訂酒席

55屆婚紗展

最後一天終於就到大家都得閒，都好的，婚紗展最後一天通常多D優惠的。

話說早上睇完樓後，浩浩12點幾係會展隔離的體育館有比賽，練習加比賽都玩到2點幾，佢仲講下MC6時的事比我知，又幾難忘同有趣的，我會咁講因為我唔係現場囉，但要訓街冇屋企番仲成日食蕉的佢應該唔同意我呢個形容囉。

跟住過去展場

同幾年前我們去過的一次一樣，人山人海囉，什麼金融海嘯、經濟不境等都不適用。

本來諗住慢慢行一轉拿下宣傳，然後先去訂酒席的，但實在太多人，於是索勝直接找彩福的BOOTH去。對，睇左咁多間酒樓後，無論價錢、地點、場地等都係佢比較合心水，又上網睇左D人可以有D咩優惠咁，我地又去睇下可以爭取到乜優惠。

去到有個姐姐介紹我地坐，問我地心水係邊個場地同日子，我地話利舞台，但日子就未定，佢拿本簿俾我們看，10年9月至12月的六日都全滿，除左重陽節外，仲有網友原先話讓俾我的重陽節翌日星期日，雖然我們都冇乜所謂，但重陽節又未免太過份了吧，無謂俾長輩話丫，同埋星期六會比較好D，夜左第二天都可以唔使番工住。

我其實想遲多少少，11年會多些時間慢慢準備，但佢11年的菜單要再加多每圍400，我又覺得唔抵，明明食一樣的野做咩要俾佢食喎！

跟住諗不如就學校假期，我又唔使請假，浩浩話佢都唔怕熱，咁都好，一係聖誕一係暑假。但想到要就教會行禮，都係要星期六日假期人地先得閒來的，最後見有12月24日平安夜( 紅日，但唔係星期六日)或者7月8月暑假。

一來擔心平安夜人地唔得閒來飲，二來擔心咁的大日子教會有活動找不到禮堂，於是都係決定暑假。而暑假普遍由7月中開始，7月放2個星期，8月放1星期左右，又想預些時間俾我們自己放假預備下先，之後又可能可以去一去旅行咁，於是選左7月最後一個星期六，7月31日，就咁決定左。

其實那天係個朋友莊靜茹的生日，但冇法，如果早一個星期同遲一個星期都可能太趕，於是就咁決定！

 

其實諗日子的同一時間，我地都發揮我們講價的能力，其實都唔係點講的，我覺得都合理的等價交換而已，例如有些我們唔需要佢送的，咪同佢換另一些我們想要優惠咁，無法啦，呢筆數實在係最大的數，佢的上落係最大的開支囉，一圍差少少咁多圍係差好多的了。

起初個姐姐仔不停要將我們的要求轉達再回覆，回來答的佢自己都有些唔好意思講，跟住我們話不如找個話得事的來講吧，換左個都幾快人快語的小姐，都好的，總之因為呢個淡季的日子我們爭取到唔少的優惠，都算滿意而回。

 

呢個場暫時有我想要的靚靚場地，也有浩浩想要的好味菜式 ( 有可口可樂的 )。

 

我同浩浩的大日子！

2010年7月31日

銅鑼灣彩福皇宴

仲有唔夠一年咋，好快添！

不過因為佢有個什麼加1蚊升級菜式的優惠，用一次呢個優惠便要即場買一打壽包，而我們因為爭取到2款佢做的呢個優惠都加，所以合共要買2打壽包！

2打=24個壽包！

望住24個壽包，竟直係超幸福啦！

 

離開呢個展檔時，竟然撞到雪怡同ALAN，呵，世界真細小！

佢早我地一個月咋，又係彩福，不過係始創那間，真好，到時可以有商有量！

 

 

彩福送左都幾多COUPON，當然有些係唔會用的，但有兩個真係幾抵，一個COUPLE公司自己造的城堡動畫，用自己的相製的，都幾有趣！尤其我們影左相，整左先無妨。

另一個係張專業製作的易拉架，都好呀！

浩浩唔舒服，我們都冇乜點行添，去左AMAZING GRACE睇GRACE的相，係咪真係咁好，UM....我又覺得一般姐，算罷。

仲有張法國婚紗的COUPON，心思思想影多輯架，但上網再看看先，反正不久後又有婚紗展的了。

 

回去又睇樓，晚上我地去左樓下的「好日子」食飯，對！今日應該係我們的好日子！

諗起都開心！