初試自家製燒肉

其實係整叉燒前，諗左好耐整叉燒定燒肉好的，結果其實兩樣都整左！哈！幾貪心！

燒肉食譜參考地球人同T&P的做法

材料：

有骨腩一件、南乳半磚、紹酒、鹽適量

做法：
1) 南乳、紹酒、鹽，醃有骨腩； 以剪刀先把豬皮界成格方便焗完切 ( 地球人諗的，好聰明！不過好難界，最後用左剪刀剪！ )
2) 用大量鹽鋪滿豬皮，不用保鮮紙，放入雪櫃五小時抽乾豬皮水份
( 因為舊腩太細件，要用野固定個位，D鹽先舖到豬皮面 )

3) 將豬腩肉從雪櫃取出，刮去豬皮上的鹽
4) 在豬皮面滴上幾滴油，塗勻豬皮 ( 我唔記得左！)

5) 豬腩肉放鋼架，入焗爐，皮向上，盆下放水。

6) 用上火 220C 烤至豬皮成芝蔴皮，約8 分鐘

7) 轉用上下火 180C 焗大約一小時至熟。

斬件食得！ ( 冇影相AGAIN！)

不過唔成功囉！

檢討
1) 太咸：豬皮面的鹽未抹乾淨
2) 皮只係小脆：放雪櫃唔夠時間，同埋唔記得抹油！


不過肉質好味，可以再整的！
下次改善下再試先！

叉燒三弄

好似好難的野食，其實冇諗過自己會整到，上次去le creuset學左回來一直懶未整，今個星期的起心肝整左，味道唔錯，但肉質有點實....於是死心不息，找來另一個食譜再接再厲！終於成功左！超開心！

方法一：( receipt from le creuset cooking class )

材料：

--半肥瘦梅頭肉半斤、
醃料：生抽、玫瑰露酒、砂糖、蜂蜜、叉燒醬、薑汁各 1湯匙，胡椒粉少許
汁：水 125 ml、蜂蜜 2湯匙

做法：
1) 梅頭洗淨，抹乾　用醃料醃15分鐘。
2) 燒滾水，放竹撻，下肉及醃料，蓋好炆15分鐘，至多泡。

3) 開蓋，轉小火，塗蜂蜜於肉的兩面上，蓋好每邊再炆約3分鐘。
4) 汁開始收濃，倒出蜜汁留用，繼續煎煮至有微焦效果。
5) 切片上碟，以蜜汁拌食。

個汁好好味，焦位OK，味道都唔錯，不過肉質稍為實，同埋煮的過程要不停睇火，有些煩。





方法二：( receipt 以 T&P 的稍作修改)
呢個食譜最好味！又易整！


材料：

梅頭、叉燒醬 2湯匙、生抽 1湯匙、紹酒 1湯匙、麻油少許

做法：

1) 梅頭肉洗淨抹乾，用調味料醃兩小時

2) 放入 200度焗爐，每面焗十五分鐘，完成

(初初就咁入去焗，但D汁浸住舊肉，點都唔脆，於是加個蒸餸架墊起，得左！)

靚靚！口水流！焗的方法汁會保留多D，好JUICY！

成功後，得幾件，爸媽同我分黎食，浩浩冇得食，於是第二日放工再ENCORE！

但夜了，買唔到新鮮梅頭，買左件急凍的。

當然係用方法二啦！
醃完，放架入爐焗。

成功！唔知係熟手左定急凍肉的問題，好似仲好食過之前添！
浩浩食晒！仲話係大大成功，可以代替佢的A餐添！開心死！

其實我仲睇左個食譜，係用麥芽糖的，應該更似街的叉燒，有機會再試吧。

最近的相都用IPHONE影，始終冇相機咁靚囉。: (

鮮奶紅棗燉雞

早前天氣凍幾日就燉下野，今次又試下呢個鮮奶燉雞先。

鮮奶只係試過燉燕窩，雞真係冇諗過，但好似好潤咁，又話都幾配合，又試下先。

其實書話燉竹絲雞的，但見竹絲雞個樣黑黑的好似好恐怖，又未斬頭等，之前試過一次斬生雞搞到一鍋粥咁，個感覺好核突，唔想搞，於是都係買番普通雞算。



材料：
雞半隻、冇核紅棗6粒、薑數片、鮮奶2盒，另再加適量水

做法：
1) 雞洗淨汆水，紅棗洗淨，薑去皮切片

2) 所有材料放入煲，鮮奶倒入，另加凍水至蓋住所有材料

3) 燉2小時即成，去油，加鹽可飲。


唔記得影相，不過同未燉個樣差唔多，都係白色鮮奶樣，但有油係面，要隔油先飲。
其實如果雞買去皮雞會冇油，但去皮雞會冇咁有雞味，所以通常我都係煲完先用隔油壺隔油。


味道不過不失啦，鮮奶味好重，幾潤，似乎真係有潤補美白功效，都夾到雞味的，但鮮奶搶左好多雞味，令雞失色左少少。

鮮奶都係燉燕窩最好。

花旗蔘燉雞

宜家keep住每個星期都煲1-2次湯。

多數都安排係浩浩番中的時候，因為佢唔係度，我又放左工，睇電視時便可以慢慢煲埋，好方便，咁夜晚晚放工番黎有湯飲，咪好幸福囉！嘻！

其實煲多幾次後，發現燉湯真係好容易，尤其慢慢屋企會儲存左D野，買少少新鮮野加埋就煲得，又唔係點睇火。


好似今日咁，係超巿買左半隻雞、同一舊豬展，咁就得了。(仲有得選燉響螺定花旗蔘添！未燉過花旗蔘，又試下先。)

材料：雞半隻、豬展一舊，花旗蔘、圓肉、杞子、蜜棗
( 後面三樣，根據我本「靚湯王」話係百搭料，落左清甜滋潤，冇壞。)

做法：
1) 雞切件，連豬展汆水5分鐘，去血腥味。

2) 乾食材用熱水浸洗，所有材料全放入煲。( 抽起左雞脾做煲仔飯，見下文 )

3) 加水至9分滿，燉2小時。

4) 飲得！好好味！

不過要隔油，有人會將雞先起皮，但咁會少左雞味，但唔使之後隔油囉，隨個人喜好吧。

今次好有系統咁計水份，放左1/3煲料 ( 見上圖 ) ，落到800ml水，有4碗淨湯。



*******************************
另因為得一個人在家冇回家吃飯，抽左幾件雞，切左半條臘腸，煮左個一人煲仔飯。

不過18cm LC拿左去燉野，22煲一人份飯又太大，於是用左個1L康寧煲仔，原來都得的，同去露營煲飯同原理吧。

香到兩隻貓埋黎聞住，素素直情想搶食！結果我要開罐頭俾佢地食，先可換我有半餐安樂飯食！

情人節驚喜

情人節係番工的第一天！幾咁唔開心！
也以為浩浩唔會有驚喜，點知都有少少喎！

放工佢打俾我，我上左小巴，先知原來山長水遠黎左接我放工！呵呵！
梗係勁開心落車，嘻！

跟住神神秘秘咁車左我去旺角，食日式放題，日本野係我地的至愛！呢間松田第二次黎，但放題的質素真的唔錯！藉得推薦！

禮物就冇特別買了，其實都冇乜想買，平時都買唔少，反而想儲下錢就真，我地計劃今年買樣大野，無謂開支慳得就慳吧。
( 除左食，嘻！我的儲蓄大計係唔計食的，我中意煮佢中意食，辛苦搵黎至在食，總之食唔可以點慳就係啦！)

杞子圓肉桂花糕

想整很久，農曆新年最後一天假期整左，膽粗粗仲拿來宴客添，哈！見笑了！


材料：( 2 底 份量)
桂花2 tbs、圓肉10粒、杞子適量、片糖1片、水500ml、魚膠片

做法：
1) 圓肉及杞子洗淨，用水浸軟
2) 煲滾水，加圓肉煮5分鐘，加片糖煮至溶

3) 加入杞子及桂花煮約幾分鐘至有香味，熄火，待涼 ( 圓肉拿出剪碎添 )

4) 魚膠片以凍水浸軟，座熱水至溶，加入桂花水內，拌勻，入模冷藏

哈哈！失禮晒！
其實味道還可，只是桂花等太多，又沈底，於是食到成口桂花，粒粒咁唔多好食。
下次可以少番d，或者好似啫喱糖咁分層雪凍應該會好好多。

了左件心願，下一次應該係桂花馬蹄糕了！

一年之計在於春

一年之計在於春


自從18歲定下一個十年計劃後，很久沒有定過什麼大計劃俾自己。

今年想係年底做樣想做很久的事，就係做包租婆！

於是定下新一年的大計劃，努力儲蓄！

因為定個額俾自己都唔低
要每天實行
話難唔難
話易都唔易
不過都有信心做得到的




開始第一星期都叫順利喎
因為要停止晒所有的無謂開支，即雜誌、衫、雜物唔係要用都唔買
才發現原來當人無所事事行過d商場舖頭時，第一時間真係諗下有乜想買同要買，幾恐怖！
跟住諗起自己想儲錢，即下唔想買，可見呢個願望幾咁強烈！




也因為咁留意多左消費呢個行為，找番D理論SUPPORT先

1) 大部份現代人都進行緊「老鼠賽跑」的行為：小老鼠努力讀書找份好工，然後花掉大部份時間、精力努力為老闆工作，交稅為政府工作，跟住有能力就買樓買車買東西為銀行工作，換來債務同帳單，於是更加努力工作賺錢，然後換樓換車生小孩，以換更多的欠債！ ( 取自「富爸爸 窮爸爸」 )


2) 在香港一切以經濟掛帥，我們自小被教育要努力工作，賺到錢就可換取更好的享受。除左耗盡積蓄以按揭買發水樓，每月還債供息，還要向發展商交管理費。唔買樓好些嗎？你到商場食肆快餐品用膳購物（租金直接或間接與營業額掛勾）、燈油火蠟、衣食住行全都跟地產商有關！巴士渡輪、上網電話電訊、燃氣電力，全部都是各機構通過各種壟斷經營權下的消費，通脹不過是政府同地產發展商用不同的名目方式以巿民的勞力去擴大收入而產生的。( 取自「地產霸權」、「獨立媒體」 )




上面的理論其實都幾惹人深思的，跟據我呢幾日觀察，家中有的東西 ──  除食物和紙巾等日用消耗品以外 ── 通通足夠用一年以上唔需要添置！( 可見平時買埋買埋幾多唔等使的野？！ )
很多時，物質少了一些，日子還是這樣過，甚至會過得更充實，那為何要去不停買呢？要用前考考心思找辦法取代應該仲好玩。
留番D錢做現金流，換取真正的收入，希望真係做到吧！







延伸閱讀資料：

張超雄：貧窮、壟斷與通脹

官商勾結的政經結構 《地產霸權》



陳雲《九評地產黨》序言

香草燒春雞

新年病到死死下，但個心好野，好多野想做，好多地方想去，好多野想食，唔想不停咁訓，可惜......有些事唔到自己控制！



一見自己好番少少就去整野食，繼蘋果批後，黎多個香草燒春雞先。

參考左仙女、10R同爆炸兔的做法，左抄D右炒D，開爐炮製！




材料：
法國春雞一隻 ( 購自citysuper )、洋蔥、甘荀、薯仔、香草、蒜蓉、鹽、黑椒

春雞真係好細隻，大過手掌少少而已。

做法：
1) 洗淨雞身，抹乾，用鹽抹輕抹內外，吊起風乾半天。
( 據說咁樣會香脆d，我第一次整，真係好脆，呢招真係work的！不過好搞笑！)

2) 放番隻雞落黎，用蒜頭、香草、蒜鹽、黑胡椒，塗滿內外醃佢十分鐘左右

3) 另外，用蔬菜切片墊底

4) 預熱焗爐，放雞係蔬菜面，180度焗40分鐘，220度焗10分鐘上色

完成！勁脆！ ( 嘻，不過燶左少少面！冇整走便影相！)

不過淡味左少少，點蒜鹽食，好好味！


可惜唔舒服，食左幾口便食不下，俾浩浩一個人連蔬菜清晒！連洋蔥都冇一條剩！

你話病幾慘，有好野都食唔到！

我要努力好番！做健康人！食好美味的野！



浩浩話最近我變番識整野食的小廚神，佢唔多慣喎！哼！都唔知係讚定彈！我不嬲都煮野食好叻架啦！衰人！

蘋果批

新年前已經心思思想整呢個很久，買定青蘋果係屋企一得閒就整，點知病鬼左！



初三攤抖左成日，望住出面個天勁唔開心，好好陽光可惜我玩唔到，冇晒力冇晒心機！



初四的起心肝整起左！

其實好容易的。

上網參考左miss jubie的食譜

材料：

急凍酥皮半包、青蘋果2個、砂糖5匙、黑糖1匙、肉桂粉、牛油、水100ml、蛋黃1個

急凍酥皮=已搓好的水油皮覆疊好多好多重，輾開便得，超方便！不過用幾多切幾多，用唔晒放番入雪櫃雪住，輾開左再雪係唔用得的了。

做法：

1) 蘋果去皮，切成小粒

2) 用鹽水浸住免變黑，待用

3) 牛油少許，融左佢起鍋

4) 蘋果隔水放入，加入糖、肉桂略炒

5) 加水煮約15分鐘 (有些食譜免左呢步，硬身有口感d，但我中意m記的軟綿綿feel)

6) 煮至蘋果成半透明醬狀，久唔久用棒搞搞免黏底 ( 甜味自定，我用青蘋果共用6匙糖，可按個人口味調，水也可加減，甜度以合適後略甜少許 ) ，熟左後開蓋煮至收水

康寧煲呢個時候好o岩使，因為入面蘋果的情況。

蘋果醬待涼備用

7) 酥皮輾開，搓成薄片 ( 我半包開左5塊 )

8) 蛋黃抽出備用

9) 將適量蘋果醬放入酥皮內，對摺，用叉壓實收邊

10) 掃上蛋黃上面 ( 等焗完時會變金黃色 )，用刀在面略切幾口for出氣

11) 預熱焗爐，200度

( 早前買左個爐溫計，估唔到原來呢個cheap cheap野的溫度都ok準的喎 )

12) 焗15分鐘左右，或至表面成金黃色

食得！正！( 我見人地有撒糖霜在面好靚，不過唔記得買，冇用到！ )

不過青蘋果做料，會有少少酸酸地的青蘋果味 ( 嘻，幾廢話！) 如果唔中意，建議都係用番紅蘋果會純甜味。