睇樓──海典軒(1)

話說住屯門咁耐，一直都冇諗買呢個屋苑。

當年佢開賣的時候係沙士左右，係巿中心有示範單位，做左成年都賣唔晒，仲大話自己近西鐵、有海景等，身為屯門人的我地唔使睇都知吹水啦！

講海景，佢又唔係近海，碼頭那些正佢多多聲；西鐵，乘車都要10分鐘啦，方便又唔夠巿中心那邊；環保露台，又計呎數，景觀冇乜要來做乜？
示範單位都係一般而已姐。

但當幾年下來，我地久唔久去看樓，主力都係睇碼頭樓，也有看屯門所謂樓王卓爾居咁，但都冇乜心水，不竟碼頭都舊舊地，最新的啓豐都17年樓，再唔係間隔唔好，靚景的慧豐又偏僻左些，最方便的啟豐的最大的單位唔夠600呎，最中意反而係最舊的美樂，實用率9成半，超高，但佢係宿舍，冇理由自己拿錢去買咁笨唔抽的嘛，於是一直都冇睇o岩。

到最近諗住去睇下屋企附近的海典軒，貪佢新又有露台，睇下佢點唔實用都好丫。

點知上到去，又好中意喎，間隔四四方方，最唔實用的露台同窗台我反而好中意喎，露台可以曬衫、大窗可以睇多D景，計落實用率都有8成，OK丫。

******************************************************

31/5/2009

第一次去海典軒睇實樓

跟美聯去睇，但其實盤都唔多，得5個。

1) 2座3C，649呎，矮囉，雖則佢有商場做基層，但望樓有景可言。

2) 2座7H，599呎，最細的單位，租盤，好細咁，但平，165左右。

3) 2座29B，冇約之下係電梯撞到個阿伯，封左盤成個月唔賣的了，個經紀口才超得，講講下，個阿伯又見我地四四正正吧，俾我地去看下，都係649呎，2房2廳，露台同2房都望黃金海岸全海，勁靚!!!但佢唔憂賣，215都唔賣，哈，勁！

4) 1座33G，617呎，望屯門泳池同遠山景，好開揚又光猛，但去到人地剛好簽緊約了，188賣左，可惜，無緣。

5) 最後一個，1座1G，特色單位，1樓連617呎連百幾尺的平台，平台可以放組合屋/bbq/玻璃屋咁，仲打通埋2間房，好合浩浩心水，又平，160左右，仲有叫下咁。可是始終1樓，雖然佢有商場加高了，望出去都有普通6-7樓左右高，但感覺唔夠高層好，同埋暫時新，個平台好正，但過多幾年舊的話，可能會滴水/生锈、蛇蟲鼠蟻等等，清潔都係煩。

經此實地睇樓，發現我們都係中意高層同開揚的單位，低層點都係望樓，雖然唔係好近，但免得都係免吧。

但都鎖定左海典軒，浩浩話近我屋企，聽左都開心！

冇諗過佢咁為我著想，屋企人對我來說好重要的，佢咁做即當佢地係自己家人，好感動呢！

睇酒席場地

呢個月上網睇左好多的婚宴場地討論

跟住列左張心水名單，找左幾天得閒又順路的時候去睇場。

首選本來係荃灣間美心的，個場靚，盧子上次飲都好食。但拿了菜單回去看，加左好多，覺得唔值呢個價，再看看。

4月30日問阿詩借露營用具，順便去九龍灣mega box行街，又睇下。

1) 百樂門 

peggy擺的地方，好靚好中意，新娘房又大喎，但成個場太大了，40圍去邊處找喎。

2) 御苑皇宴 

謝慧珊會擺的地方，真係好靚，四四方方好優雅，又有鋼琴，似酒店多過酒樓，但minium charge太高，成16萬，我們都冇咁多圍，咁平均每圍咪好貴囉。另一邊平d，12萬，但個格局差好遠。佢其實有平日優惠的，最低有成75折，咁都可考慮的。

好似仲有幾間的，但都係印象不深，看看便走。

其實東九龍仲有間什麼德藝會同鴻星好似都唔錯的，但唔經喎，冇去到。

 

5月4日浩浩接我放工，呵呵，去左銅鑼灣利舞台，有幾間，一次睇晒啦。

1) 22/f 麒麟閣

2) 20/f 玉桃軒

3) 18/f 利寶閣

基本上1,2,3三間間格一樣，都有一邊玻璃大窗，但中間有柱，太大又擺唔晒，都唔會考慮。但佢地門外有一條好細的旋轉樓梯，浩浩話冇特別喎。

4) 5/f 彩福皇宴

用2部獨立電梯上去的，外面一般，但電梯入面好光猛，出電梯行入去時真係嘩左一聲，因為條樓梯真係好高好靚，雖然個場有柱又有些美中不足，但都真係好吸引，於是等左陣都等個經理來講下d package咁，可考慮。

5) 仲有間百樂門的，但去到商場樓下，浩浩已經嫌佢舊唔入了。

 

 

5月24日番完教會，浩浩放工又冇野做，於是又去左尖沙咀睇場。

1) 佐敦欣宴

彩福集團之一，舊大華戲院、D場348的地點，門口真係窄窄地，下雨時大堂細到應該8個人便會逼出街的，單行扶手電梯上2層，分2邊廳，1邊中式1邊西式，四四方方好多水晶燈，感覺好grand，睇埋新娘房便走，都可考慮。

走時問如果要落去咁點 (因為扶手電梯單向上來) ，佢話要用電梯，但散席時扶手電梯會全部轉做向下，吓，咁又有少少唔方便咁喎，同埋離開時用的電梯好焗束咁，唔知係咪凝住，好似以前d場的感覺。

2) 尖沙咀莊士敦彩福

地下商場同大堂好靚好企理，上到去反而覺得有少少暗，或許因為天花太多波波等布，中途想去洗手間覺得地毯好殘，閣樓麻雀房同新娘房好矮，感覺唔太好。同埋個飛天車真實睇真係麻麻，加上sharon分享佢實際飲時的感覺都係算罷。神仙頂多接受飛入來，而唔係坐飛車囉。

3) 尖東堪富士利道格蘭鴻星

上網其中一間鴻星係四四方方冇柱的，浩浩話鴻星應該好食，但得一架電梯上，仲要好慢，我們已經覺得唔得，再加上上到去人地擺緊酒唔俾入去睇，個小姐又講個場有乜唔好咁，咩包唔到場架，你進場會經過d街客之類，看來都唔使諗的了，5分鐘唔夠走左。

4) 尖東百樂門

其實係找御苑皇宴時去錯左的，但又唔錯喎，都靚，價錢同配套都唔錯，姐姐又有心，有九龍灣的feel，佢做緊舞會，擺左套鼓同音響出來，浩浩對眼簡直係發光，仲問埋價添，唔係想係結婚的時候玩嘛？！不過我唔太中意佢位處的商場有些舊，同埋太大，分左兩個主場外仲有其他散客一齊囉。

5) 尖東御苑皇宴

係好彩上面，分左2個場，一個有維港景但超長超大，應該擺唔到，另一個四四方方d，但看看有些舊同殘，佢話黎緊會裝修，雖然d擺設同九龍灣一樣，但感覺舊好多，同埋最重要係佢話任飲點加都冇可口可樂，得百事，因為簽左約云云，咁我地自己帶可樂上去呢？佢話都唔得，浩浩呢d可口可樂超級fans接受唔到，唔會考慮佢喎！

食完個元氣之後，再去睇埋最後一間

6) 海逸酒店景逸軒

上次浩浩爸爸的事時去飲過茶，覺得幾好，d人話價錢都ok，於是又即管去看看。

個場唔錯，光猛四方，周圍區域也闊落，最重要係正門係海逸酒店的長樓梯，勁靚！價錢都少少貴，但如果唔選日子都ok，但佢話佢同酒店的合約只係去到3月，之後多數簽但firm唔到住，咁點book呀，未firm酒席便乜都做唔到的喎。

 

其實我之前行街仲睇過陳明富擺的翠享村，但都係唔多喜歡；CHRISITNE擺的北京道1號帝廷呢兩年的評語已差左好多，所以皇上皇集團都唔考慮；仲有煌府咁，但有些上網睇相已經覺得太多金色好俗，白色的好D但冇乜特別也沒有去看。

 

睇過咁多間後，心中都有個概念現時的酒席情況，但原來開幾多席好重要，回去要先計計數才可諗邊間呢！

露營@塔門

話說用新年利是錢買左個營、睡袋同地蓆，搞掂左訓先，免得有人抱怨訓得唔好而唔同我去。

咁橋水草中心添置了新露營用具，借左煮食用具、爐具、背囊等，趁五一勞動假期就出發，今次目標係塔門，有警崗、洗手間、水源、大草地、士多，據說景色超靚，露營初哥精選推介。

我們係沙田連城乘的士去馬料水碼頭，轉翠華小輪去塔門碼頭，落船係士多食左個海膽多士先，超正！

然後行上島中間半山上的一個大草原，靚到爆！
好大風，我地選個位睇景好，冇遮冇擋就紥營。

第一次真係自己紥 ( 雖然係屋企開過試左一次，但冇落釘 )，又大風，搞到雞手鴨腳咁，有人仲差D發脾氣。最後隔離個營友叫個妹妹拿塊大石俾我地鋤釘，先搞掂間屋，set好d野。

(紅色呢個就係我地個營，係咪好靚仔？不過有冇發現有乜唔妥？一陣開估...)

周圍行左睇下風景，視察下環境，順便拿水袋取水，回來用PSP睇左套海角七號，呵，聽住真的海浪聲黎睇，超有MOOD呢！

 

睇完天開始黑，我地就開始煮晚餐。

好大風，我地冇風擋，唯有躲去涼亭椅旁去煮。

是日晚餐：

蕃茄椰菜 拌 加拿大牛小扒，估唔到好好味！

仲有靜雞雞帶去的兩支小紅酒添，嘻。

 

洗完碗，回去睇左陣星星先訓，呢度好黑沒有光害，香港好少見。

 

睇左陣便訓覺，不過訓得唔多好，哈，其實天氣好、涼涼地OK好訓，我地都訓得著，只係成晚好似玩滑梯咁，哈！唔明可以睇番之前張相，見唔見個草地係斜的，我地之前冇為意，但因為地心吸力，我地成個人好似訓滑梯咁，不停緩慢地向下移動，移上D訓著放鬆左又滑下去，哈，其實幾搞笑，我們事後都說從沒咁深刻感受過呢個大自然的定律呢！

 

 

較好鬧鐘，5點幾起身睇日出，郊外的清晨好凍，拿果兩個羽絨睡袋變成被蓋住等日出，嘻。真係咁大個女未試過睇星又睇日出的，仲要同中意的人一起，真係開心都爆！呢次露營超滿足！

 

跟住又開爐煮早餐，早上冇晚上咁大風，用個營遮下便得，當然都係由大廚負責啦。

A餐： 太陽蛋 + 腸仔 x2 + 蕃茄公仔麵

B餐： 太陽蛋 + 腸仔 + 麥片

食飽攤抖多一陣，曬下太陽，抹乾淨D用具，曬番乾佢，收拾離開！

回程仲食多個海膽多士，同出名的無冰凍奶茶添，真係幾滑，正！

 

再見塔門，相信呢度應該有下次，因為實在太好了！