俾大訂+睇按揭+睇傢俬

11月中先收樓，仲有4個月時間，有幾個人都講笑咁講，而家個巿咁升法，你摸貨都仲得！

祥益個姨姨文小姐話220冇問題，律師姐姐betty則話好煩，浩浩則話冇幾廿萬賺的話，賣左買唔番，算吧，我地都唔係諗住炒。

*************

今日浩浩請假，一齊去律師行俾大訂，好大的數，$150000, 加埋上次簽臨時合約時的 $50000，剛好樓價的一成。

仲有俾埋 $100厘印，因為層樓剛好200萬，都仲係 $100，但Betty話如果政府覺得層樓係太平，有機會要加番，咁都得？

另外，仲有買賣合約費 $210，但會係最後的律師費 $6600裏扣番。
其實買賣樓宇都有幾多雜費的呢！

*************

雖然仲有咁耐先收樓，但都想做定D野，做下準備咁。

首先係按揭！
一般按揭都只接受2-3個月的申請，我們去問左幾間都真係咁答，但當搜集定資料囉。

有隻新的乜同業拆息掛鈎的按揭利率，好似好抵，但而家巿差就係，遲些就唔知，下次問下ealie先。

但有一間細行好好喎，有個公務員、教職員、醫管局職員、及專業人士plan，竟然做到全期 P-3.25% 及1% 回贈！
應該都會係佢的了，如果到時仲有的話。

***************

跟住去左荃灣睇傢俬，逐間問，但都係一般咁。

我地想係睡房做地台，但好多講法的喎，都唔知邊個真邊個假，又唔知確實尺寸，打唔到價，於是都係決定回去好好搜集資料，同埋度左大概尺寸先。

打俾祥益經紀money，佢又真係幫我地約到業主俾我地上去喎，大概度左兩間房的尺寸，諗下個設計，但唔知找咩人好。