Creme Brulee 法式焦糖燉蛋

呢個超易做，但家中冇火槍，未整過！早前入貨時買左，見得閒就整下！

材料：

此份量是按一盒淡忌廉 200g 的份量計的，剛好整 4 杯仔，原食譜是 x 2.5

蛋 60g ( 1隻大 )
蛋黃 112g ( 5隻 ) @@
砂糖 62g
淡忌廉 200g
鮮奶 200ml
雲尼拿枝 1條


做法：

1) 蛋及蛋黃打勻

2) 鮮奶及淡忌廉，加入切開的雲呢拿枝連籽，以細火煮至就滾未滾狀

3) 離火，加糖，，待溫度下降至80度左右 ( 以防整熟d蛋 )

4) 蛋漿慢慢倒入奶漿內

5) 以篩過濾泡及雲呢拿條

6) 倒入焗杯中

7) 隔水，以180度焗40分鐘

8) 待涼放入雪櫃雪凍 ( 如熱食，可skip此步驟 )

9) 砂糖平均灑在表面，以火槍將表面做成焦糖脆面

完成！

真係好好味！
表面又脆又甜，下面好重蛋味，又香又滑。

人地話可以食完個面再下糖再焦多次焦糖脆面添，不過我冇。:)

但真係用左好多蛋黃，要諗辦法消滅蛋白先！

超簡易榴槤雪糕 Durian Ice-cream

新玩具黎左屋企成星期，都未得閒整，仲有個問題就係雪櫃冰格爆左棚，要先緊D急凍食品先玩得。

今個星期六終於得閒開工！
首選梗係我的至愛 ── 榴槤雪糕！之前係POODLE LOVER度睇到已經流晒口水的了。

星期五晚係超巿買定晒料回來準備開工，點知浩浩回來打開雪櫃時，即時大叫，爭些未哭出來！估得冇錯，佢好怕榴槤！於是只好停工，等佢唔係度先整，但佢又學人，同我一起開始放暑假！咁點算？！

唉，唯有幾最快速度解決左佢！

我上網見到一個據聞都係RACHEL YAU的食譜，我諗係佢幾前的blog，因為好多blog友流傳，但條link冇左咁；再混合埋poodle lover的食譜，加以變化而成。
最重要係SKIP左最複雜的煮蛋的過程！超方便！


材料
榴槤肉300g ( around 啦，400幾g減左核，我又「試食」左少少咁 ) 、
砂糖50g ( 因為個榴槤好熟，我減左糖變40g 左右 )、
忌廉250g ( 呢款 cream 得200g/盒，所幾我只係用左200g )

做法：
1) 把忌廉與糖打至7分起

2) 榴槤去核起肉

3) 用打蛋器把榴槤肉打爛成蓉

4) 將榴槤肉加入忌廉同糖入面 ( 個樣好似 X 記的榴槤忘返！ )

5) 把所有材料略拌勻

6) 放入雪糕機不繡鋼內膽內，剛好是500g！

7) 蓋好蓋，放好電芯，按黃掣開機

8) 放入雪櫃冰格內，3小時可吃

部機會有紅燈仔顯示，會自動開下攪下又停下咁，= 久唔久攪拌令佢鬆軟

但我夜晚整，雪左一晚先食。
雪完打開，入面係咁

用匙刮出來

味道超正！除左豐富榴槤果肉係口咁外，仲比就咁榴槤 creamy 得多！

正到唔想吞落肚！！
不過原來做出來的雪糕係介乎軟雪糕同普通雪糕的質感，好有趣！

呢個10蚊店的靚靚杯仔終於有機會出場了！嘻！

另外，個雪糕匙係買haagen dazs時換的，好得意！

我襯浩浩未起身時，食左一杯，好似做賊咁！
然後其餘的用玻璃密實盒裝左俾爸媽同弟弟吃。

部機用完拆洗都好方便，d膠都易洗。

部機超難找的雪糕機 同 呢個榴槤雪糕都值得推介！

下次我會試下整有蛋的食譜先！
同埋想試芝麻 / 綠茶味！好期待添！

鳳凰酥(二)小成功篇

10-7-2011

太多野想做，但工作太忙，時間唔夠用，丟低左很耐都未來再整我的鳳凰酥，但成日記掛，心思思想再整！

菠蘿都買左2次，但最後都係就咁食左。

終於成2個幾月後先再接再厲！不過其實都好趕，只係係中間逼左兩個鐘整左咋。所以都未盡善盡美！



上次個歸根究底係個皮出事，個餡雖則唔夠杰，但味道好好冇問題，於是諗諗個皮先！

梗係找番引發我要學整呢個美食的鳳梨酥代表 ── 四月貓之家個食譜啦！
終於成功左！

今次個餡因時間關係，用左2罐頭菠蘿，餡的食譜依然係用carol 自在生活呢個。

咸蛋黃都係買惠康的咸蛋而已。

上次松子太碎食唔到，今次就索勝唔切了。



時間不夠，幾樣同時進行，焗松子、咸蛋、糯米粉時，同時煮菠蘿醬，因為要煮很久，順便打埋個粉！幾癲！



酥皮 ( 出自四月貓之家 ，那兒圖文並芧，可去看，所以呢度簡略而已 ) 

材料：

有鹽牛油 210g、糖粉60g、奶粉24g、芝士粉12g、煉奶48g、蛋白汁15g、蛋黃汁15g ( 約=1隻大蛋 )、中筋麵粉300g

做法：

牛油、糖粉攪勻，分次加入蛋黃、蛋白、芝士粉、奶粉、煉奶，用慢速拌勻

中筋麵粉過篩加入，慢速混合，至粉粒黏著一舊便停機，蓋上保鮮紙鬆弛30分鐘。

將菠蘿餡、咸蛋黃、松子包入粉糰內，放入模具約。
( 我沒有很系統的分成小份，只係約略咁各拿小許包 )

放入180度預熱的焗爐，焗 10分鐘，反轉焗3至4分鐘。

嘩，從外表看，今次係成功過上次的！至少件件個面都金黃色，沒有裂！

呢個份量整左足足2盆！廿幾件！

同浩浩試食左兩件咋，第二朝全部拿回學校送晒俾同事。

一人一件，其實仲未夠分，不過小小心意，下次再整多些吧！

好評如潮，唔甜，好多人話好味過台灣果d，哈哈，不過不宜盡信，開心下便好！



廚部老總話料略少，皮太厚，我同意！因為上次裂，今次驚死佢爆，皮較多，但今次呢個皮好黏，唔易裂，下次可以再薄些！

不過我自己覺得呢個皮好脆，有少少似曲奇咁，冇街外買的鳳梨酥咁鬆軟，也沒上次四月貓送我的咁軟，諗番上次個食譜，我估可能我整個皮最後打粉時，用慢速都係太勁，應該試下用手，唔好俾佢出筋，應該會鬆軟些。

同埋罐頭菠蘿同新鮮菠蘿的味真係差好遠！唔懶得！



唔緊要，我會再整的！我打算全套再做，即係由再醃咸蛋開始，哈，即點都係個幾月後的事了！

松子鳳凰酥(一)失敗篇

14/5/2011

之前整左一次松子鳳凰酥，但失敗左，失敗在個樣唔靚，個皮有些裂，但個餡係好味的，不枉我第一次開鮮菠蘿來整！個咸蛋係自家醃的！

食譜步驟連圖好詳細，carol 自在生活，所以我就不再詳加寫了，反正相太多，略記便是。

我想說呢個野，材料多，功夫又多，要的時間都唔少！
但真係好正，所以我有再整，仲諗住繼續試到完美！幾大魔力！

《松子鳳凰酥》

材料：
-> 菠蘿醬
       
新鮮菠蘿400g、砂糖100g、麥芽糖1湯匙、無鹽牛油50g、糯米粉35g
-> 鳳凰酥餡
         菠蘿醬240g、鹹蛋黃3個、松子3湯匙
-> 酥皮
        無鹽牛油120g、糖粉25g、全蛋1個+蛋黃1個、芝士粉25g、奶粉20g、低筋麵粉150g、中筋麵粉50g



做法：(簡略左，詳細請去carol 自在生活自己睇)


鳳凰酥餡：

部份材料

糯米粉，160度，12分鐘，烤熟，待涼備用

菠蘿切碎，連汁加糖，小火煮滾

加入麥芽糖，小火煮至濃 ( 要很濃稠，都幾耐 )

加入牛油，煮至起大泡

分數次加入糯米粉，令它變成可搓的餡團

不過我呢度唔夠濃，所以餡太軟，好難包！

咸蛋黃灑酒，160度，12分鐘，烤熟放涼，切碎備用

松子，160度，10分鐘，烤熟

松子放涼切碎備用

松子放入菠蘿醬拌勻

鳳凰酥皮：

牛油解凍切小塊打成cream狀，分次加糖粉、芝士粉、奶粉攪勻，再把蛋分次加入

中筋及低筋麵粉過篩加入

用括刀按壓的方式混合均勻，免出筋，口感才會酥鬆

將酥皮及餡分成小份，酥皮包入餡醬及咸蛋黃

放入模中，放入已預熱170度焗爐焗10-12分鐘，翻轉再焗10分鐘至金黃色即可

得十幾件，外表有些都幾靚，但有些個表有裂口，應該係因為上面入爐前已經有裂痕

但入面個餡正到嘩嘩聲囉！尤其個咸蛋黃，漏晒油咁！菠蘿味又好出！
但松子切得太碎，食唔到咁。

送左幾件俾分朋友同家人分嘗，個個讚，不過我諗係佢地唔覺得呢d野可以自己整咁解吧。