迷你冰皮月餅

很久以前在幼兒園同小朋友整過冰皮月餅，近年都會同小朋友做傳統月餅，但番工做野，太多東西要兼顧，要跟程序、再顧得清潔同秩序，仲要影相等，能完成已經萬幸！

今年行過二記買野，見佢PACK好晒D套裝，忽然心癮起，買左一包回來，諗住同浩浩一齊整，應下節開心下先！

仲有免煮冰皮添，唔知有咩分別，但真係超方便！套裝得紅豆蓉，我另外買左盒綠豆蓉，我覺得冰皮拼綠豆蓉係最MATCH的，不過冇整咸蛋，健康些。(其實係懶！)
仲買左兩個模，一個50g、一個63g，orange那兒多d花款選！

好易做！
1) 冰皮粉加水打成粉糰。

2) 分次加入菜油，搓至軟綿。由浩浩負責，嘻！

3) 把粉糰及餡按份量分成一份份，呢d精細野梗係我負責。
見唔見我個新電子磅！好好用！

4) 把皮包餡，滾圓，入模，壓下，完成。(中間可用手粉免黏)

5) 掃去多餘手粉，放入冰箱雪凍，可吃！

嘻！好好玩！好開心！

中秋食自己整的月餅，好期待呢！

細細個越睇越靚！

好精緻咁！(賣花讚花香！)

剛好整左16個，但應該唔多夠派囉！

結果只係俾左爸爸媽媽弟弟同妹妹，其餘留番自己。

但我恐防等唔到中秋已經食鬼晒！

希望中秋節快些來啦！我有一籃子慶祝活動想做呢！

廚房工具添置

早前美食節，去買左呢個上年買唔到的車仔，好開心呢！

買好多餸時唔使拿到傻左咁了。

跟住浩浩番工，我去左荃灣入貨。二記同orange。

除左冰皮月餅同個slicer之前講過外，其實仲有其他的。

呢個silicon mat，搓粉入焗爐都得，最重要是小size，唔使左屈右屈都fit我的小焗爐。

呢個電子磅，已經係做冰皮月餅時用過了，好好用！

仲有呢個括括，佢係無縫邊的，唔怕藏污濁，其實我見blog友仔係西貢買的仲靚，但我好少經過，又唔知係邊，呢個平平地用住先都唔錯，但佢質地較硬。
仲有花花袋仔。

想起當年與2歲班去看樹

開學後番工忙到傻左，縱使唔使入班做班務，但單單課程雜項、同埋連趕幾場家長會的野都夠我傻了！


人地負責一至兩班的野，我準備晒各級各科的powerpoint，每樣都不停改，真係頭都大，最唔想做錯搞到人地，幸好同事們都好幫手同包容，所以雖則忙但都開心的。但幕後工作冇乜人見到，跟以前日日有小朋友有家長讚賞真的很不同，真的要努力適應。

最開心真係5天工作，一諗到呢度乜辛苦我都唔怕，不過見住有些同事要繼續番星期六，我仲要負責安排工作給他們，那種感覺很差，我也明白講什麼也沒用，明白但什麼也幫不了，唉！求主加智慧！


不過，有時入去幫手「乙水」D兩歲剛番學的BB唔好喊，俾D人仔一泡眼淚一泡口水咁攬住，一陣又對住你笑番，果種窩心感覺真係好SWEET架！



呢輪深圳大學生運動會，工廠停工，天空好像特別藍；加上立秋後，有少許秋意，想記起當年教2歲班時，帶住十幾個BB出去學校門外的公園看樹看車的日子，仲好詩意咁搞左個「秋日觀湖賞葉之旅」，日子好像很遠但也像很近，唔知佢地宜家點呢？



人老了總愛想當年的！見諒！

廚房新添置武器 ── Kyocera Ceramic Knife、孖人中式厚身刀、多用途slicer

最近廚房入左好多小東西，( 大東西都想買，但冇位冇法，平衡下心理小的都好啦！照殺！ ) 不少仲係利器添！哈！


1) Kyocera Ceramic Knife & Peeler Set
 
想買好耐的陶瓷刀，唔知同街邊169一套果d有乜分別，但覺得佢全白色靚，一個字就夠！其實睇左佢好耐，sogo thankful week同美食展都係冇特價，應該話特價極都係果個價，所以把心一橫，用sogo咭買有95折都好啦！

暫時用來切水果切蕃茄等，真係好好用，唔會切扁晒，切得好薄好靚，又真係冇咁易變黑，原理真係唔明，但就係咁囉！遲些切下肉睇下點先。

Sogo counter講到好勁，示範切洋蔥冇眼淚，同浩浩去開SOGO，佢睇完試過就買左喇！

kyocera網頁


2) 孖人牌中式厚身刀

對，冇睇錯，又係孖人牌，我諗應該係家族遺傳，所以先會不停添置呢D野！哈！

可睇番我地有的大部份刀，上次已經買左D小刀SET，加埋呢把2.5mm厚身版，應該夠喇！

美食展特價做promote，送細砧板仔，多左一個諗住送俾妹妹。

3) Chef Avenue 多用途 slicer

之前好想買部 KM20 ( 可看呢條片，超勁，當然價錢都好勁啦！)，但諗番其實打蛋打粉器我都有，而且整蛋糕等都仲好OK，最重要係冇位，咁就唔好諗住了。早前見到SUNNYMA有個多用途刨，諗起我都曾經有個類似的野，但在櫃中找不到，大概是搬屋時掉了，咁有個有時整野食又真係簡單好多的。

果日去開荃灣南豐入貨，經過ORANGE對面有間賣小型廚具的SHOWROOM，入去睇下，原來呢度賣幾多呢類野，係一個姓黃的香港人發明的喎，拿埋專利，阿蘇都介紹過云云，仲有之前上過報紙的手動刨蘋果器、手動碎肉機兼臘腸製作等等等等，唔係好新，但如果是原創，就值得鼓勵支持。

選左呢個多用途的SLICER，$ 168，反正都係要買，又試下囉，當支持下香港創作都好的。

雖然比果時街邊買的貴，不過D膠的用料明顯靚過以前果個，同埋好多好細微的野設計得好貼心！

例如切片仲可以調較不同厚薄、切條有幾款粗幼、把手又可成為搾汁器咁！

又可KICK住唔同大小的碗邊刨野咁。

咁多諗頭，希望香港多D呢D有心人發明野就好了！

係YOUTUBE找左條示範片



仲有刨蘋果器真係好有趣！







P.S.:
唔該blog友仔提醒，同香港個網頁個品牌名唔同，send email去求證，原來CHEF
AVENUE是他們賣去國外的品牌，在香港有少量零售，另一個常用的品牌名是konstar。

香港konstar網頁

蔡欄係蘋果日報講起 ─《值得驕傲的本地貨》

企鵝仔來我家了！(NESCAFÉ® Dolce Gusto)

好開心！
早前電腦節買左部notebook俾媽媽，等佢同爸爸可以學上網之餘，我也輕易儲夠簽帳換企鵝仔了！(詳情可睇番呢度 )

昨天收到換領信，出開去tst食飯，於是乎就去換埋。
第一次換禮品要跟埋簽帳單，不過好快，唔使10分鐘搞掂！

就咁帶左佢回家，仲送左一盒試用幾款的試用裝，同埋一盒朱古力！(好開心！因為我最中意係朱古力！) 另外，有張買三盒送一盒齋啡的COUPON。

放埋係常用廚房電器中，好可愛呢！

按佢教的方法洗乾淨後，急不及待試用！
第一個係我最想試的朱古力！
就係咁擺入去，

開機唔使20秒便可開掣，沖出濃濃的朱古力！

如是者再沖出奶泡，仲可拉少少花，不過杯太大，也不熟手，是但有條線咁囉。

好香！正！

不過建議沖250ML左右，我唔熟控制，沖左成400ML有多，哈！朱古力香味夠，但唔夠甜，好似減左糖咁，哈！也不錯吧！

好期待試埋MOCHA、CUPPACINNO咁呢！

士多啤梨芝士蛋糕

呢個唔係我手筆，呢款芝士蛋糕係浩浩的拿手好戲！

係咪好勁？不過佢得呢個絕招，久唔久有朋友仔生日佢便會出手！
但我從未試過生日收過囉！

呢個係剛出爐的樣，但一會後中間會縮番少少，放入雪櫃雪凍，中間加上果肉果醬便成。

材料：

餅底：
消化餅  120g、牛油 60g


蛋糕：
cream cheese 300g、糖  75g、蛋  90g、牛油  75g

用具：
甩底蛋糕模

做法：
1) 消化餅打碎，拌勻溶牛油，倒入蛋糕模，用匙壓成餅底。
2) cream cheese和糖打軟，加入蛋及牛油，倒入餅底上面，掃平。
3) 焗爐250度預熱，放入蛋糖焗10分鐘，轉190度焗10分鐘。
( 可在焗盆下加水令蛋糕質感軟滑些；如表面有些焦面，可蓋上錫紙減低焦 )
4) 出爐後待涼，放入雪櫃一晚可吃。
5) 放上果醬更美味！

今次又係有朋友生日，買左拿新鮮士多啤梨做新鮮果醬。(做法可睇番呢度)

登登！靚靚！

不過趕時間，d果醬煮得唔夠杰身，可以再改善，排球朋友們超讚呢！

但其實我中意平時的藍莓味多些，不過以前的藍莓醬多數在二記買，未試過自己整，或許我應該要試試自己煮呢！