樹記腐竹流心蛋糖水

昨天去左朋友家玩，用左佢個煲煮左個宵夜！

腐竹流心蛋糖水


材料：
腐竹 ( 煲糖水用 ) 適量
冰糖  適量
水 適量
雞蛋  隨意
( 哎，好似好廢話，乜都隨意適量，嘻，但真的，分別不大，多些腐竹就濃些，好似豆漿咁，濃些淡些睇喜好，甜味、有蛋冇蛋一樣自行決定。)

做法：
 
1) 烚蛋
流心蛋做法，室溫蛋，凍水連蛋一齊放煲，水蓋蛋面，中火煲至水滾，水滾後開蓋繼續煮，計時1分鐘，熄火蓋蓋焗2分鐘。離火，倒水熱水，浸冷水/冰水，小心去殼備用。

2) 凍水下腐竹煲5-15分鐘至腐竹溶，加冰糖煮溶熄火。

3) 進食時把蛋放入腐竹糖水中。

~~~~~~~~~~~~~~~~~~~~~~~~~~~~~~~~~~~

樹記腐竹真的超正，雖然成日要排隊，但都值得，好濃豆香，同埋佢去貨快新鮮。

其實其他腐竹都有呢個效果，最重要是新鮮，試過買超巿果些，煲成個鐘都唔會溶，用攪拌器打碎都唔溶，好灰心的。

樹記

深水埗汝州街236號
(西九龍中心對面條街)

扁竹同腐皮碎都係FOR煲糖水，仲有好多野賣，D姨姨都HELPFUL，你問佢佢會教你邊隻點用點煮。
我買一斤腐皮碎煲到好多次！但記得要放冰格！