鳳梨卷、鳳梨酥大製作( 附P仔105麵包機製作餡步驟 )

鳳梨酥整過幾次，反而鳳梨卷成想試未試。

上次朋友們來我家搞了個「新年糕糕試整大會」，整左次鳳梨酥，但每人分得一兩件，唔夠喉，同埋果日整得太多野，唔太清楚steps。
咁橋又有朋友仔話諗住整來新年送禮，於是就索性約日黎個「工場式」鳳梨酥、鳳梨卷兩溝聚會！

工場式狀況一陣慢慢睇，先睇成品！home made係咪好勁呢！

仲有樣勁的係，我發現左麵包機原來係整最煩的煮菠蘿餡的步驟度，可以代勞！慳番好多時間！

其實鳳梨酥同鳳梨卷材料係一樣，只是最後包法唔同。


好！開始！

**********************************************
首先係餡！

材料：

1) 菠蘿1個 (約400-600g)，要熟的，會較甜
(忍唔住題外話，用呢個開菠蘿器，$35@深水埗，方便到爆！)
切去頂，以開菠蘿器( 或任何方法 ) 取菠蘿肉 ，汁不要，可直接飲掉，鮮甜好味。

量菠蘿重量，加1/3份量的糖( 如600g菠蘿，加200g砂糖 )，然後加1大湯匙(約10g) 的蜜芽糖/ 果膠，全部放入麵包機

然後用果醬MODE (105就MODE 26 ) 和 麻薯MODE ( 105的MODE 29 )各一次

視乎菠蘿的多汁程度不同，有需要可加多一次果醬MODE。
下面就用左2次果醬MODE和1次麻薯MODE，好好包！
(千萬不用試紅豆餡MODE，因為佢其實冇加熱，只是搞，根本唔可以令菠蘿汁蒸發變杰，我試左幾次唔得！唔使浪費時間！)

但一機只可整1-1.5個菠蘿的份量，要作工場式自然唔夠，所以早幾日開定工，做定放入雪櫃雪住，這是3個大菠蘿的份量，各只用了果醬和麻薯MODE各一次，較濕軟，但都OK包到。

如冇麵包機，用鑊/煲一樣可以，相同份量

不停炒，炒到佢出汁，煮到佢變軟變林身，然後繼續煮至收水(約1-2小時)

變成下面咁便可，其實可繼續煮，再加1/8菠蘿份量的牛油和1/10的熟糯米粉再煮至更杰身，不過我覺得分別不大，SKIP了。

**********************************************
到皮喇！( 出自四月貓之家 ) 

材料：(這份量約24隻鳳梨酥或50粒鳳梨卷，大概，因為人人包餡份量手勢不同)

有鹽牛油 210g、糖粉60g、奶粉24g、芝士粉12g、煉奶48g、蛋白汁15g、蛋黃汁15g ( 約=1隻大蛋 )、中筋麵粉300g

今次試左用呢隻金罐牛油，據說出面某好出名的曲奇餅店都係用佢！

跟普通有鹽牛油各一半份量，即105g磚裝、105g罐裝，果然比較酥脆可口！但唔敢用佢全代替，因為佢好軟身，怕唔能成形！

做法：

牛油、糖粉攪勻，分次加入蛋黃、蛋白、芝士粉、奶粉、煉奶，用慢速拌勻

(呢部曾經停產的座檯自轉攪拌機原來再出番，吉之島賣3XX咋！好方便抵用！我有了KM佢都唔可退役可想而之。)


中筋麵粉過篩加入，慢速/ 甚至用手混合，蓋上保鮮紙鬆弛30分鐘。
(別大力按壓，免出筋，才能保持酥鬆！)


**********************************************

到左包法同焗法，就要分鳳梨酥和鳳梨卷兩款了。

先來簡易版，鳳梨酥，模多為方形或長方形。

將菠蘿餡包入粉糰內，放入模具，以手熱力令皮軟黏合，盡量頂角、越少紋焗出來會越靚仔！份量包幾隻便能摸索，模的9成最好，因為焗時會澎漲，如爆晒焗完冇咁靚！

排好，放入180度預熱的焗爐，焗 10分鐘，反轉焗3至4分鐘。

金黃色便可拿出來室溫冷卻，小心甩模便成。



鳳梨卷則要買呢個模

將皮料放入模內，用力按唧筒令佢唧出如圖的條狀，卷起菠蘿餡

忘了影相，大概係咁的樣 ( 嘻！試整係咁上下的了！)

同鳳梨酥一樣，排好，放入180度預熱的焗爐，焗 10分鐘，不過不用反轉。

******************************************************************

拿出來完全冷卻後可入袋/ 盒作包裝！

呢度就係6小時工場的成果！

見唔見上面忌廉哥同忌廉嫂的揮春呢？佢地能夠咁幸福咁好同呢個地方的女主人好有淵源架！
話說當日忌廉哥唔見左，女主人同妹妹都係愛貓人，四出幫手去找，女主人妹妹找左蘋果日報同東方兩間報館，最後東方放左係星期日頭條，就此忌廉哥彈出！
雖然這些一切都是命數，但能見佢地現在咁幸福咁多人錫同中意，佢兩姊妹功不可沒！

呢個女主人都養左隻好得意的TIGER貓架！貓仔好純品好有性格架！

佢個表妹(即係女主人妹妹養果隻貓女)林小姐之前係度出過場架喇！(可睇番呢度)
係乖貓！

佢兩個剛好同忌廉哥同忌廉嫂一樣色，呢D咪緣份囉！

今次叻！有影相，唔多，都好過冇！