賀年糕點(一)──蘿蔔糕

上年終於找到一個好正的蘿蔔糕食譜( from T&P )，今年再接再厲！

一樣咁成功....可見呢個食譜成功率極高！




專登希望過年前可收部KM，就係希望呢一刻！用個FOOD PROCESSOR來切絲！唔使再用刨刨！

以前要刨足成粒鐘手都斷咁濟的步驟......
宜家只係要把蘿蔔切開

放入機

就咁便搞掂.....個野唔算大....2kg 蘿蔔分左3次.... 聽blog友仔四月貓教路...仲有粗絲同幼絲款以增口感.....

材料：

蘿蔔 2 kg（應該是刨皮前 ...... 我刨皮後仲有2kg....所以蘿蔔稍嫌多左些....）

粘米粉350g



冬菇6隻，浸軟去蒂切細粒



蝦米1/2碗，浸軟切粒



臘腸二條，沖水切粒
臘肉半條，沖水切粒( 呢個食譜冇的，但抽獎抽左條加埋入去的，又幾好味 )


瑤柱2粒，浸軟撕開 ( 呢個食譜冇的，但中意食自己加的....用左係面....但其實可以再多少少放埋入糕入面.... )



水約二杯 ( 浸冬東菇水＋蝦米水 )







調味



雞粉 2 茶匙



胡椒粉

係浸瑤柱的時候，有隻貓偷左粒瑤柱，食左！仲食過番尋味不斷嘗試係廚房偷食！目標係臘腸同瑤柱！激死！唯有好似睇住d賊仔咁睇實佢！

做法


1) 燒熱鑊，下油爆香冬菇、蝦米、臘腸、臘肉

2) 加蘿蔔炒勻，加1/2杯水煮蘿蔔至軟身

3) 調味，炒勻，熄火

4) 用1 1/2 水將粘米粉開勻倒入

5) 拌勻材料，煮至半熟.....呢個動作原來叫「撐糕」。

6) 塗油於錫紙盆，倒入蘿蔔粉漿

7) 面舖瑤柱絲，蒸30分鐘 ( 原食譜是大火蒸40-50分鐘...總之插入沒有粉漿便熟)
( 我因就個爐仔, 所以2開3，細盆左時間唔使咁耐。)

今年因為有左呢個蒸爐仔....一次可蒸三盆！好正！又唔使睇火！但最上兩層有些倒汗水在面.....幸好糕夠凝，輕輕趁熱倒左面的倒汗水便行，也沒影響味道。
不過就因為就佢大小，原本兩底大糕的分量就分左三底中.....也好，可以分開俾左三個家庭！

8) 趁熱灑上蔥粒及芝麻，完成。

對於今年工具齊備，步驟簡化非常滿意！

如有興趣想睇傳統整法，可睇番我上年呢度。



*********************************************************

賀年三色糕點：

1) 蘿蔔糕

2) 錦鯉椰汁年糕

3) 桂花馬蹄糕