PLAN C：2012年，再加多6%

係我角度梗係越遲越好，可以擺得成的機會都大少少丫，不過PLAN C又未免太誇張，而PLAN A基本上只會重覆今年的情況，所以選左PLAN B，係貴左好多架，但如果真係結得成婚，錢已經唔係一個問題，多多都值得慶祝！

而浩浩又話有的星期六日裏，都幾中意12月31日，於是就選左2011年的最後1日除夕夜。

點計都好好，以加最少價換最多時間！

不過又有個限期，唔多唔少有些壓力；而且也叫自己做定心理準備，好有可能最後都係會好似今次咁，所以唔好放咁大期望。

其實一早諗住蝕左D訂便算，但佢俾改期咪即管改住先，搏下用得着咁解。( 鬼叫佢又唔俾轉名、買賣咩。)
*******************************************************

回程時我問浩浩，有冇覺得有些失落，尤其離原本大喜日子越來越近時，佢只係話：「冇喎，與其結得唔開心的，咁就唔好結住囉。」

我都唔識講究竟係乜心情，總之係有少少失落囉。

*******************************************************

跟住就到今早個夢了。

夢裏面，一早就到左結婚的日子，但我乜都冇準備到，兄弟姊妹到齊，但化妝師冇、頭飾冇、攝影師冇，花球等等乜都冇，心急但冇用，問自己點解咁唔小心架，冇好似搞活動咁諗清楚流程的嗎？

無辦法之下，唯有翻箱倒櫃的找晒可用的野出來頂住先，頭飾頸鏈飾物、假花花球、化妝品等等，仲隨手找左個朋友仔影相，至多醜樣D，閃晒閃光燈又黃咁囉。

浩浩話佢找左ADY來化妝，唔多想但冇法。

跟住3C的朋友仔黎晒，我話我地未結婚住喎，佢地話唔得，咁點喎，浩浩話咁註冊先囉，咁有咩分別喎，唔得的嘛！

最重要係我都冇BOOK註冊處，浩浩話咁唯有擺住一部份酒應付左呢班人先，其餘到真係結婚先再算。

點得架！但我又諗唔到辦法喎！

跟住就醒左！

唉！

一個一塌胡塗的婚禮，跟現實一樣！

*********************************************************

原本的日子取消左，變番散座

改完酒席，去食峰壽司安慰下大家！

*********************************************************

本來諗住結唔成婚，去北海道玩下開心下，有人又話放唔到假！

退而求其次，諗住去澳門，都話唔得！好唔開心！

呢個TIMER我會DEL左佢的了！

***********************************************

重新執過晒個BLOG的分類，過埋呢2日，我要好好再上路。

原本呢個BLOG係想寫下結婚的各樣事情，宜家變左家居BLOG，也算是有趣吧！

2010年7月28日星期三

想買Le Creuset 有坑紋的煎PAN

28/7/2010

早幾日同浩浩行sogo，見到佢做promote的款，Round Skillet Grill 26cm ，特價788咋！同我中意的長方形款其實一樣長，只係冇咁左闊，差 6cm囉，但平喎，又唔使等開倉排隊，有少少想買左先添。

浩浩話都應該煎到2塊排，但逼少少咁囉。

回來諗諗下，又好似方形好d，面積大些見使d喎。

    32cm oval款：                   26cm square款：                        26cm round款：
= 32 X 26                             = 26 x 26                                       = 13 x 13 x 3.14
= 832                                   = 676                                             = 530

但唔知會唔會開倉冇呢隻款賣的呢？

***********************************************************
1/7/2010
想買呢隻鐵鑊，Le Creuset ，Oval Skillet Grill 32cm，貪佢有坑紋，可以煎到D扒有格仔紋，O岩晒浩浩中意煎牛扒食。

不過好貴，平時SOGO賣折左都成 $ 1388，上網好HIT，同埋據說每年都有一至兩次開倉，平好多，上次係3月時，人地話平到 $ 9xx，所以諗住等下次先買。

其實佢有隻TRY ME的basic款，價錢都平好多，$ 538 咋！相比起佢其他款，叫平，買兩隻 try me 仲平過一隻大！

其實同我想買係一樣的，只係得20cm正方形，上次係CITY SUPER差些買了，但佢咁細，每次只可煎一塊扒，浩浩煎扒時咪要分開煎，唔可以一齊好熱咁食，又唔多開心喎，所以都係HOLD住先。

也有這些黑色的也平，$ 7xx，但買得咁貴的鑊，冇理由唔買隻靚中意的嘛！
都係疊埋心水等開倉吧。

佢開左個blog好多食譜同介紹，唔錯！
http://hk.myblog.yahoo.com/lecreuset_hk/index?l=f&id=7

產品正式網頁
http://www.lecreuset.co.uk/en-hk/

佢仲有好多好靚的產品，廚房野咁多色真係好好，只係太重，同埋鐵保養驚生鏽，瓷面又要小心花同染色，都係唔考慮其他住。

2010年7月24日星期六

TEMPUR SYMPHONY PILLOW

上年腰骨痛去睇脊醫，跟住發現頸膊其實仲嚴重，有些少移位 ( 雖然話大部份人都有少少 ) ，但呢D熟於係職業病，除左留心姿勢外，訓都好重要。

當時買左張電暖毯，痛的時候敷下真係會舒服少少的。
又買左個SINOMAX腰墊，頂住條腰坐，舒服好多。

不過好多時訓醒，條頸真係會有些好累的感覺，一早已經唔醒神，真係唔多好囉。

其實都換過唔少枕頭，普通枕、波浪枕，以前訓開幾好的再買新，都唔多得，買床褥送的DUNLOPILLO訓左一輪又唔多得。

有人話羽絨枕唔錯，未試過，但覺得羽絨好軟，承托唔知得唔得？
又有人話水枕好，一定FIT，但好難買，同放水係床始終有些擔心，又作罷。

果日行開街，的起心肝去吉之島買枕頭，先去左SINOMAX試，但好似都唔多舒服，咁橋就隔離有個未試過的牌子喎，都係幾百咁，咪又試下，咦！又OK喎，試多幾個，最後選左最舒服那個，浩浩送俾我！

訓落去真係好舒服！訓上去有種好好訓的感覺，雖然以我2分鐘即入睡的人來說，呢個感覺唔耐，但已經好好。

而第二朝起身，雖然未至於完全冇事，但至少唔係痛，始終要多運動同少對電腦才會好。

已經好好，浩浩試過都覺得好，佢唔講，但我知佢同我都有同一問題，所以今日捉左佢去SOGO，試暈都係佢最好，都係呢個款，正！

SOGO買好好，有75折，我張中銀咭仲有額外95折添。

我訓S碼，浩浩訓M碼

睇落差少少，但訓落真係有唔同的。

http://www.tempur.com.tw/page28733.aspx?THE%C2%A0SYMPHONY-PILLOW-by-Tempur%C2%AE%C2%A0%E4%B8%B9%E6%99%AE%E5%A4%A2%E5%B9%BB%E6%9E%95&_p=81&_c=72

呢款可以墊埋個膊頭。

回來換左枕袋，呵！即刻黎個飯前小睡！看來應該冇買錯。

見唔見到，舊果個即刻俾人打入冷宮！

2010年7月20日星期二

生命小思

暑假剛開始左四日，撞正浩浩三十大壽，佢又放星期六日一三日，去唔到旅行，同埋佢話生日願望係可以留係屋企！( ^. ^ " ！) ，所以只係同佢周圍去同屋企人、朋友等食飯慶祝，都好開心。

但係呢短短幾日內，發生左幾件事，令我反思左好多野，到現在仍未能好好理出一些道理，但好想講出來舒發下！

1) 朋友家人抑鬱自殺

2) 浩浩同事留言自殺，我們結果半夜駕車出去找她

3) 一個社工朋友在facebook多次話媽媽、弟弟唔明白她，沒有溝通

4) 同事丈夫突然離世，留下同事同三個仲讀緊書的仔女，第一次出席一個未見過面的人的喪禮

以上幾件事，我其實乜都幫唔到手，連安慰都無從入手，要知道人要鑽牛角尖時其實冇人幫到佢，同埋上述事情出手的人已不少，我隔左幾重的人行埋一邊吧；而最後一個則講乜都冇用，佢需要的唔係安慰，係老公番生 / 安靜。

冇野做到，但個心唔好受。

生命到底係乜，點解有人可以咁輕視，有人卻想要多留一刻也不可以，有人見住家人可以打從心底地怨這怨那，你們可知有人想再聽多親人講多一句都冇機會。

我沒參加浩浩積極參與的水草力量社工活動，他們很奇怪，我想我終於清楚明白了原因。
對於一些我根本不理解不認同行事方式的人；即使我知佢地控制唔到自己、未夠成熟去了解很多事、確實需要一些人係身邊提供協助去成長；但我果刻第一時間，只係想鬧佢地，甚至刮佢兩巴刮醒佢地！
唔該看看周圍，比你慘比你更有需要的人，他們都沒有放棄過自己同身邊的人，佢地好努力為生命而努力，但不可得，你們得到卻不懂珍惜的人，有什麼資格去怨天尤人、傷害自己傷害家人？！
別人對你不好，全世界冇人對你好，又如何？你還有很多！你看不到而已。
一個沒有耐性的人，輔導不了人也別害人，鬧他們講道理大概只會令人更討厭更反叛罷。

看著這些事情，的確很累人。

從來我都只是想多看兩眼貓貓，摸摸牠們，跟我喜歡的人多一起一些，做我喜歡的事、想做的事，太多太多的人事物過去了不可追，但把握現在是我可以做的，我會盡力去做，只係唔想他日後悔。

我可以做的還有為他們禱告，在這些人不可改變，又無能為力的事上，更顯得人的軟弱，大概只有天父有能力去改變，願主看顧他們，讓他們找到人生的意義。

我諗的未必完全，也很偏頗，但只想發洩一下罷了。

2010年7月10日星期六

風扇

11/7/2010

謝謝李姑娘，佢當入伙禮物送左俾我地，昨天去佢家玩拿了張單，今日取貨！

好涼好舒服，正！

放係喇叭隔離剛剛好！風力強勁，最高係60W，非常好。

指示清晰，易用，個搖控好小巧！

襯埋一齊，有保護色唔多覺！

有冇發現個櫃有D咩唔同左呢？遲些再詳談！

交收儀式！

****************************************************************
1/7/2010
天氣熱，成日開冷氣，但其實我唔多中意吹冷氣，尤其冷氣的風直吹來個人會好凍同唔舒服。
有時開露台同窗的天然風會舒服d，不過始終夏天未必有風入屋，所以決定買把風扇。

其實家中早有把小鴻運扇，好多時去到邊拿到邊，但係廳時唔夠涼。
呢把好似係百佳買，$99，同我以前的暖風機同價，也一樣咁耐用。不過真係唔知乜牌子。

以前仲有把直立式的，好似係hitachi，但壞左掉左。

去左百老匯、吉之島、國美電器同最好電器睇完一輪，專攻直立式型號，貪佢靚仔。

一條咁，又可以放喇叭旁，嘻，有人嘈我打佢喇叭主意.....

不過全部有出的牌子都唔係熟悉的大牌子，最似樣已經係Rowenta、Turbo同Origo，不過我諗應該都ok的吧。

經親身試驗後，發現最涼同最多功能都係

1) origo 環保涼夏扇 FTF44LED

最好電器，$578，阿姐話可以俾多95折我，$549.1。

25"C 或以下自動關閉保持環境舒適

LED 室溫顯示

底/中/高風速; Power: 60W

模式 : 常風 , 自然風與睡眠

0.5 - 8 小時時器制

旋轉搖擺 : 70 度

負離子空氣淨化

全功能遙控器

夜光 : 44吋高

2) TURBO 唔知乜型號
係吉之島同見到，外型size同上面果部好似，但白色，不過貴些，$738。
差唔多又冇理由買呢部姐，況且浩浩中意黑色，襯佢個喇叭，又耐污糟，上面部灰色近榜D。

3) TURBO Slim 負離子遙控直立風扇 Stand Fan TTF44R

回來上網係教協見到呢部添，冇溫度計、LED大顯示同25度自動關機功能，細WATT數D，應該冇咁涼，但再平些，$503。

．備有電子LED顯示

．3風速選擇(大、中、小)

．多種送風模式：
自然/睡眠/正常風

．90度擺頭

．備獨立負離子及易拆式過濾網空氣淨化功能，加強去除空氣的雜質及塵埃

．
特設機內夜光燈

．7小時時間掣

．整體體積:Ｗ30 x D30 x H110cm

心大心細，點好呢？

行過千色店，又見另一部好似仲好的，可以拆隔塵網出來洗，不過好很大部！

4) IMARFLEX 伊瑪牌溫度感應遙控直立扇 IFZ-45EBR

溫度感應遙控直立扇

- 3段風速及8小時時間掣
-
溫度感應自動控制功能
- 易拆式過濾網設計
- 3種風類選擇 : 正常/睡眠及自然風
- 左右搖擺功能
-
負離子發放功能
-附遙控器及藍光功能顯示屏