新玩具 ── Tefal 電蒸爐

係冇預計下超快速買左呢個玩具！不過諗諗下都幾好！好中意！

TEFAL 的 三層電蒸爐

話說早前買冷氣送左個電蒸爐，點知俾媽媽拿左俾妹妺，佢會常用些喎。

但浩浩唔知，買左一大堆燒賣回來，大發佢的燒賣魚蛋夢，仲有埋豉油、辣油添！幾PRO！魚蛋仔！

可惜咁樣一來，呢堆燒賣滯留左係個冰箱入面幾星期，長此下去都唔係辦法！

一心去找個平平地的小蒸爐俾佢玩便算，上網見億世通有個 $99的，但去睇實物原來好薄，大力少少都好似會爛，最近新聞又講乜塑化劑等，都係驚死，再睇睇先。

跟住去百老匯見到呢個PRINCESS的，超迷你，好FIT！

不過一D都唔平，$349，冇任何DISCOUNT！

過隔離國美，GOODWAY似樣好多，大件夾抵食，不過我又嫌佢太大，我地方細冇法，每一寸都要好好計過先放野！

大少少可以蒸埋餸好似都唔錯，至少唔使得蒸燒賣單一用途丫！反正我唔會有位買個MIELE果個蒸爐住，但一個野可蒸幾樣野又幾好喎！

間 THE BEST 竟然貼紙俾蘇寧鐳射收購左，未重開，真厲害！

去埋上面豐澤睇，又有驚喜喎，左邊隻KENWOOD好靚仔，個膠托係透明硬膠，加白色，我中意，又四四方方好似好實用咁，如果買野滿150仲可以優惠價238買。中途加水仲好方便，不過佢下面個盆水冇隔，D汁滴左落去要洗可能有些煩。

右邊個TEFAL都唔錯，金屬外殼好似好PRO咁，又有保溫功能，同埋三層間的隔可以拆出來，蒸大件野 / 放燉盅咁，不過價錢最貴。

唔差在去埋隔離吉之島睇，反正隔離，真係好方便。呢邊全部都係TEFAL，不過好多型號。

會合左浩浩同佢同事食飯先，佢地傾計我就極速用IPHONE SEARCH左D資料，最後帶浩浩去睇下先決定。

佢睇完就話買了，佢話幾百蚊貨仔唔使格喇喎，同埋俾我咁格完都唔慌有錯漏！佢俾錢的時候，我諗左好耐到底佢呢句說話係讚定彈！

番到去即刻拆來檢查下先！浩浩話好似細過買完玩具番企即拆俾媽媽話佢咁，嘻！

砌好晒三層都幾靚仔丫！送左個飯隔，可以蒸埋飯，兩餸一飯的話唔使用電飯煲添！

內籠唔算大，放到中型圓碟，不過相對成個野冇咁巨，慳位囉。可以考慮買番兩隻橢圓的碟先。

拆左中間D隔睇下，可以放個盅入去燉野喎！不過我先發現原來我竟然冇燉盅！平時燉野係用LE CREUSET的呢！

佢每隔上面有6個蛋位可以用來蒸蛋，不過我諗唔放靚其實都可以蒸的姐，至多滾來滾去姐。

其實唔一定用晒三隔，一或兩隔都可以。

人地話蒸蘿蔔糕超正，一次幾底咁上喎！

最欣賞佢最聰明的地方係，三格剛好大小差少少，可以疊起，也可以疊埋，倒蓋在機身，減少空間去收藏。

睇下，幾小巧！ O岩晒我呢D細廚房用。

放係廚房呢個位真係無得彈！取用又方便！正！

擇日俾佢開工先！好心急！

浩浩話蒸燒賣咪得囉！哈！差D唔記得左佢的最重要功能係咁添！