北菇滑雞煲仔飯

玩個煲玩上癮
不停想試盡佢的function
因為真係覺得佢幾萬能

****************************************
今日又借D意整煲仔飯

《北菇滑雞煲仔飯》

材料：
米、雞脾 ( 樓下惠康pack裝 )、冬菇、薑、蔥

做法：

1) 雞預早調味奄一陣，浸冬菇，薑蔥切絲。

2) 洗米，加水中火煮至起泡，開少少蓋 ( 今日用22cm，但都有少少泡，不過煲米有少少泡應該係正常，因為以前用瓦煲都係咁，所以開少少蓋走少少蒸汽便冇事 ) ，轉小火煮至飯面出現「眼仔」洞。

3) 冬菇同雞飯面，加薑蔥。

4) 煮多15分鐘，焗15分鐘。

5) 加甜豉油同噴少少油上面。

完成！

加埋烚豆苗便開飯！

軟軟的飯好好味，我食左2碗，浩浩3碗！( 唔好意思，我地真係大食左D )
清晒底！

賽後檢討：
-- 今次的飯都係濕左少少，雖然浩浩話佢中意「食軟飯」( 滴汗 ^.^ " )，但我覺得水仍然可以比平時用電飯煲煮飯再少一些。
-- 冇飯焦，也可能是水太多，同埋用小火煮同熄火焗的時間可以再長一點。
-- 冬菇也因時間關係未軟得晒，有時煮好野食真係唔可以貪快的。

仍是那句：繼續努力

*************************************

上星期齋用佢做左成個晚餐，差未煲埋飯
先番熱牛腩 ( 炆 + 煮 )
煮雞翼 ( 半煎炒 + 焗 )
白菜 ( 烚 )

一個煲咁多功能
雖則貴些
但乜都抵番晒

26CM LC 試用 ── 蕃茄魚湯邊邊

呢個LC第一次用竟然係打邊邊！哈！大材小用吧。

不過如果OK，可以掉左個邊爐鍋，慳番D位都係好事。

本來諗住滾個湯的，浩浩話不如滾個魚湯做湯底打邊邊，其實我地都好中意打邊邊的，好味又方便。

順利成章，買條大眼雞，下油熱鍋，煎薑片，魚洗淨拍生粉，下鍋煎。

煎魚最考耐性，有人心急反魚，所以都係失手左少少。不過魚皮是魚佬剝的，所以都唔算失得太嚴重，只係少少唔靚，少少黏底囉。

跟住入煲魚袋，加蕃茄薯仔，另加水煮45分鐘做湯。

媽媽話魚湯一定要煎左先會奶白色，我地有，但都係唔得奶白。

後來找番原因，係因為我地太小心錫住個煲，太乾淨，煎完魚驚佢黏底洗左個煲先再下水煮湯。冷水係會冰卻左D蛋白質，變唔到奶白色的，噢！

算，下次就咁下熱水煮便得，再努力吧。

不過今次做湯底都好OK，每人飲左碗先開始。

22CM LC 試用 ── 清湯牛腩河

諗左好耐煮乜好，最後都係選牛腩，因為應該係最發揮都個煲的功力。

拿出本「小菜王」，找左幾款牛腩的食譜，浩浩最後選左「清湯牛腩」。

牛腩好似應該配河粉，於是第一次整「牛腩河」。

賣相一般，不過都幾好味，但我覺得可以再好d，期待下次再玩。

************************************************

趁佢去打波，我去買料，但原來牛腩一D都唔易買，唔知點解，最近牛肉的舖頭少左好多，而且相對豬肉，也很貴。

買左下列材料：

1) 牛腩 -- $48/1斤
2) 花椒八角 -- $2/包，各一
3) 白蘿蔔 -- $6/1斤，北京，幾甜
4) 洋蔥 -- $4/1個
5) 蔥 -- 買蘿蔔問阿姐取的
6) 薑、蒜 -- 早幾日煮完飯，家有存貨

做法：

1) 牛腩洗淨，汆水，洗淨；蘿蔔去皮切件待用
2) 下油，燒熱鍋，爆薑蔥蒜同洋蔥

3) 牛腩略炒

4) 加水、花椒、八角、冰糖、蘿蔔，中火同煮

5) 滾後轉小火，煮30分鐘，熄火焗15分鐘，完成

炆牛腩的秘訣在於唔好死炆，炆下焗下，可以再炆再焗咁，呢個鐵鍋保溫焗便最好，只係時間關係，都冇再番炆，焗的時間也很短，所以仲有進步空間。

 

6) 河粉反而唔識煑，就咁滾水放煑熟，另上。(但似乎太熟，淋得濟！)

廚房爐頭好忙碌！很久沒有3個爐頭一齊用了！

最近成日想煮野食，我要重拾當年我的小廚神稱號先得！呵！
近年冇以前咁常煮野食，退步左很多呢！

改裝 LE CREUSET

上次番深圳專登去找呢粒「的」，ready 改裝。

改裝前：

改裝後：

呵呵！

我覺得靚好多！

其實人地個不鏽鋼「的」的用處係讓個鍋可以整個入焗爐，因為個膠「的」唔可以超過180度。


之前就係係美國網頁見到呢SET野，愛上左白色系列！

露台BBQ慶中秋

嘻



早前買左個小型BBQ爐諗住中秋黎個2人露台BBQ
但點知天文台話會打風暴雨，咩興致都冇晒，昨天心血來潮諗不如趁未下雨，早些燒吧。

於是6點先駕車去新墟凍肉舖買野食，仲好好彩泊到係凍肉舖門口添。


先買食物，順便取埋美食節買的大班冰皮月餅，當然唔少得紙花燈啦！

仲買埋貓糧，貓貓都要賀中秋，呵！




回來浩浩整野食，我 SET 場 ( 即係搬開露台 D 衫，執野，拿個爐出來咁 )，後來浩浩也出來幫手舖地、起爐，我又去準備醬料、蜜糖等。

不過起爐唔順利呀，跟爐一起係吉之島買的 $ 10 環保炭，加左炭精都着唔到，明明燒都紅晒都著唔起，激死！仲諗住佢可能貴D會靚D，少煙D咁添！

諗起以前廣州公公家的煤票同煤爐


最後落樓下惠康買包炭球回來，即刻唔同晒，即著。不過浩浩話懷疑佢表層有炭精，起火起得好勁，然後好快燒完，唔知，不過佢係我燒咁耐野食最好用的炭，也是最貴的，不過點都好，起到便好。至多下次買番最普通的炭，不過今日惠康都冇呢款賣。

火紅得好緊要




佢負責燒野食，我掛下燈籠、取野飲、拿紙巾、抹布咁，仲有食野，都好忙。

拿左個車太陽檔來做風檔，呵，本來是用來封頂的，幾聰明的我！


是日餐單有：

1) 雞翼 ( 突然起意，所以只係買奄好左的咋 )....不過不失啦
2) 牛扒 ( 奄左的 )....又幾好味喎，嘻，仲有格紋添，因為係塊網上燒
3) 大頭蝦仔.....原味燒，肉地好，膏都幾多，但急凍味差少少
4) 帶子....自己牛油蒜蓉，OK
5) 腸仔....BBQ必備
6) 菇菇包.....都係牛油蒜蓉....浩浩至愛....但食唔晒
7) 方包.....自製蒜蓉牛油，好正，不過太飽只係食到 2 塊
8) 棉花糖.....一早買定的，但食不下，冇開到

嘻，好開心，好滿意個爐呢，不過浩浩驚薰黑個天花，所以冇放高佢 ( 但其實應該唔會 ) ，坐小椅子燒，張長木椅用來放食物，下次其實可以轉個方向，背向廳，應該會好D添。



*******************************
後記

今早起身清潔，把露台抹乾淨，洗番個爐下次用，浩浩發現左我地忘記左放墊炭的隔，呵，點解會咁的呢？

FACEBOOK 浩浩表妹同濤的回覆好搞笑呢

九龍城浸信會大佈道會2010

教會一年一度佈道會又黎了

誠邀大家去聽下

未信當講座聽下也無妨呀

時間今個星期五、六、日，每晚19:30開始

嘉賓有正生書院校長、關心妍，同音樂家黃愛恩

教會網頁：http://www.baptist.org.hk/b5_index.php

佈道會資料：http://www.baptist.org.hk/download/index_pdf/20100917-19B.jpg

LE CREUSET 保養

買左幾隻貴煲同鑊番來，未用過全鐵廚具，驚佢生鏽，也擔心佢的琺瑯表面俾我整花，到時實心痛死，所以好乖咁睇說明書先用。


英文都係睇番佢網頁，都好詳細。

FOR COCOTTES

FOR GRILLS

其他系列的使用方法


另外中文就係 YAHOO BLOG見到有位朋友( 貓姐 )寫得好好，問過佢也放埋佢條LINK係度。

【認識 Le Creuset】

LC中文的網頁我反而覺得太長，但都可一看

如何正確使用及保養Le Creuset琺瑯鑄鐵鍋具?

深圳Le Creuset

找尋LC的途中，上網去左好多網頁，發現LC係唔同國家有唔同的產品同顏色，相信是配合當地的煮食同喜好而定的策略。

而且會有呢個地方唔好賣就轉去另一個地方當限量品賣咁，於是造成網上代訂、郵寄、出遊購買等，對於唔熟經濟學的我來說，呢D都幾有趣。




言歸正傳，找尋LC的活動包括去唔同國家的LC網頁閒逛，( FIREFOX有自動翻譯服務，唔同語言都好方便。)，發現原來大陸都有LC專櫃，而最近竟是深圳。

大陸專門店地址

最重要佢有唔同的貨，咁近即管去看看。



星期日北上按摩，順便去大劇院站附近「萬象城」逛逛，呢個商場高檔得很厲害，一點也不擔心是假貨。

專櫃係4樓，原來是一間叫「生活本色」的百貨店入面，全部賣進口大牌子廚房野，時間關係，只直衝LC位置。

COUNTER同SOGO差不多大，也是一貫的色彩繽紛。

因為有目標而來，故略略看了一下，便問SALES我要的東西有沒有。

就是想買呢個：

68人民幣 / 個，買左兩個。




仲想睇下有沒有放蠟燭的鍋墊，但冇，得正常款，但唔平，$8xx，冇買。

竟然見到好多古典玫瑰的粉紅色煲，不過同香港差唔多價，冇特別平，但勝在有。

總括來說，cast iron 貨同香港差唔多價，唔太特別。


反而 stonewares 就平過香港。一對咁賣都係百幾至二百幾，當然又唔夠開倉平，但我搶唔到，都唔排除遲些番去買，有一對白色心心、粉紅色心心都幾吸引。

影得唔係好清，姐姐話買6件仲照價再65折添。

呢個係純白色的，燈光下變左色，不過我對佢左面的不鏽鋼蒸架有興趣D，網頁寫有20同22CM，夾番之前買的22CM煲剛好。

另外矽膠野都有，也平少少咁。

今日同浩浩一齊，佢又趕番來打波，冇仔細睇同格下價，有機會一定再去睇過！



同場加映STAUB！
漸變綠同漸變橙都靚，我冇仔細研究過，但香港我未見過，唔知係咪特別版的呢？