panasonic 麵包機 SD-BMS105T

之前去學整包，買左KM，其實從冇諗過買麵包機，甚至有少少不屑，老師話冇理由走番轉頭的喎！
所以從冇諗過佢會出現係我屋企！

之但係......
當你每天都要番工，而每天都要係公司樓下買包做早餐！一路食一路鬧，但又冇能力放工仲付出精力時間去等發酵同搓包，難得WEEKEND又勁多野想做，得長假期先整到幾次時，果種頹喪真係令人好DOWN！

於是係同學仔度一聽到呢部新野出左，仲要找到呢個咁吸引的價時 (差不多係日本6折咁濟！)，上網即時找資料做對比比較，用左唔夠1日就決定訂佢回來！
多謝同學仔全程幫忙！3日，佢已經進駐我家！

見到佢真係好開心！
忍唔住好笨咁黎一個開箱文！(唔好意思，以前一路睇開箱文真係一路笑，點解有人咁無聊，但又忍唔住繼續睇！竟然今次到我！唉！神仙千年道行一朝喪！)

盒野好重，磅過有成十幾磅！屋企冇人收貨，要係公司收拿回來！

盒面註明新功能賣點

佢來自台灣，所以盒上係中文字！素素係咪覺得好親切呢？

打開見到原廠PANASONIC的保養證，可惜香港冇用。
另有一張應該係SELLER放入去的注意事項 ( 有關兩地不同的電壓問題解決辦法 )

拿出來之後，純白機身配銀白色頂蓋，係我最中意的顏色配搭！設計簡單靚仔！(前幾個版本都有粉紅色同金色蓋，不過嗜好白色的我都係中意襯銀色。)

面板其實得幾個掣，中文顯示面板！唔使查字典同死背！

機頂有警告事項，不外乎蒸氣小心之類

揭開銀色蓋，是乾果格和乾酵母格。
同埋我覺得好重要的「預設程式」( 即 MODE 1-30 )，唔使下下拿食譜對 / 背左佢！又係果句，中文睇得明好方便！

再開就係其餘部件。

有兩個麵包容器，有蒸同焗

拿起麵包容氣，機身內膽發熱線

機背同兩側各有散熱孔

機背基本資料

連埋兩款葉片，麵包用(黑色) 同 麵條、麻糬用 (深灰色)

個人覺得佢鋼水質料都OK，雖然MADE IN CHINA，但PANASONIC由細用到大，樣樣都算耐用，所以都有信心！

送埋呢個量杯仔、量匙、天然酵母培養杯 ( 唔係有中文的話，我會當佢係量杯就算 )

量匙仲係日文，斷估係FOR奶粉、乾酵母等等用

仲有使用說明書，但紙質軟身 :(

圖文並荗，彩色印刷

含好多食譜

越睇越吸引！如果係日文，會好DOWN！
但人地話遲早上網會有中文版DOWNLOAD，所以真係買日文版的都唔怕，但宜家可以即睇跟住做，更好！好多好想整！菠蘿包、烏冬、麻糬、果醬、餡等等。

STEP BY STEP，應該跟到

仲有一對全棉隔熱手套。
全部配件！

最新款、更多功能、中文版、仲要送貨超快！
仲要比由日本訂舊款仲平，點抗拒！

之但係日本同台灣的係110V，同香港慣用220V唔同，要加舊火牛 ( 變壓器 ) 先用得
鴨寮街好多間都有售，$300@，好多網友都用佢話好就買佢。好重，加幾廿蚊有貨送，不妨考慮！

未執廚房，暫時放餐桌先！

好心急開機呢！你估我第一機係乜？