露台工程第二期 ── 新意思

呵呵，最近有個新構思@露台！

構思 --> 搜集資料 --> 計劃 --> 行動 --> 失敗 --> 再構思 --> 再行動 --> 成功

呢個過程，當中帶給我的快樂，其實比成果更大。

沉迷的程度簡直係上腦，廢枕忘餐，或者話其實我只係享受沉迷的感覺，那種忘我的過程，找到新的知識、踏足未知的領域的感覺，很刺激也滿足。

**********************************
9-10-2010

源起：

話說去睇千嬅演唱會前，係荃灣食完飯，行franc franc時，見到套桌椅，佢剛好放窗邊，浩浩傾緊電話，我等佢時突然想起露台張椅，一直想加張桌，但放左桌子會好細，冇晒位，所以一直擱置，但如果放張好窄的桌，好似呢張吧桌咁，都好似可行喎。

露台、吧檯、涼風、賞月、看星、啤酒、小食、談天說地、燈火 ....... 呵！幾寫意！

不過同盈商量過，呢套野應該唔放得係戶外，作罷，但呢股小火苗點著左了.....

**********************************
11-10-2010

因為之前係深圳買左張好靚的木長椅，放戶外超好，首先梗係想去找找有冇類近的物料的吧桌，但番深圳裝修商場唔係咁方便，睇有冇類近的野姐，最方便梗係淘寶網啦。

都有喎，款就一般啦，叫有囉，可訂造，我諗實淨的，但個樣有些笨重，同埋咁遠加埋送貨都唔係平，再諗諗先。

加埋運費都千幾左右。

(轉自淘寶網)

根據上次經驗，自己親自上深圳五方家具廣場買應該會平一半添，不過要找，訂造更可能要去幾次，再諗諗先。

況且呢個價，我覺得有更好選擇，我想椅子能拍入桌子的，慳位D。

**********************************

15-10-2010

又上網睇左幾間香港的戶外家具網，仿藤家具都幾靚，問左兩間取訂造SIZE的報價，單桌約千五左右。

(FROM TOTO LIVING)

度過理想尺寸係120cm x 30cm x 110cm，其實好細，應該話好窄。

只係擔心仿藤會不會很難清潔？如果玻璃面，係露台又會不會危險？入面係鐵枝又會不會很易生鏽呢？

很多問號。
***********************************

22-10-2010

浩浩去做水草義工訓練，我就去左mega box宜家行。

睇左好多木桌、木架等，諗下有冇法子可以點改造成理想的樣。
但其實好多唔o岩使，因為宜家好多木傢俱都係用纖維板做，即唔濕得水，戶外用實會風吹雨打，一定要好實淨先得。

最後俾我見到呢張檯，正確黎講係佢果四隻腳，度埋size，配合埋呢塊又窄又長的實木的層板做面，應該會fit到爆！

不過冷靜d，要找浩浩睇下，否則實俾佢鬧。

************************************************

23-10-2010

星期六放半畫，浩浩駕車黎接我，順便找佢去mega box看看我的idea，佢都話好，真係好！

不過竟然話冇貨，仲唔會再番貨的了！

嘩，晴天霹靂呀，幾難得先找到咁合心水呀！

唯有暫時擱置。

************************************

回去死心不息，上網找，原來呢個款係08年出，宜家仲有賣成個的鐵架，但單獨的腳就停左產了！

晚上趁浩浩去飲，一條友又出走上深圳，深圳灣過，乘巴士去世界之窗，地鐵A出口的巴士站轉681巴士去歐洲城總站，成9點都有少少驚，但原來好多人，好旺，仲撞O岩哈佬喂，勁多人添。

不過宜家收10點，快行，一早聽阿婷講呢度D野好平，但親身黎先知平的程度真係好過份，某些東西可以係香港的20%，不過有些就同香港同價，為番人仔仲貴，真係要格價，有機會執到平野。

有些系列仲會有多D唔同SIZE / 款式添，都值得行，但大型要運番香港的就麻煩D，因為佢冇呢個服務。

但好可惜我想要的不鏽鋼桌腳都係冇貨了。

 

不過我都忍唔住買左D野，真係太抵了。

羊毛，香港439，深圳149！

不鏽鋼"西"粉器，16.9！

不鏽鋼薯蓉夾， 25.9(香港119)！

4個調味玻璃瓶，6.9(香港19.9)！

漏斗x2，4.9！

宜家環保袋，3！

香味蠟燭，13.9！

燭台，19！香港59.9，呢個想買很久，但家中已經有2個銀色，但咁平，算吧！

臨走拿番本Catalog，第時可以格下價先買。

此行仲超快地行左轉隔離的生活本色LC專櫃添，不過B&Q就真係行唔到了，下次找埋浩浩先吧。

*************************************

 25-10-2010

連二手巿場都找埋都冇呢幾隻腳，突然諗宜家咪有囉，不過display姐，唔知佢賣唔賣的呢？

放工又去mega box，問左佢好快覆我，話賣，仲有7折俾我，不過要成張買，自己搬，不送貨，但可以借工具我拆。

good！安樂晒！好開心！

星期三可取。

*************************************

27-10-2010

放工去黃竹坑join浩浩，駕車去mega box迎接找了很久的東西。

7折後同我單買4隻腳差唔多，yeah！

浩浩好叻咁拆埋打包，隔離d阿姐見到話我地有心機，包得好靚，嘻，聽左都開心！

不過真係好重，只係拿去停車場，同由停車場拿過對面屋企，都好辛苦，影唔到相了。

\

本來諗住遲D先慢慢搞，但浩浩好快手幫我搞掂左。

係咪真係好窄呢？我就係要咁的效果！

放出露台的樣子。

估唔估到我想點呢？未完的。

驚大風會吹跌，係下面兩邊都做左手腳！包穩陣！

*************************************************

30-10-2010

木放係戶外，單靠普通油保護唔夠的，找左很久放戶外的木應該油乜保護油，最後都係去番裝修時好PRO的店睇，應該有。(裝修時調漆詳情)

上立邦個網，得知佢搬左去虹橋附近，大左靚左都方便左。

陳師傅依然咁PRO。

新地址：新界屯門井財街9號15-16號舖

電話： 2449 7993

師傅介紹左呢隻愛爾蘭的船舶用木油，不過佢冇啞色，得全光，都好吧，最緊要保護力高，$220。

(CF話其實駱駝牌有全光、半光同啞色，$4X-50添，不過外國野好似好D，又唔使開晞用，方便。)

買埋掃同桶仔。

先油桌子。

順便油左少少個木地台！唔油都唔覺個地一年已經變得好似好花添。

油完即刻真係好似光亮左、新淨左好多咁。

幸好遇上秋風起，好快乾！感恩！

見效果咁好，於是把心一橫，成個露台油晒佢！

**************************************************
31-10-2010

昨午油，吹多一晚，今早乾晒！

不過我衰多手，浩浩油完我又加筆玩，結果厚薄不平均。好彩透明油，唔算太覺。

個地板好新咁，搞到我都唔捨得放番D石仔上去。
不過光面同之前的感覺好唔同，第時都係油啞色好似襯D，不過罐油仲有成半有多，應該可用多幾年先。

連個木花架都油埋，長木椅就再遲些先再算。

**************************************************

6-11-2010

連續下了幾天雨，好彩早幾日已經把個露台油完兼乾埋，否則都幾煩，天氣呢家野真係只可聽天由命的嘛！

不過呢幾日都夜番，今日早番少少先發現個露台有少少唔同。

就係下雨的水珠會結左係露台木的表面！

( 以前係會滲入木入面，明顯見到D木濕左變色。)

咁看來呢隻「船舶油」真係會封左層油係木表面，做到保護的效果。

白色木桌面也係咁。

***************************************************

7-11-2010

天文台超準確，今日真係停左雨，兼陽光普照。

用布同吸水拖抹乾淨晒個露台，好快曬乾晒。

然後，拿左個咕順出去，坐到看書曬太陽，寫意到爆！

其實浩浩整左早餐，我不知幾想坐埋出來食，不過未得，仲欠樣好重要的野，但急唔黎，因為要11月中 / 尾先有貨。

期待ING。

***************************************************
12-11-2010

其實睇O岩的東西要等11月尾先有貨，但心思思很難等，尤其日日見住咁好天氣，真係好想快D完成我心目中的野！

所以等唔切，孫中山壽辰放假，找埋媽媽一起北上深圳宜家。

買左好多濕碎野，但買唔到媽媽想要的白色羊毛，上次成堆山咁多的羊毛竟然賣晒！

好彩有備而來，但都冇預計係咁樣回去！當然仲買左唔少野！

意大利造，料又都算係實淨同靚，螺絲入面都用黃銅，放戶外最重要唔好生鏽，所以冇平但唔使等，計番都OK吧。

回去打開，立刻自己開工好似砌模型咁砌掂佢。

成功喇！啦啦！好開心！我的露台BAR完成了！

睇住風景 ( 雖然只係樓景同小隙海景 )、吹住風咁吹吹水，呵呵！諗下都開心！

我覺得夜晚會正D。

我的秘密小天地！

*************************************************

14-11-2010

星期日去完街回來，風和日麗，忍唔住拉浩浩出去坐下，飲番杯先，呵呵！幾寫意！

睇住咁靚的日落景色，幾正呀！浩浩話如果第時出面停車場同巴士廠位真係起好個大型運動場，睇住球賽咁就真係正喎！ ( 可見大家欣賞的野幾唔同..... )

露台第二期工程，圓滿完成！謝謝一路收看！