妹妹嫁妝

妹妺將會結婚，神仙家第一次辦喜事，個個都摸摸下，我恃著做得姊妹伴娘多，都叫有些經驗，幫著自家妹子張羅下咁。

之前勁搭人情牌找來一套LC 心心杯，學剛做左媽媽的Sharon咁作敬茶用，希望妹妹都好似佢咁快快有喜。
感謝HAPPY 同 ONEONETAMA 割愛，我先找到佢地！另也唔該JULIA同CLARA去親開倉都幫我留意，呢SET野唔只係一對杯，仲有好多友情係入面！多謝晒！

為左方便敬茶流程順暢，借多對回來俾佢替換，但要還架。

仲有進場儀式晚宴音樂，搞搞下覺得結婚真係好大PROJECT！好多濕碎野煩。
童話、高雅、經典，乜都齊喇。HMV真係好方便。

屋企仲有盧永享婚禮詩歌集，應該夠了吧。

另外一心諗住送對龍鳳鐲俾佢的，金保值丫嘛。爸媽一對，我們一對，都幾好咁。
但有朋友建議不如鑽石，至少會戴得番，都好，咪問佢自己想要乜。
結果呢位小姐，同神仙一樣，唔中意係已有選擇入面選的，佢話想要隻錶！
仲好有理由咁，( 果然係一樣架！想買野一定諗好理由SUPPORT！) 話金會唔捨得賣，但唔賣放係度又浪費，咁不如買樣可以成日用又唔會壞的野！哈！係咪好好解釋呀！

其實係佢中意就得，係我角度，無所謂，送俾佢就係佢的，大過女自己做下選擇都好。
於是同浩浩找日走入專門店睇，上網睇左些資料，好似學一門新科目咁，最後選左佢。

鋼帶、銀錶面、羅馬數字
BOY-SIZED 女裝 DATEJUST 31mm
簡簡單單大方款，後生女，耐看，唔會咁易OUT

成套說明書、保用證、盒咁，妹仔大過主人婆！

原來好似鑽石咁，有獨一無二的號碼，出世紙
我仲好笨咁問人係邊處做，哥哥笑笑話梗係瑞士，咁網上見話乜德國造等即係假野？！
算，無心研究，呢隻唔係假就得。

其實我唔信佢會日日戴，同戴好耐，不過佢年年加幾次價，斷估唔爛都少少保值的。
成日睇電視無錢就去當左隻勞咁，好搞笑。
又有幾個朋友聽到我講，都話寧願收勞都唔想收龍鳳鐲，都唔知邊個傻！

呢個哥哥仔好好，知道係送人結婚用，俾左隻靚NUMBER的我喎，唔知真定假，不過聽下都開心。結婚好意頭！總是好事！

不過爸爸唔讚成喎，話戴咁貴的野會俾人搶喎，哈哈，( 宜家通街自由行，呢隻係佢最CHEAP果些款，SHOW出來都可能俾人笑添 ) 佢叫我買其他牌子喎，我梗係冇聽話啦，總之妹妹中意咪得囉！見到佢睇相都咁開心，我都開心！

附加幾張睇錶花絮

第一次睇，已經鎖定簡單款，三個size，26mm、31mm、36mm

妹妹同我手差不多，上手其實越大越好，哈！

不過原來36mm錶面濶過我手腕，拆晒扣都仲鬆，戴唔到！:(

31mm係fit的

哥哥改埋，如果唔啱，好似眼鏡咁，唔使單，是但入間有賣佢錶的店都會幫佢改，好！

扮廣告錶女郎試錶，不過昨天病得很，素顏無謂嚇人，加些效果唔好睇真樣了。

不過美中不足係家姐買唔起一對囉，否則應該仲得體仲高興！
但龍鳳鐲原本都只係俾妹妹做嫁妝，妹夫冇份的，哈！呢D野爸媽有準備的了，唔使我。

阿妹，要幸幸福福呢！



仲想買多隻心心煲俾佢學煮飯！
但KA賣晒，佢又唔中意紅色，唯有等SOGO THANKFUL WEEK買新粉紅色，希望到時都買到啦！

我第一個手作 RING PILLOW

不嬲喜歡手作仔，但呢D野真的要時間，可惜呢樣野對心多多的我來說真的不夠，所以作品不多。

但之前朋友同事教會朋友結婚，久唔久都會幫下手，作品都見得下人架，不過多數只花多，即簽名公仔/花花筆、襟花、走廊 / 桌上擺設咁。

今次妹妹結婚，挑戰高難度，RING PILLOW。

我未結婚，未有結婚戒指，出動隻求婚戒指頂當做道具影下相先。:P

我自己都好中意，叫佢用完留俾我先！

伴娘做幾次，但未係教堂做過，所以從來都冇留心過戒指係點扣入去絲帶度的，原來係咁。

不過其實都唔太難，只是工夫多，全部心思野！

其實今次我冇上網自己學，我去左間WORKSHOP跟老師上堂做。
聽住音樂，同一班有心人一齊做手工，感覺好RELAX，都幾開心。
隔離仲有對準備結婚的COUPLE一齊整，SWEET爆！
有好多款布同喱士選，選完有人幫手裁布，然後自己畫稿，先釘實塊喱士同面布。

跟住把兩塊布釘在一起，留子口位入綿花，講好易，但兩個步驟用左我粒幾鐘！CRAZY！
超細針步！密些靚些！只但係一路縫一路諗點解唔用衣車？！屋企有，好想番去做囉！

反轉塞綿花後，似樣了。

收口，釘蝴蝶結，完成！

只是唔多滿意，MISS 其實仲有教用珠珠縫邊，但唔夠時間做，拿珠仔回去加工。
同埋絲帶的色唔襯，家中大把呢D野，回去自己慢慢修改。
遲左差不多兩個鐘放學，浩浩等到傻。

昨晚改好，係咪靚好多？

我覺得如果自己出去買布配襯，可能仲靚，不過花的時間金錢應該仲多，所以呢個價搞掂晒都幾方便化算！

photo from their facebook

Teapot Art & Craft Workshop
有興趣可去佢地FACEBOOK睇下
https://www.facebook.com/TeapotArtCraftWorkshop

仲有好多可愛公仔、小朋友藝術課程咁

或者飛媽個BLOG都有介紹
http://blog.yahoo.com/clokjeran/category/Teapot+Workshop

酒席新合約

好討厭！因為約左彩福冇得去澳門玩！

索勝一早去飲早茶，然後去美食節。

訂左位，但都幾多人。

好似黎左好多次咁，唉！

其實上次已經傾左大半，EMAIL覆埋佢日期同暫定菜單等，只係簽番份野，同傾少少細節咁。

傾開的鄭小姐未番，黎左個唔知乜小姐黎，乜都話要問下先，於是話食住等鄭小姐番來先講。

估唔到又幾好味喎，椰皇燉燕窩，好好味！

仲有蝦多士！

鄭小姐番來，原來佢都住屯門，早知係屯門傾喎，講笑咩！

酒席貴左，酒水加左，仲要加一，席數都加左，又有最低消費保證，其實都冇咩得點傾，只係得個知囉！

送的野送番，最後佢將冇送的野送番少少俾我地，叫做順番少少啦！



佢仲同我地講左少少細節野，又幾細心！

只係心情有些奇怪，要知道我都唔肯定我們會唔會用得着，所以奇奇怪怪咁囉。

倒數

酒席改期 + 惡夢

今早發左個夢，唔知算唔算惡夢，但一定唔係開心囉。
******************************************************
話說結唔成婚，早幾日再上彩福傾左改期的事，當然附加左張借回來的證明文件。

但來年成本高、巿道好，於是要加價。
其實有幾個paln的。
PLAN A：明年8月前擺番，可用番原本菜單，唔使加錢。
PLAN B：9-12月，用新菜單，再加一，仲有min charge。
PLAN C：2012年，再加多6%

係我角度梗係越遲越好，可以擺得成的機會都大少少丫，不過PLAN C又未免太誇張，而PLAN A基本上只會重覆今年的情況，所以選左PLAN B，係貴左好多架，但如果真係結得成婚，錢已經唔係一個問題，多多都值得慶祝！

而浩浩又話有的星期六日裏，都幾中意12月31日，於是就選左2011年的最後1日除夕夜。


點計都好好，以加最少價換最多時間！


不過又有個限期，唔多唔少有些壓力；而且也叫自己做定心理準備，好有可能最後都係會好似今次咁，所以唔好放咁大期望。


其實一早諗住蝕左D訂便算，但佢俾改期咪即管改住先，搏下用得着咁解。( 鬼叫佢又唔俾轉名、買賣咩。)
*******************************************************

回程時我問浩浩，有冇覺得有些失落，尤其離原本大喜日子越來越近時，佢只係話：「冇喎，與其結得唔開心的，咁就唔好結住囉。」

我都唔識講究竟係乜心情，總之係有少少失落囉。

*******************************************************

跟住就到今早個夢了。


夢裏面，一早就到左結婚的日子，但我乜都冇準備到，兄弟姊妹到齊，但化妝師冇、頭飾冇、攝影師冇，花球等等乜都冇，心急但冇用，問自己點解咁唔小心架，冇好似搞活動咁諗清楚流程的嗎？

無辦法之下，唯有翻箱倒櫃的找晒可用的野出來頂住先，頭飾頸鏈飾物、假花花球、化妝品等等，仲隨手找左個朋友仔影相，至多醜樣D，閃晒閃光燈又黃咁囉。

浩浩話佢找左ADY來化妝，唔多想但冇法。

跟住3C的朋友仔黎晒，我話我地未結婚住喎，佢地話唔得，咁點喎，浩浩話咁註冊先囉，咁有咩分別喎，唔得的嘛！

最重要係我都冇BOOK註冊處，浩浩話咁唯有擺住一部份酒應付左呢班人先，其餘到真係結婚先再算。

點得架！但我又諗唔到辦法喎！

跟住就醒左！

唉！

一個一塌胡塗的婚禮，跟現實一樣！

*********************************************************

原本的日子取消左，變番散座

改完酒席，去食峰壽司安慰下大家！


*********************************************************

本來諗住結唔成婚，去北海道玩下開心下，有人又話放唔到假！

退而求其次，諗住去澳門，都話唔得！好唔開心！

呢個TIMER我會DEL左佢的了！

***********************************************

重新執過晒個BLOG的分類，過埋呢2日，我要好好再上路。

原本呢個BLOG係想寫下結婚的各樣事情，宜家變左家居BLOG，也算是有趣吧！

慢慢的生活

晚上在家食完飯，行回去的時候，突然間醒覺自己行得太快了，何必咁急呢？

天氣雖然比早上涼左差不多10度，但未至於凍到要趕快回家縮在被窩吧。浩浩又不在家，慢一點也沒關係啦。

但不自覺會行得很快，尤其是天黑時，習慣吧。

慢慢走在小徑上，燈光和身邊的植物讓人靜下來，不由自主想到剛剛食飯時和爸媽的話題：姨姨會來港玩，住我家。

腦裏不禁彈出很多野，一下子收不回，但每當自己一個行路的時候，總是好好整理自己思緒的好時候，由當年海旁到今日任何地方也一樣。

1) 轉眼原來離上次她來港我家住，已是24年前，我6歲的事，但當時的事我還記憶猶新呢！蝶影樓，她教我妹行路，學送我上學，媽媽出去番工，她煮飯很慢，爸爸放工要幫手，她很喜歡譚詠倫，買左錄音帶同海報，爸爸仲把收音機的一隻喇叭較去佢床邊=我妹床邊。

第一次意思自己似乎真的太好記性，未必是好事。當時她來辦嫁妝，婆婆和姨媽帶她四處買東西，如今她們全不在了，小姨剛好50要退休，阿仔=我表弟，大學畢業出來做事。

物換星移，蒼海桑田，桃花依舊，這種唏噓不懂說，感概由心。


2) 家中真的要的起心肝好好執整一下了！牆壁在早前連番的極度潮濕天攻擊下，發晒霉，應該可以用危樓樣嚇走小姨，免得住太久。

執執佢一家人也住得舒服點吧。

積極諗諗辦法先，最重要是找個地方短租安置人和物先。有門路請介紹，謝！


3) 想像到爸媽會點解釋我的婚訊，一早千叮萬囑他們未派帖都別四處張揚，弄至如今田地，究由自取，唔抵可憐的。

不過很奇怪，總是喜歡做她們看不過眼的事！心裏不禁有點開心添！(好似有些變態)

總之我不想同她們同類，我有我的思想和生活模式，我覺得開心寫意，你吹得我脹咩？！

看！童年陰影多深遠呢！

不過也好，至少讓我自己看清原來結婚與否對我來說，倒沒有想像中大件事。如果當年浩浩真的係25歲時捨得買隻鑽石戒指求婚，我諗我應該嫁左，既然冇做到，時移世逆後，我想我想我們過得安心精彩，比結婚重要得多，至少呢刻係囉。

4) 明天驗身報告出，有些擔心添！
無意中係生果報看左篇食療，上網追晒個人的健康文章SAVE起，未必跟晒，但睇下無妨，始終健康係自己的。

嚴浩
http://hk.apple.nextmedia.com/template/apple_sub/catkeycol.php?sec_id=12187389&showcol=3763978

取消婚禮

在距離原定結婚前的4個月
正式宣佈我們的婚禮將會取消

相信有些朋友並不驚訝知道這消息

最難過家人那關也過了，其他人怎想我們也控制不了。

有人覺得我很衰，要求太多太高，我也不想解釋，不竟這些是我們之間的事，體諒到的我心存感激，不能諒解的也得接受。

不竟這件事上，我也不會是歡喜的一個，每當身邊閃過有關結婚的事，心裏不其然一沈，既羨慕也妒忌。

但我永遠記得有一個人跟我一樣不開心，他沒說出口，但我知佢的唔開心是因為尊重我的決定。

我會記著佢說過：「我只想見到你開開心心，而不是整天愁眉苦臉、憂心忡忡。」「結婚是想開心。」「我知你明白的，只是你還有野未諗通而已。」

謝謝你
沒有人比你更明白我為這件本該歡天喜地的事而有多大的壓力
我像個患了憂鬱焦慮症的病人咁為一件快樂的事哭了又哭、時時擔心
是我想得太多
但
如果我做左，我想我會比現在的決定更後悔


早前跟家人說的時候，他們很積極的為我想辦法，甚至連牧師和教堂都給我預備好，只是我.....我也不知怎解釋，總之呢刻，我覺得未係時候，我未ready吧。媽媽衝口而出的說話也令我很受傷，當時想我就鬥氣的想我就成世都唔結俾你睇！當然冷靜過後便好。還是那句，不想做左後悔。

也或許我是恃著你我的關係太close
即使今日結不了婚終有一日會結得成
所以冇後顧之憂
雖則我很期待我們有一天能結婚，但相比希望你信主，我寧願放棄我該有的幸福，但我知有些事是逼不來，我也不想給你壓力。( 雖然我知我已給了你壓力，對不起！)

謝謝你將你的唔開心簡化成「只係唔開心經濟上的損失，短期的有酒席的訂金，長遠的有宿舍夠分但拿不到」，這樣的確令我好過一點。


唔講了
我相信你我身邊有很多好朋友
好朋友自會一切心領心照
如果有人喜歡義正詞嚴地教訓我或發表偉論
請找我，我會幫佢登記成為拒絕往來戶的

謝謝

彩福賀年糕點

雖然未擺酒，但到現時為止都幾欣賞彩福。

跟得幾足，時不時keep住有email聯絡，例如早前分家，都有sent email來解釋。

又久唔久有些優惠送下，如晚餐優惠卷、旅行coupon等。

最近又有email叫去取賀年糕點，忘了，佢又有人親自致電來提去取。

星期六放工去左拿，嘩，竟然係一底蘿蔔糕 + 一底年糕！仲要係大大底的！

雖然唔值咩錢，但心意搭夠，滿意加分！

利舞台門口

嘻，最愛長樓梯，希望到時依然咁靚！

賀年糕點！

新年有野招呼客人了！

生日

今天決心要行山！

暫定係大埔，晚上去小白鷺餐廳晚餐。

浩浩卻中間要去踢波，俾左3個選擇佢，1) 行完山回來踢；2) 踢完去行；3) 我自己去行佢踢完找我晚餐。
當然我希望佢自己選擇4) 唔去踢波同我去行山！但亦當然地佢冇咁做啦！

佢選左1) ，算！生日無謂令自己唔開心，我決定從今以後要令自己更開心！

搞到10點幾先出發，有車好方便，去新元朗中心食早午餐，跟住駛入南生圍，雖然對屯門來說，呢處實在很近，只係係清清同呂巫家旁，但真係未來過。

看住地圖，找左位泊車，睇住行山書，入去乘街渡，$5/位，1分鐘左右船程，叫做玩下囉。

天氣很好，藍天白雲，鳥語花香，遠山近水，樹木環繞，環境怡人，心擴神怡！
.....下刪300字...........都唔夠形容，都係自己睇相啦！

到浩浩去踢波我回來同清清貓曬太陽，休息一會。

晚上改去旦王花吃飯餐，但浩浩都係建議去食自助餐。
於是改去黃金海岸酒店。

想當然超喜歡去食，但也有年幾沒有去了。
再去景色依然靚，情調也好，尤其戶外燒烤區，加埋有人唱live，有一剎以為去左泰國旅行添。

只是美食質素比以前差，有些失望。

幸好燒羊架、燒大蝦同甜品都仲好好味。

影下相，好開心！
浩浩影相有些進步，恭喜晒！好中意呢幾張。

浩浩送的生日禮物！
佢昨晚番中，12點幾放工係樓下新開的麵包店買的，幾方便便可買齊晒花、朱古力同蛋糕！
不過佢送乜我都開心的！

謝謝，30歲的生日很快樂！

願望係做一個靚靚又叻又有智慧的中女！
身邊的家人朋友都快快信主！


**************************************

另外，係facebook收到很多意外的祝福，謝謝各位，原來朋友仍有很多，真好！

**************************************

加插爸爸媽媽弟弟妹妹早幾天跟我慶祝的生日飯，但忘了影相。
弟弟專登去買的美心新出的 x 蘭蛋糕。
嘻，綠色的馬拉糕！
大家笑左佢成晚，謝謝佢。