傢俬完成後記

搞到昨天先至收齊晒D傢俬！

話說只係做3件傢俬：地台床、書桌、書櫃

睇番日子
25/10/2009 落訂
26/10/2009 度尺
29/10/2009 傾款式，四星期後送貨


27/11/2009 準時送貨，沒有遲，很好！

之前一晚我地清潔好晒，浩浩放假收貨，第二日我地去出血掃貨回家先睇到情況。

首先個地台，出來效果幾靚，儲物量夠大，離天花都仲有好遠距離，窗台條樑都唔係會好有壓迫感，證明我地的設計唔錯！


但床係頭尾靠牆，一邊靠窗，餘下一面有個衣櫃咁，但佢大概膽心太大入唔到 / 度尺唔準，於是長同闊佢都同我預鬆左成1-2吋！令到中間有空位唔FIT囉！留條隙俾我做咩呀！藏垃圾呀？但都算，因為放左床褥其實睇唔到的。

跟住個書櫃，成個幾靚，青BB囉，好實淨，塊玻璃都幾靚，我最擔心的邊位都貼得唔錯，一塊過反射埋出面的風景好好。

但頂上的邊撞花左成條痕，佢係咁宜用油補番便算。

最大問題係個書桌！

第一我地原來係話成個面係綠色，上舖透明玻璃，我專登找番張稿睇都冇問題，但點知佢幫我玻璃的位置油左白色，即係好白痴咁圍左條三面的綠邊！邊有人咁聰明架！

跟住佢原來話避地腳線，但我後來諗諗下諗起靠窗台那先有條邊，我專登上網找人地的相PRINT出來去同佢講睇點 (當時未收樓 )，佢同我設計上面面板向後凸出一吋便可避晒地腳線同窗台咀，又幾叻喎！就咁決定囉！

但送來時，我發現佢面板真係向後凸左，但兩邊側板竟然一起凸埋，咁淨係背板凹有乜用呀？！一樣頂地腳線又頂窗台咀，真係頂囉！

仲要旁邊同我撞到花晒、甩晒灰咁！

我份人都易話為的，唔係過份都算，但咁冇理由收貨囉！

浩浩話佢俾左D油可以補番！咪玩啦！

29/11/2009

同浩浩一早衝左落去傢俬舖！

擺晒款，扮晒惡 ( 其實都惡唔出，但一定唔好相與，追究到底款 )，仲拿埋相機影晒相俾邱生睇。

一開口問佢：「搞乜？！」

佢賴晒送貨唔小心，整花咁，書桌隻色係間廠唔跟指示誤會左之類，跟住我俾佢睇D相，同佢講書桌側板的大問題，佢話佢都唔知，一係找人即場去幫我整番，咁我話面板的色咁點，佢話唔可以即場油會唔平唔靚，一係換塊有色玻璃我，我話咁條邊點？我話不如貼條玻璃條、貼鋁片等等，佢聽聽下估我唔肯算，於是同我講不如收番張書桌上廠搞番掂佢！
梗好，但要十日八日囉！都冇法架！唔通算咩！


全程邱生都好好聲氣，我見佢都負責任的，算吧，只要佢跟得番俾我，我都算了。

也可能因為地舖有客係度，唔敢點亂來吧。

另外我地仲訂多左個地台腳踏，因為覺得張床太大，一級好細，也太高，多一級會靚D同感覺會平衡D，也可放多D衫。

都有諗仲同佢訂好似好笨，但幾百蚊佢知晒呎寸，而且那個腳踏佢其實做得唔錯的。
造多個矮的，加埋灰玻璃面，$600，唔連訂都唔收我了。


30/11/2009

晚上便找人來收左個書桌了，很快手！



1/12/2009

回去對住幾件傢俬諗諗下，發現仲有件事，就係書櫃的層板可移動，但按佢的孔移完都放唔到FILE，當然可以拿走一塊，但咁又唔實用喎！

解決方法很簡單，只係加多D孔便得，但佢冇一早幫我諗好，係佢疏忽唔細心囉！
講明我主要用來放書放FILE的嘛！

於是放工去同佢講。
另外書桌反正都收左要執色，不如索勝要全白，我地都唔係咁中意原本隻綠色，邱生超好人咁一口應承，安樂晒，等收貨。但佢話因為要上大陸，點都要十日八日，是但啦，但我講明等佢執野囉！

16/12/2009

送貨了，3個男人送來，浩浩去踼波，得我一個收貨。

係門口拆開，一望已唔知唔對路，仲係有青BB的綠色？
但佢其他幫我執番好晒。
另外那級腳踏都好四正。
本來都諗好唔好將就下便算，但又冇理由講左當無件事的嘛！


於是講話唔係咁的喎，佢地俾將單我睇又真係冇叫佢地整顏色，咁我咪找番D文件打俾邱生囉，佢冇人聽，打去舖頭話放左假，好彩個上次見過那個寸咀姐姐仔問我乜事，我咪講番囉，佢話轉頭覆我。

跟住我便聽到師傅電話响，其他人不停話都幾靚丫之類，想我收！
我又請佢地幫我執埋個書櫃層板，佢地又唔知咁，幸好都有工具，又肯做。

唯有見人講人話，話知唔關佢地事咁。

個姐姐仔唔覆我，我打去佢話係個廠唔知做乜無做，咁我話點，佢自己主動話一係咁再送番廠再整囉，我即刻話好，即場收走書櫃。
師傅梗唔好面口啦，仲要幫我整野，但我見佢地幾好心機，找左個腳踏600後仲俾左茶錢添。

我又唔怕佢間野走我數的，我黎緊放假，日日去嘈佢都唔得死！

  

 
加多左幾個孔，最厚的FILE都放到。


24/12/2009

浩浩打去問幾時送到貨，話26喎。

26/12/2009

真係如期送貨！
今次真係好靚仔，乜都跟足晒，連初初邊位撞花的都整滑晒，完全見唔到有痕！

好，一開始咁咪好囉！

都係白色穩陣順眼好多！放兩部電腦非常好！

我超中意的紫色襯白色睡房！5呎闊床褥，左右仲有1呎半邊位。

放左超勁厚床褥樓底都仲OK，我同浩浩企上去都未掂到天花。

加左級樓梯感覺平衡D，少少玻璃點綴同高低層次有少少變化。

清清最開心，成日睇街同訓覺！









總括來說：

1) 呢間野個邱生都OK的，態度好，即使有問題都肯負責。

2) 準時，如果唔係我唔收貨，佢次次都真係準時送到貨的，唔會拖。

3) 質素就一般了，我諗簡簡單單的佢冇問題，一定做到，我地起初都係要簡單款，基本上佢都做到晒。但一有QK小小的位，如避乜位等等，要準確度高的話便唔好預佢，相信係佢寧願鬆都唔想FIT到入唔到。

顏色也是，最BASIC的黑白灰最穩陣，隻綠色本來諗住有些生氣，但差些出事。

同埋宜家訂造全部係大陸做，始終個師傅唔會見到件貨，好難跟足，加上送貨的又未必識小心，有可能會撞花之類。

4) 訂造傢俬，樣樣一定要自己跟足D、上心D，有些細位師傅來睇過度過位都未必諗到。同埋要夠惡，有事一宜要據理力爭，朋友仔曾經試過遲收貨可以平D補番添！仲叻！