2013新春赤口+情人節前夕露營

幾年前去左一次露營後上左癮！可惜露營要睇假期、天氣、季節、人等等好多因素！
所以我們自己只係去過兩次！

對上一次係10年的11月，等呢日等左2年幾！
幾次假期plan左去，但都因為天氣唔好、身體唔舒服、浩浩假期就唔啱等等取消！
所以今次成行得來不易！

早一個假期已經開始PLAN，找朋友一齊去，但好多都CONFIRM唔到，最主要是唔太熱衷吧。
早兩星期就浩浩假期
早一星期日日望住個天氣報告
感謝主！
2月初竟然都有18-22度，陽光普照！明顯適宜郊遊！
可惜朋友依然約唔到，都係得我們兩個，我其實冇所謂，但男友話悶，二人世界都嫌悶足以爆發一場戰役啦！哼！我幾大氣量！

我之前找晒D野出來，果朝早浩浩負責PACK袋，我準備食物醃等。

去馬料水碼頭轉船，其實黃石碼頭船仲密，但馬料水近我們，所以就呢度！
船期可去翠華船務CHECK。
我們搭3pm果班船

假期好多人一家大小去玩。
呢家人好厲害，幾個細路，最細個得歲半學行ing，仲有隨時打開小帳蓬俾小朋友玩！
(後來我係朋友去荔枝莊的相中見到佢地，原來又係一堆勁pro人！難怪！)

塔門是西貢對出一小漁島，好細好平靜，主要是露營人士同少量居民，有士多等，冇東平洲咁荒蕪。

島上有警崗，有人巡邏，感覺好安全！

本來聽人講塔門疊石果邊風景好靚，但最後我們拿住東西驚周圍找會天黑，於是都係係番上次個大草地扎營！
其實呢度都靚！
今晚我們的家有海浪聲和滿天星星，幾浪漫！

呢位人兄變得熟手！想起第一次來搞幾耐都起唔到個營！

比上次多左張桌子和椅子！嘻！

尚算舒適的家 ( 不過科技日新月異，我睇啱左張吹氣地墊，應該仲舒服，諗諗佢先 )

扎好營就出去取水，順便行下影下相

行左陣回去黎個午睡！露營離不開食、訓、玩！哈哈！

訓醒就開燈、開爐煮飯！

新年露營餐單：
以前試過煎牛扒配紅酒、又試過煲蜆粥、薑蔥炒蠔咁，今次新年，又冬天，都係食中餐好，有飯落肚好好多。

1) 冬菇滑雞煲仔飯
先洗米煮飯，見蝦眼水，落預先醃好的雞和冬菇，收晒水熄火，落甜豉油蓋起焗15分鐘就食得。
可惜cookset d煲傳熱快，散熱都快，米仍有硬，下次一定要先浸米半小時先煮。

2) 清酒煮蜆
先在家洗淨浸蜆吐沙，以保鮮袋入起。
凍水落蜆，煮滾至蜆打開，再煮多一會以確保熟晒，加清酒煮一會熄火。
超易又好味！

3) 瑤柱粉絲炒節瓜
本來是蝦米的，但食晒未買，改瑤柱，都係新年的東西唔緊要吧 :p。
節瓜去皮，切條/絲。先炒切瓜，加已浸軟的瑤柱和粉絲同炒，加水煮至節瓜軟身。加少少鹽調味，瓜千祈唔好落豉油。

開飯！

大廚

食飽洗碗後訓一訓！

11點幾訓醒來整甜品！
今次唔焗蛋糕，甜品都係中式。

先打蛋2隻，加40g糖拌勻

同一時間可用大煲煲水

加一盒200ml的360北海道奶至蛋漿中，拌勻。
水滾放模，並將奶蛋漿倒入模內，加蓋燉5分鐘左右，至凝固。

登登！
甜品：360燉蛋
呢個係減糖版，好滑，不過我都係中意甜些好味些

雖然今日氣溫係16-22度，但郊區戶外半夜都幾凍，男友拿左津路烏龍茶，煲滾，飲杯熱野又真係好舒服！下次記得帶茶葉/煲糖水

今晚天色勁好！個天勁清！睇到好多星星，多到好似跌落黎咁！好靚好靚！
可惜！我竟然唔記得帶腳架！
我的星軌呀！唉！
放地下都試幾張啦！
都睇到的，但唔靚囉，條快門線又插唔到！好失望！
算吧！兩次來塔門都睇到滿天繁星其實都好幸運！
或許最靚的野專登唔俾我影，要我記住留係心中吧！

訓到半夜，睇下天氣，營內唔入風，所以都唔算凍，個羽絨睡袋都仲係當被蓋便夠。

較鬧鐘5點幾起身睇日出，但好眼訓，天文台話6點幾先日出，信佢！再訓！

6點20分個天仲未光，6:40已經光左，上次個天光完先見太陽出的，起身等。
黎明時份真的好凍，著左兩件羽絨一件風褸

煲住水煮咖啡等

時間過晒都冇！太多雲！
今日睇唔到日出了
可惜！

煮早餐：日式金菇肥肉烏冬鍋
洗淨金菇，凍水落，煮滾，加烏冬煮至沸，加肥牛煮至變色熟，加濃縮鏗魚昆布湯汁，加隻蛋，略煮便成！

我們的流動廚房！

食飽收野，又四圍行下！
清晨的塔門好靚！

我們終於找到疊石，仲諗住下次黎呢邊紥營！

睇下人地的裝備偷下師都開心！

好好風，好多風箏飛得好高！可惜我們乜都冇，否則玩多陣都好！

塔門好多舊屋都改建，呢間好靚！

點趕都要再來呢度！
塔門名產，超美味海膽三文治！
仲試左冰凍咸檸檬茶
昨天來到佢關門，懇求下才食左個普通多士頂肚，今早終於食到

行番去碼頭

見到警察在巡邏！
原來塔門屬水警。
佢地會企係度等船來，監察有咩人入島，又幾好辦法喎！

回到馬料水，發現初四的人比我們昨天還要多！中意露營的人遠比想像中多！

太陽一出霧便散，今早密佈雲層，現在天朗氣清！
回來襯好天氣洗晒d野曬乾埋，收好下次用！

順便買左新出的佢！日本翻譯雜誌，好毒！