菠蘿二重奏：菠蘿炒飯 + 鳳凰酥

早前又買菠蘿，又整鳳凰酥！
因為上兩次整都送晒俾人食咁濟，其實每人都分得唔多，連浩浩都係食得幾粒，所以見放假咪諗住整俾佢食。

去完泰國，成日諗住泰國菜！
所以見住個菠蘿，諗住唔好浪費，一開二，拿少少肉同埋個殼整菠蘿炒飯！

第一次整泰國菜！算係吧！
我個人覺得個味都唔錯！( 因為跟足份量味唔會差得去邊的 )
只係個質感有待改善。 ( 詳情睇下面個炒飯小橋妙 )


《菠蘿炒飯》(  from 之前買左本《泰國菜的第一堂課》，呢本書係香港4間出名的泰國餐廳提供的食譜寫出的，味道好o岩香港人口味。 )

材料：
菠蘿1個 ( 總之扣起400g for鳳梨酥，其餘全部用黎炒飯，大概 1/3肉左右 )
白飯3碗
雞蛋 1隻
中蝦 6隻 ( 我臨時起意，所以只係用左急凍蝦仁 )
雞肉 75g ( 我用左150g )
泰國臘腸 1條 ( 我用普通臘腸咋 )
葡萄乾 約10粒
青豆 約10粒 ( 我冇落 )
腰果 約10粒
肉鬆 適量 ( 我冇係手，用左泰國買的「貓屎條」弄碎代替 )
牛油 1/2湯匙

醃料：
魚露 1/2湯匙
糖 1/2茶匙
胡椒粉 少許

調味：
咖哩粉 1茶匙 (我冇係手，用左咖哩磚，效果唔好！ )
鹽 1/2茶匙
糖 1/2茶匙

做法：

1) 菠蘿在3/4位置切開，挖出菠蘿肉，留較的一邊留用 ( 成個菜呢個步驟最難 )；
菠蘿肉切粒；

2) 中蝦去殼留尾，挑去腸，洗淨，加入醃料拌勻略醃；
雞肉洗淨，飛水，切粒；
腰果香鑊炒香或用焗爐烘香 ( 我順便焗左個鹽焗腰果入樽來食 )；
臘腸蒸熟，切粒；

3) 大火燒熱鑊，下油 ( 係要好多油 )，注入蛋液炒成蛋鬆，
再加入牛油、蝦、雞肉、臘腸、青豆炒香，
加入白飯及調味炒勻，
最後加入葡萄乾、菠蘿粒及腰果略炒片刻，
轉放入菠蘿殼內，灑下肉鬆同吃。

好好味！也唔難整，應該可以再encore！
不過炒飯其實我好少炒，也很久沒炒，好多小橋妙都唔記得左，要留心。

1) 飯要用冷飯，因為會較乾身，最好煮完弄鬆再放雪櫃一晚。
(我就係唔記得弄鬆，所以成餅咁出，凍左好難整番散的了 )

2) 炒飯時，熱鑊下油，油要下好多，飯也要先放番室溫解冷，否則飯粒唔能夠炒到佢一粒粒好散咁，也會黏鑊！ ( 明顯我唔會落好多油，奶野啦！ )

3) 同埋最後落調味時，冇咖啡粉，用左咖哩磚加少許水代替，令到個飯即刻由爽身變成濕身！「立」晒口！



不過我有信心下次會整得好味的了！
因為個菠蘿炒飯的份量同鳳梨酥的份量真係prefect match！
**********************************************

《鳳凰酥》

詳細食譜：
(A) 內餡
(B) 酥皮


1) 菠蘿同糖煮滾，再加麥芽糖細火煮至濃 ( 要很久，久不久攪下免黏底 )

2) 糯米粉、松子仁、咸蛋黃灑米酒，焗爐160度烤12分鐘。蛋黃、松子仁切碎；

3) 牛油、糖粉攪勻，分次加入蛋黃、蛋白、芝士粉、奶粉、煉奶，用慢速拌勻

4) 中筋麵粉過篩加入，混合 ( 今次我冇用機混，因為上次慢速都起筋太脆 )，蓋上保鮮紙鬆弛30分鐘。

5) 當菠蘿醬煮至濃時，加入無鹽牛油拌炒，煮到冒大泡泡；將烤熟的糯米粉分2-3次慢慢加入拌勻至濃稠至不太黏手，待涼使用。( 我索勝雪一雪添 )

6) 當所有野準備妥當時，可以開工包餡落模。

7) 第三次整，份量同手勢都明顯熟左，幾靚！( 哈！自己讚自己！)

8) 放入180度預熱的焗爐，焗 10分鐘，反轉焗3至4分鐘至兩邊金黃便可。

唔記得影相，借番上次張頂下當吧！:P

好快俾打完波回來的浩浩掃左幾件，朋友仔又食幾件，得番幾件，分左3日食晒！
其實我覺得整多多都唔夠食！

唔怪得四月貓之前點解整咁多都唔夠！我宜家先明白！我仲冇佢咁大方，D同事朋友都係一兩件咁咋！

幾次都係鳳凰酥，下次我要整純鳳梨酥先！
不過又買左好多野，好多野想整，輪住黎吧。