Le creuset 開倉

終於買到了！

****************************************************************

4/9/2010

星期六自己放左半日假，同浩浩搭平時番工架村巴出銅鑼灣，8:15到達酒店function room，已經有40-50人係前面排緊隊，full左半個hall，浩浩去食早餐，兼外賣俾我，跟住拿出我地準備的娛樂工具──iphone同psp，上下網睇下書咁，好快便過。

 

除左好多女人之外，真係仲有好多鬼、日本C9的！同埋d人好厲害，有齊車仔、風扇、凳仔，開倉排隊三寶！

10點正，準時開始放人入另一個function room，我們成功係第一批入，個氣氛好似衝閘搶貨咁，哈！有些想笑！

 

但也驚驚地搶晒 / 冇我地想要的煎PAN，四圍咁找，煎PAN.....32CM....點解淨係得26CM的？應唔應該拿住先呢？會唔會一陣連呢個都冇架，但26CM又有圓同方......好迷惘！要係短時間決擇！又要熟佢的貨！到底係邊？個個好似見貨就拿咁，係咪真係咁渴求呀？又找唔到人問喎！不如分頭行動，但其實入面唔大，D人湧來湧去，好似老鼠仔囉！

呢張係回來見人地個blog借來的，就係咁的房仔。( BLOG from Happy Everyday, thx sharing )

終於找到要找的 32cm Rectangle Skillet Grill Pan，得米白色，冇之前見的水藍色，不過都好！白色我不嬲都中意，只係擔心佢會燒黑，但其實其他色都會吧，況且$780咋，原價$1688，sogo平時都賣$1399，冇理由半價咁濟唔買，款緊要過顏色！

順便看看有冇其他野合用，煲唔諗佢，矽膠掃、刮等又好似一般，d盆、碗好靚，但又好似冇乜心水要買佢，同埋佢重，我地個焗爐未必承得起，算，俾錢。

臨排隊時，浩浩笑說呢個係咪一個商機？！應不應該碌爆張咭去掃貨炒下呢！低能仔！得閒諗D咁的野！

第二個排隊俾錢，幾個人問我地得一件貨？好奇怪咁！應該冇乜人咁排隊去買一樣野囉，呵！

不過其實d煲、碟的顏色真的好靚，尤其青檸色、粉紫咁，好彩唔合心水咋，否則一定大出血。

俾埋錢出來先10:18，第一個踏出門口！

 

好開心！浩浩把個pan放入背囊，影番兩張相留念先。

 

個pan就係背囊入面，輕番隻手可以拿傘。

出來見到唔只個function room full晒，一直兩層樓梯都排滿左，再上大堂，出去酒店門外圍排左半圈，d人仲陸續有來囉，好彩早到，早起的鳥兒有蟲吃，好彩做定功課！

回家影番兩張相去午睡。


起身先去開鑊，呵呵。

幾時先得閒來個使用大典呢？

****************************************************
回來睇左好多資料，原來呢個款唔係咁多國家有得賣，米色直情冇咁濟，平時也少見，最hit都係紅、橙、藍等，近年多左好多好靚的色，令人瘋狂！

如果佢唔係咁貴，我又冇乜位，我都可能掃左先算。

我最中意係粉紫，但好似得連卡佛先有，白色都好靚 ( 越睇越中意個白色 pan )。

****************************************************
1/9/2010

今早睇報紙，知道le creuset終於開倉了，今個星期六第一天，本來諗住開始第一日好似平時番工咁出去等，唔使等咁耐，又有多d選擇，但呢個星期六要開始番工了，放工都一點，唉，好唔開心添！激死！

LE CREUSET開倉低至兩折

日期： 4/9-10/9
時間： 10am-6pm
地點：銅鑼灣怡和街 88號富豪香港酒店低座 2樓（聚賢一廳）
查詢： 2790 1606