香薰園半日遊

成個復活節假期除左頭果幾日好有作為外，之後都係混混呆呆的渡過，因為浩浩大病左一場，我每日煮野佢食，其餘時間就上下網、玩下貓、種下花咁，幸好我放16日，佢係最尾果6日都一齊放，不過就病晒囉！所以邊都去唔到玩，連計劃左很久的露營都告吹左！唉！梗失望啦！



我地去得最多的地方竟然係露台！

就係咁坐係度，有時吹吹風、透透氣，有時看看風景看看花，有幾晚半夜訓唔著坐出去發呆傾下計咁，如果唔病都幾浪漫的。


有日佢仲陪我出去喝茶！可能知我悶吧！戶外桌上吃茶點喝茶，幾寫意！

呢D先係理想放假生活喎佢話，即係終日留係屋企訓覺同食！除左病喎！鬼唔知咩！佢話訓到腰骨痛！可見佢病得幾厲害，一日要訓十四個鐘的人都話訓到怕！



天父好公平的，或許真係時候叫我地要注意健康，唔好太放縱亂食野，病左乜好野食左都冇味，真係好慘！



*********************************
最後一天本來天文台話暴雨的，都冇諗住會做D乜，點知早上又見佢放晴，浩浩又好番少少，精神唔錯咁！


於是駕車去左我想去很久的香薰園，係粉嶺八仙嶺郊野公園鶴藪附近。
網頁地圖

駕車去好方便，一直入便見到，門口有大型免費停車場，入面除左花之外，仲有餵山羊、BBQ、羽毛球、網金魚、龜池、摘士多啤梨、粟米等活動。





當然，我地冇小朋友，重點只係薰衣草同士多啤梨！

果然沒有失望，好多唔同種類的薰衣草同影相勁靚的大片鼠尾草，狂影相！呵！
不過失策沒有腳架，好彩好多人影相，求其叫人幫手都好易，影左兩張都好靚！

有靚相就超開心滿足的了！整個行程已經圓滿！

浩浩的技術似乎有進步！嘻！

我地仲去左摘士多啤梨，不過真係玩下而已，入場費每人10蚊，出來可用番來買士多啤梨，士多啤梨$70/磅！唔好去搶，人地有D係20蚊入去任食的！不過我地見好多菲傭摘好多出來吃，佢地有米過我地！勁！

拿住較剪仔同籃仔入去幾塊田入面，睇O岩又紅又大又靚先剪！真係好好玩！左翻右看，好玩過學校復活節尋蛋囉！我地都玩得咁開心，小朋友一定仲歡喜！呢刻真係好想有個玩囉！

不過天氣真係好熱！玩左兩個鐘已經濕晒！

食埋碗豆腐花就走了！

D士多啤梨粒粒都靚到好似假咁，梗係啦！全部精心挑選的喎！

買左盆薰衣草回家添！冇花，就咁聞冇味架，但用手摸下佢會有好香的薰衣草香，好神奇！當佢香草咁種，襯番我個香草園！嘻！

願病菌快走，健康永伴！