如火如荼

終於開到工換窗！
一日搞掂晒！其實要做好快。
不過我成個星期都唔得閒上去睇，好彩有師傅同浩浩跟進住。

早兩日匆匆上去傾左講左些電掣要點走後便走。

今日趁晚飯後，上去睇睇師傅開工成進度。

嘩！乜都開晒壇咁，好有如火如荼的感覺！好！

1) 換好窗，未拆棚。但想像到望出去應該會好靚。
牆下電掣都拆左整緊了，我們要求改做孖掣。


2) 房電掣我們要求改在門邊，起初師傅話唔多可行，因為牆有非實心生口位，如不藏喉管便好簡單，但梗係唔好啦，安全嘛。我們叫佢幫手諗，跟住都冇再問。
今日已經見到改好左，明顯佢最後都同做電師傅諗掂左，經天花走，非常好！

3) 廁所同廚房的窗都換得好靚，留左位裝抽氣扇。

   

4) 廳窗改好，但窗台爛左果條雲石未整。
不過也因為咁，見到佢條電線同天線喉管入牆情況。
呢個又係當初佢話未必做到的地方。

5) 我們要求電視位放過對面，讓梳化可以背向窗，但師傅話地板唔拆，呢度又有冷氣位，唔拆地腳線好難搞。跟住又會同冷氣個電掣縱橫交錯等等。

佢又幫我們諗掂左！好！
係原本位置接線，經呢個未整好的窗台走。

牆身鑿爛晒補番，好爛屋FEEL，不過破而後立。不過如果屋轉手太多，裝修太多次，更靚左補右補，有問題的風險好難唔高。

成功改到對面牆。

6) 廁所天花拆左，原來唔係木板，係石膏板，唔知有乜唔同，都係會發霉，師傅話難拆些。
原來天花頂藏左咁多大喉管！
以前浩浩家裝左鋁天花，睇唔到都唔知。
如果唔係今日來看看，我們應該都唔會知，裝修跟緊些知多些學多些，有事要改也容易些。

7) 但冷氣喉未，佢話要另找做過的師傅跟，但窗按佢同窗師傅商量左的方法，加濶左少許邊俾冷氣喉出。


8) 師傅做野都企理，冷氣、燈、地板等都用野包好。

工具收工放整齊。

垃圾泥沙放一邊，我見過有樓下清潔阿姐上來推走，我估佢俾飲茶錢找人幫手

再一次證明找到個信得過的人係好放心的，只是等完工。


最近唔知點解很累，看來要多休息。

走時係平台出去停車場拿車，呢期平台多設施，游泳池、球場等等，仲可去番商場，勁方便！雖然落樓下去都唔煩。(以前停車場係地底，平台過唔到商場同呢邊泳池咁，要轉車立好可惜)

我們又回來了！經紀講我們以前個單位放售，勁想買番！可惜時機同價錢都唔O岩，看來暫時無緣了。

跟住回家整左個桂花酒釀丸子同朋友黎個小聚交收，好難得約得成，可惜太累，冇時間大家傾多陣計，希望下次吧。