我的私花園 ( 香草情況與腳架試用 )

腳架買左一段日子，出外影過兩次咁多，係屋企反而未試過，今日見天氣好好，做完每星期一次的大清潔後，拿左個相機出來影下，順便報告下香草的最新近況。



今年冬天似冬天，凍得夠晒耐；春天又似春天，濕氣好重 ( 睇下現代要有正常的四季幾咁矜貴？！ ) ，難得有陽光，感恩！把聖誕放到元宵都過埋的燈飾收起，明年再用。

近日添多左幾棵小植物添，越來越多綠色，好開心！

左起：青松樹 ( 似乎唔會大又唔會謝的了，日日一樣樣好似膠盆栽咁 )
中間：香茅 ( 不停生高，但有少少枯葉咁，爸爸話可能盆太小太密集 )
右面：香花芫茜 ( 幾個月終於由種子長到成形，但得一棵，有排都未食得囉！仲諗住打邊爐整個香茜湯添，都唔知何年何月先得！)

左： 蔥 ( 由3個根長到8-9棵，已經恨心剪掉幾棵，但依然生得超快，不過好幼唔似街巿果D咁粗，大概都係盆太小太密的關係吧。)
右：蒜頭 ( 超巿買的蒜頭好快發左芽，所以索勝種埋佢！都粗生喎，不過爸爸話我笨，應該分開一粒粒種，唔係成個放入去！)

番完教會係九龍城間日本城新買的新寵！

左：百里香 ( Rosemary ) ( D葉買回來時有少少枯枯地，但得一棵即管試下，澆水晒下佢，一星期枯葉差唔多冇晒，應該救得番。但咁細棵，有排未食得！ )
右：薄荷 ( 終於找到佢，有香味，不過要好近先聞到 )

之前驚艷開花的九層塔！
但有經驗人士話我知開花後會即謝，好驚，於是動手術剪晒佢的花，不過剪極都不停咁出花！同埋葉都開始冇之前咁茂盛，唔知係咪敗狀已成？

宜家剪左一條枝浸水，睇生唔生到根，生到用就唔使重新種過，否則可能試下拿上次曬乾左的花重新種過。


其實好多工程等住做，例如加泥、分散D植物 / 分盆等，找日得閒整整先！



另SET好腳架，係露台影左幾張黃昏同夜景相！

加左腳架真係唔同D，扮下人地D樓盤廣告先！嘻！
當然好多樓的景靚呢度多多聲，但自己屋係有感情又唔同D的，點捨得搬。

本來下面個巴士廠位置講左會起大型運動場，但搬入來年幾都未動工，未夠期收番塊地吧，點知最近有建議改起荃屯鐵路總站 ( 其實之前提過，但否決左，宜家舊事重提 ) ，其實真係唔多想，雖則近地鐵會升值好多，但唔太中意屋企附近太旺的感覺。不過諗多左吧，沙中線人地都講十年先起得成，屯門都唔使擔心太多了 。

參考新聞
http://hk.myblog.yahoo.com/chan_wan_sang/article?mid=1319
http://hk.myblog.yahoo.com/chan_wan_sang/article?mid=3560
http://orientaldaily.on.cc/cnt/news/20090412/00176_015.html
http://orientaldaily.on.cc/cnt/news/20110207/00176_008.html?pubdate=20110207