龍穿鳳翼 + 椰子煲雞 + 蒸蒼魚

秋風起，好想煮多些飯！少些出外食，健康些！

星期日放假，去買餸自己煮左餐，唔太難，但食得好開心！

要努力先得！

有朋友仔係煮食新手，覺得煮飯煲湯好似好複雜好難，不如我又分享下少少心得，煮食高手唔好見笑，當然歡迎俾意見，令我改進得益！

今晚菜單係「龍穿鳳翼 + 椰子煲雞 + 蒸蒼魚」

*****************************************************************
首先講煲湯，其實最易，洗淨、放材料同水，煲夠鐘熄火便OK。
但中間都有少少技巧可令佢更好的，有人會SKIP，但最好做埋。
1) 汆(音"飛")水
以前媽媽教煲滾水，把生肉放入去烚一會，令其排出血污、腥味咁，湯/燉品/炆的菜會美味。
但其實正確應該是凍水落肉，因為滾水落肉，一放入表面已熟，都會洗淨表面污物，但血水沒有在凍水中咁暢順排走。
我也擔心過到水滾時會否把肉都煮熟，但中央國家級的大廚話唔會，肉味咁易流失就唔使咁多個鐘頭煲湯了。 (又係喎)

約3分鐘左右至水滾

好明顯見到水面有層污濁的啡色東西，就係要弄走呢些
(其實應該用再大些的煲/鑊，多些水令污物更易浮出)

放入凍水沖走表面污物，也冷凍肉類。

將雞、鴨、海鮮、鵪鶉等內臟作最後清除

椰子可以叫舖頭代削成片，較易出味；和留椰水同煲，清熱好味！(有時我會就咁飲左的 :P)

雞我會請舖頭代開四件，肉則自己切細，易出味。
雞檔可代去皮的，較健康！
但家人覺得煲出來冇咁有雞味，所以我寧願煲好先隔油。

加水煲，因LC煲較存氣，走水唔多，其餘煲預番多一兩碗咁。

煲約2.5-3小時，用殼去走湯面油便成！

*****************************************************************
第二樣係去骨雞翼龍穿鳳翼，果日係GENIE個BLOG度見到(呢度)，我未整過，跟佢食譜改少少咁，超好味！其實BLOG係好好的煮食靈感來源！
最煩係拆骨！用左我半粒鐘有多，但啖啖肉食雞翼的感覺真的好好！值得的。

GENIE好好，附埋何師奶的VIDEO，跟住做唔難，我全程只用剪刀便搞掂。唔難只係煩。
雞翼去骨留皮同肉後，用糖、鹽、豉油等略醃，在入面釀入菇同紅蘿蔔絲等硬身蔬菜，等隻雞翼成番形靚些，放入焗爐200度焗30分鐘至熟，中途反下等兩邊熟透。

*****************************************************************

最後一樣係蒸蒼魚
買魚時魚檔多已稍為處理過入面的內臟，回來用水清洗，再去乾淨便好。
(蒼魚冇鱗最方便，如有鱗魚可洗去未清好的鱗片)

魚兩邊中間斜割幾刀，可令魚快熟透
碟同魚中間用蔥段、薑絲墊起，可讓魚底也有蒸氣去到，唔會底唔熟

面放蒜蓉豆豉和油，滾水落蒸8-10分鐘至魚眼變白便熟，加蒸魚豉油，食得。

*****************************************************************
有隻貓係人地煮飯時反晒肚咁攤係地，唔知佢想點！