趁2010年快完結前，爽手了左件心願先！
話說之前整pizza剩左好多蔬菜，全部都用左少少而已，就番工想清埋佢，所以自己改左少少，唔用常用的洋蔥做配菜，用左三色椒、甘筍同磨菇。
主要參考大少奶本新書《大少奶的絕頂感情味覺》...( 果日係大眾一次過買晒三本，嘻 )，但根據經驗作左少許改動。
材料：
--牛肋條 1包
--冰糖 適量
--薑 數片
--三色椒 各一 ( 原本食譜係話用西芹、蘿蔔 )
--磨菇 一盒
--甘筍 大半包
--新鮮羅勒葉 6-8片 ( 露台種左幾星期，終於有機會俾佢出場！ )
--蒜頭 三小粒
--茄膏 三湯匙
--雞湯 300ml
--黑胡椒 適量
--紅酒 2湯匙.....食譜寫1/2湯匙添，好奇怪係咁少，見人地係用成杯，甚至成鍋咁去炆的，唔多放心，自己加多左少少。
--海鹽 適量
做法：
1) 薑、冰糖煲水，糖溶放牛肋條。中火炆15分鐘，細火炆45分鐘，熄火焗至水轉冷，撈起備用。
2) 三色椒、磨菇切粒，連甘筍洗淨；蒜頭、羅勒葉切碎。
下油，燒熱鍋，將蔬菜同蒜蓉、香葉略炒。
3) 下牛肋條同炒，爆香。
4) 加茄膏與其他配料兜勻。
5) 加清雞湯、黑胡椒，煮至茄膏全溶，加冰糖適量調味。
6) 慢火炆半小時，熄火焗半小時，再開火炆半小時，再焗半小時。
開蓋以大火煮滾，以少許海鹽調味，下紅酒，待揮發後熄火。
完成！好香！但縮番好細煲咁 ( 原本大半煲滿的！ ) 。
但完全體會到 Le Creuset 煲炆野的威力！
平時煮野除左保溫、慳火外，其實其他煲都煮到果D效果，但炆野真係冇得比！
D蔬菜「淋」到傻晒！連牛肋條都軟晒！好正！
檢討：
味道好味，不過甜左少少，應該係冰糖落多左。
但賣相我覺得唔多靚，D蔬菜縮晒水，個煲太大好似得好少咁 ( 呢個係22 )，我又唔記得抹下個煲邊.....下次可能用第二個碟上會好D。
不過一定有下次。
浩浩話今次係大成功！小廚神番晒黎喎！ ( 呢句都唔知係讚定彈，有弦外之音囉！ )
唔理佢，本來想焗埋個包配住食的，但趕時間，於是就咁開餐！
了左件心事，2010再見了！
