睇樓 ── 新屯門中心

新屯門中心唔係第一次去，之前跟cc地去睇左幾次，跟住佢買左裝修時又去左，佢旅行幫佢餵貓又去下咁。

因為budget問題，佢地睇的唔係我地心水，但順口同經紀講左我地有興趣的要求，如果佢有盤就聯絡我地。其實佢都打過幾次俾我地，不過係電話問左幾句，最後都因為單位同價錢唔o岩冇去到。

今次見個單位同價錢都係我地心水，又即管去看看，一次睇左3個單位。因為講明左，所以睇呢3個單位都係景靚高層的。

1) 屋苑單邊，547"，廳向東南，房向西南，高層38樓，望出去冇遮冇擋，感覺很好，很舒服，很中意。當然價格亦最貴！$260!!!

廳望出去同我們望出去的方向相同，但因新屯中位置較出，望更多黃金海岸同避風塘，碼頭的樓全部變成好細咁，好正！

有裝修，兩房都四四正正濶落，7呎x10呎、7呎x7呎咁上下。

 

房望美樂同兆山。

廚房同洗手間都好企理，連我咁奄尖都覺得唔使點執便可放租或入住。

2) 同一單位，547"，但16樓，個view即時差左一大截！剛收樓，冇裝修，好殘，但so far ok的，有時寧願佢冇裝修可以自己搞o岩心水的。而且開價也合理，$210，似有得講。

只是不是我地杯茶，睇睇就走。

3) 隔離座，都高層33樓，房都係同之前兩間向同一方向，西南，廳就向西北。
有人住，所以唔好意思影相。

佢養左四隻貓，但好乾淨企理，全屋窗換過兼裝晒貓網，2間房又打通左，完全係我地的style。

唯一唔好就係廳窗外望到對面一座，雖然都有一段好遠的距離，唔會就咁望到。
佢剛拿出來放，開價都唔算高，$210，也是應該有得講。

******************************************
坦白講新屯中唔係我首選，始終覺得巿中心係地標屋苑，升值同放租都較易，不過如果自己住新屯中環境都係舒服可以的。佢始終都大些，住得會舒服些。同埋浩浩都講得o岩，即使放租都要自己覺得想住才可吧，不竟唔知幾時有可能自己拿番來住的嘛。(雖則屯巿我都ok架，細少少但佢真係好方便，食同搭車都好！)

也有諗過放租海典軒這邊自己住去新屯中，雖則唔捨得個露台同咁近媽媽，但呢邊放租好好多，租得幾年再睇情況諗下一步。

不過真係要計計數，(1)那個38樓的確是優質單位，就算樓巿跌也不憂租不出，至多係平租姐，不過260似乎太過份，仲要很硬，相信佢都唔憂賣，咁未必買得成。(2)冇興趣。(3)反而幾好，不過單位唔算好優質，除非佢平，叫做多左層，否則唔想重覆上次咁，差幾廿萬冇買層靚些的成日諗番都後悔！

打下價問下ealie計計數先！但可能要放左我的月供股票，但最近跌左放又唔抵，唉！點好呢？