薄荷啫喱 Mint Jelly

多謝可愛的黑貓主人GU媽講起，薄荷葉可以製作薄荷醬，於是趁端午節假期便整左呢個薄荷啫喱！

煮的時候試左味，真係同超巿買的味好似，好期待呢！決定今晚買羊架回來整，伴自家製的薄荷啫喱！呵呵！(開心到傻左！)



事緣露台的薄荷葉生到傻左，4個月左右，便由一小盆生到換大盆都唔夠佢生！

2月

6月

個盆開始負荷唔到，每天都有D葉會因唔夠水同唔夠陽光而枯左，每天剪下丟掉都好心痛，好似好浪費咁。


不過薄荷同香茅呢類香草其實有樣似，就係會越剪越茂盛，既然佢地可以變得有作為，自然唔怕浪費，把心一橫就剪左一堆！

好，開始製作！
食譜多得GU媽介紹，原文係呢處，我稍作更改

材料：
薄荷葉  約2杯
糖  150g
白醋  50ml
水  100ml
魚膠粉  1湯匙 ( 我諗魚膠片會好d，但屋企用晒，係樓下買黎用住先。)

做法：
1) 薄荷葉洗淨，剪下葉備用

2) 葉子切碎 ( 我貪快用左工具crop碎，結果葉子變晒啡，下次試下用刀切睇下會唔會keep到綠色。)
( 原食譜係唔使切晒的，只係就咁煮D味出來，之後會抽番起D葉。但我想薄荷味濃D，同埋好似薄荷醬咁有多D薄荷，所以全部切碎用。)

3) 薄荷葉碎、糖、水、醋全部加入小煲內煮，煮到糖溶後轉小火，keep住搞，小心唔好黏底，有需要時離火一會。約煮10分鐘。

4) 加入已溶解的魚膠粉，拌勻。
5) 放涼，放入已用熱水消毒之瓶子內，放入雪櫃保存。

就咁試味覺得甜左少少，但雪凍左同埋沾羊架食時應該差唔多，好心急添！