神仙家: 2011

2011年12月24日星期六

貓貓一齊訓

貓貓是最識嘆的動物！
有圖為證！睇下！佢地最叻係找東西墊住佢地專貴的身軀！
最就手係各式袋，最正係羽絨褸！訓左上去便唔願走！

素素熱情，中意痴人；不過清清就比較慢熱。
天氣冷，素素成日借d意走埋去清清附近取暖，通常清清都會走開。

呢晚，素素見清清訓件羽絨咁舒服，又借故唔覺唔覺咁走左埋去。

清清竟然冇走開！一齊咁貼住訓左一陣！大突破呢！

不過呢個現象只係出現左十分鐘左右！

都係分開訓自在些！哈！
始終唔係一齊長大的貓，能融洽地在附近坦然訓覺，姐姐便覺很安慰的了。

2011年12月23日星期五

聖誕佈置

第二步露台計劃就係聖誕佈置！
LA~LA~~
IMG_8764_1

上年果串白色，我總是不太滿意，覺得氣氛唔夠！同埋係一條過串連的。
於是今年見生果日報介紹，出鴨寮街搜購，果然平靚正！
係好多條垂下的瀑布燈，仲有專門FOR戶外用的防水款！仲可以要幾長駁幾長！當然我呢D小露台，一條已經夠晒，$198，彩色閃，佢有多種唔同色系選擇。

嘻~~俾D光圍住好浪漫，不過唔記得執野就影相，好亂！

我都有聖誕樹架！

不過迷你聖誕樹長大了，都大左一倍有多，過多幾年唔知會唔會變成大聖誕樹呢！？

但佢唔可以放入屋，因為有貓貓！
以前試過有兩年買聖誕樹回家放，結果....咪每天放工回來執聖誕樹飾物囉！有幾次仲成棵聖誕樹執番起身添！所以放棄左了。

MERRY CHRISTMAS！

黎緊有幾個聖誕PARTY！好期待呢！

等著你回來！KM020

恨左很久，格左很久價，但最後沒有以最抵的方式買，心總是戚戚然的，算吧！鬼叫自己買得太多，付錢的又唔係我，可以分期也是好的吧。

廢話別多說，blog實在出得太慢，很多想post都未輪得到！假都唔知放左去邊，hea得太厲害吧。

大半個月前，最後去左tst showroom 豐澤買左！但冇貨，等著你回來！

仲買左呢兩個配件。送左rachel本書，好好彩地呢本未有！

睇番購買當日實況！
同浩浩專登出去tst睇，佢話好似帶小朋友去買玩具喎！都係的！都係神仙的玩具，但神仙一早係阿婆，唔小囉，講出黎笑大人個口，同埋都係整好野俾你食姐！

原來showroom係豐澤3樓，上到去得kenwood呢個同delonghi 咖啡機counter，得一個SALES，但咁橋上緊堂，唔多得閒彩我地，我地自己周圍睇左陣，(其實冇咩睇)，個姐姐叫我地唔趕的話可以一齊聽，就咁上左半堂，講個壓麵器同切麵器，試食左少少麵。

我地其實有左目標，問左些問題後已經CONFIRM的了。

唉！唔買最抵的，唯有以其他優惠補番！
1) 分期
2) 信用咭送COUPON，幫補下好過冇啦！( 因為想買個配件，差少少可以有多2百回贈，咁即幾十多一個配件，所以買左兩個配件。)

果度主要有4款機
1) KM010，示範都係呢部，同020最大分別係少左100W同埋個盤的容量係4.6同6.7的分別而已，其實都OK架，不過心已有所屬

2) 呢部就係020，其實同010真係好似，高少少而已。不過放埋左一邊，因為冇貨！

3) 仲有呢部勁野，最勁之處係可以加熱煮埋野，時間掣預較咁，姐姐示範煮麵一部搞掂晒！廚房冇爐都得。但貴020成萬！

4) 仲有部K-MIX，有少少似KITCHEN AID果部咁，有好多色。

( 其實我見外國除左呢幾個MODEL仲有好多個MODEL，如KM030, 021等等，但詳細FUNCTION有乜大唔同則冇研究，大概係TIMER、速度等。不過算啦，既然選左保養同分期，唔好再想了！多BLOG友仔用可以問下交流下都好的！ )

其實一早知020冇貨，010則有4部現貨，唉！姐姐話約一個月左右，希望係真的啦！新年前有可以方便地整糕。希望SHOWROOM真係最快有貨吧，不過其實番得貨一定一大批，算吧。

010同020的分别。

配件有好多，好用的話可以取代家中好多部機仔，一部搞掂晒。不過遲些先再算。

右邊呢個就係我想買的 food processor，可以攪碎、切片、切絲咁，我上rachel堂見佢用黎打湯都得。

左邊呢個係姐姐勁推介的 muti-mill，打糖粉、花旗蔘、蒜蓉、薑蓉咁喎，浩浩可以打芝士餅底碎。

姐姐話把刀特別貼邊，可以磨到好幼細喎，仲連4隻玻璃杯連蓋。

其他配件：壓麵器同切唔同粗幼的切麵器

仲有呢D唔同的攪碎器

主機唔知幾時有，配件拿來除左影相應該冇用住囉。

後來係永安見到呢張介紹，配件型號同作用用處好清晰！

接邊處都有埋，其實姐有講過果幾個唔同的轉頭有唔同速度咁添架，但我唔記得左，上網查唔番，有冇人知呢？

我最想係換埋部攪拌機，但浩浩話唔好心急，收左機，好用先再一步步來，都O岩的。
( 聽聞係外國買會有配件送添！唉！)

姐姐仲講隨時可去問佢點用配件咁添！希望係真的啦！我驚自己會記唔晒囉。

最近我地仲整左雲吞，希望呢次係我地最後一次用手切菜同肉吧。
好想快些收機！

露台番新

放假咁耐雖然好懶，冇乜做過d乜，但其實都有做野的，慢囉。

其中最大project就係呢個一年一次的露台番新工程。

首先要大清潔，露台木其實我次次洗地都會抹埋，腳踏的表面都ok乾淨，但個底則真係幾個月先可以拿起d露台木大清潔一下，不竟戶外地方，塵多。

工具整備，天氣乾燥晴朗！萬事俱備，開工！

呢d保養真係唔少得，之前同之後差別好大！

一個鐘左右油好全地兩塊，風乾2小時。

另把握時間油埋呢張長椅，番來兩年都未油過，最近見開始啞色，順手番新埋。

仲有桌子，其實可以索勝換過塊板，但又未爛，用多輪先再算吧。

連埋花盆一次油晒風乾

搞掂第一步，明天就開工第二步！

2011年12月16日星期五

LE CREUSET CASSIS 14 CM ROUND

上個月係爆炸兔BLO得知佢係台灣竟然見到CASSIS 有14cm 小煲！

雖然14唔係我心水，但cassis係喎，咁細個也很可愛！即刻想借d意飛去台灣！:p

但想歸想，飛一轉要就的事太多了，最後想到搭做領隊的朋友仔代購！哈！
( 題外話：實不相瞞，我都有領隊牌架！ )

等了又等，終於出台灣團，又去台北，回歸之日幾想去接機，但就唔到時間，再約食飯仲難，最後朋友仔好好，知我心急放係office讓我拿左先！仲有聖誕禮物跟埋！唔該晒！謝謝你呢！讓我買到心頭好！下次食飯一定係我的！

就係咁，呢個咁可愛的小煲就來左我家了！
IMG_8528_1

仲未諗到佢黎做乜好，淨係諗到用佢蒸蛋咋。
中煲糖水都應用OK的( 因為燉湯應該唔夠2個人飲，平時18放完料加埋水都係僅僅好夠 )，但燉乜好呢？
大家有冇好提議呢？

拒離我的浪漫三色 ( CASSIS, LILAC MIST 同ANTIQUE ROSE )目標越來越近了，ANTIQUE ROSE其實睇中左，但日本代購實在太貴，仲未捨得出手，再等等時機吧，係我的話總會係我的。

重温與朋友仔同買的合照吧，其實FEON的SATIN BLUE我都超中意，不過未見過真身就唔好諗太多了，等有日我再自己去台灣先諗吧，終於托人買咁重的野好唔好意思。

至於點解14 CASSIS同已有的22 LILAC MIST點解未合照，哈哈！因為我將22同朋友仔的交換左，準備聖誕節的特備節目，哈哈！好期待呢！

2011年12月11日星期日

企鵝仔capsula特價！

上星期五，去百佳見到呢個優惠，買2送1，好抵！

未飲晒，但掃定先都好！任何款都得架！
我都係買至愛！朱古力加mocha！

應該係星期五六日有promotor在場的百佳先有呢個優惠，朋友仔問過應該會做到1月頭。
要入貨的話趁手了！

2011年12月10日星期六

聖誕Le creuset

早前去左轉LC FLAGSHIP SHOP，只係買左個火鍋仔，可睇番呢度。
WHATSAPP朋友們，大家都好中意個布甸仔，但第二日再去諗住幫大家買但已經冇貨了！勁快勁受歡迎！
哥哥仔話係SAMPLE，得約十零個，真係好好彩先買到。於是計劃下星期再去過。

點知星期五同浩浩去大喜屋食飯經過，又去看一看，已經番左貨，於是掃左堆野，買左4個先！$138@真係好抵！不過好鬼重！好彩浩浩係度！