洛神花果醬─105T開機之作

星期五拿左麵包機回家，當然很心急玩玩具啦！本來正好WEEKEND開機，但很早約左星期六去LEVAIN 學包 ( 另詳文 )，明知會有很多包拿回來，冇理由仲整姐，成星期以包度日都搞唔掂！

但又心思思的時候，想起我的好同學HAPPY早前分享的洛神花果醬，本已想整的了，呢個105T又有果JAM功能，咪正好囉！好！開工！

去街巿買新鮮洛神花，買左1磅 ( 整左果醬約300g )
( 題外話，之前一日我上堂，請去開街巿買野打邊邊的浩浩幫我買1磅洛神花，結果第二問佢買左幾錢，佢話5元一両，阿姐話佢買咁多做乜，心知不妙，果然....佢買左洛神花乾！)

首先，加鹽浸洗兩次。

切去花蒂

本來happy教用筷子把果實篤出，但我整唔到，反正都係要煮溶的，索勝把花瓣搣開，拿出果實。又反正都搣開晒，索勝又再各自洗多次水，裏裏外外都洗乾淨。

得出花瓣約250g備用

果實約38粒，加水浸過面，細火煮滾。

煮至變稠微微出果膠，約5-10分鐘

熄火，丟掉果核。( 如唔用麵包機可加花瓣下去煮溶至稠便成 )

今次得出果膠約110g，我覺得可以煮少陣，多番少少水會好些，因為今次出來成品較杰身。

花瓣、果膠放入已插葉片的麵包機容器內

按附送食譜製果醬份量計，加90g糖，近來煮食改用原糖，比白砂糖健康些
(出來成品略酸，但洛神花本甜似山楂，作果醬微酸可接受，如愛甜請自行加糖 )

加埋入容器

果醬食譜仲有檸檬汁，哈！我有新鮮檸檬汁！( 另詳文，唉！太多野想講！ )

只是要1.5湯匙

全部放入容器

開機

mode 26 -- 果醬，預設120分鐘 (可自定90-150) ( 其實可以唔使咁耐，下次可減些 )

途中素素來檢查數次

清清也來巡視數次，比我仲心急！

我就飲住浩浩錯買的洛神花花茶、食住上堂學的scone配blueberry jam，上住網等成果！

2個鐘後！完成！

我覺得杰左些，似啫喱狀

happy教加蜜糖更添美味

用預先以100度大滾水消毒左的玻璃樽，趁熱入起果醬，關蓋倒轉，逼走空氣，以成真空狀態，待涼，放入雪櫃儲存。

哈！麵包機的第一機竟然唔係麵包，好搞笑！但好開心！

俾左一樽媽媽！佢三日幫我KO左一樽！


據說洛神花好有益，成是植物界的「紅寶石」！

「具有抗高血壓、補血、平衡身體內的酸鹼值、治療肝病，
對於抑制癌症、幫助腸胃消化道吸收、調整女性生理週期，以及美容保養都有不錯的功效。
又可消除疲勞及便秘，並具有利尿、促進新陳代謝的功效。

清熱解渴，清心降火、止咳、降血壓、消除疲勞。

富含維生素C，可改善體質。」

上網抄回來的！總之好啦！

唔知煮左仲有冇效，但用來塗下麵包、當柚子蜜咁沖來飲下，都好開心！

即晚拿來配SCONE和牛角酥，順便用埋剩餘的檸檬來個凍檸水添！
大滿足！

附錄：浩浩買的一大包洛神花乾！嘻嘻！浸浴都得！