兩貓和平共處大作戰(二)──第一次真正自由接觸

早幾日同盈食飯，佢仲上來睇貓貓。

 

俾佢點醒左，應該係時候俾佢地多接觸，雖然都可能會打架 / FU，但另一隻都識避 / 走的，所以問題應該唔大。同埋都要學識點相處。

剛好黎緊有2個幾星期大假，正好日日睇住佢地，真係打得緊要都可是制止下吧，就咁決定！

*******************************************

今日陽光普照，一早清潔好後 ( 多左隻貓，又分開養，真係做多好多野！沙盆、水碗、食物碗，全部都 X2，仲未計全屋的毛，日日吸塵同洗地，唉！貓奴才，加油！ ) ，決定放佢地玩下！

其實唔係第一次見，但經驗都唔多好，同好快分番開。

 

今日初初我都好驚！佢地不停短兵相接，清清FUFU聲不斷，兩雙都聳晒尾聳晒毛咁，阿清好驚咁望實佢，素素就唔識驚，好似過度活躍咁甩繩跑跑跑，清清睇定後也出擊！咁阿素先識驚一下，跟住又繼續玩。

係咪好驚呀！清清隨時撲下去，但素素仲繼續玩蝴蝶！

兩隻野圍住個梳化走來走去！久唔久仲會正面衝突！

不過玩左個幾鐘後，情況似乎好轉，清清FU少左，應該係習慣左呢隻會走會動的野，同埋都累了吧。只係望住跟住，但少左出手。

玩左個幾鐘左右，清清累了跳高找位睡覺，我也要午睡 ( 放假最開心的事 ) ，於是分番開佢地，各自好好訓番覺。

其實素素仲好精神彈來彈去的，小朋友的精力無窮！不過分開，冇人同佢玩佢都訓。

大家都曬住太陽訓，冬天的太陽好舒服呢！

 

訓醒整左個湯圓吃，冇技巧可言，懶，只係煮薑同糖水，湯圓係買包好的，不過好粉，味道一般。

今日兩貓相處，比想像中好，至少冇貓受傷！

希望黎緊兩星期，每天都咁玩下，最後佢地可是好好相處啦！