睇樓：豐景園

上星期日好忙咁中間都抽左一個半鐘去睇樓，目標係豐景園。

其實一直心思思想買層樓放租，我都係中意D穩定的投資，有咩事收番黎自己住都得嘛。

不過住開屯門，目標都只係屯門樓，一來平，二來近，三來熟丫嘛，唔想隔山買牛。


豐景園，以前朋友仔家，都算成日去玩、食飯咁，間隔一般啦，四四方方實用囉，其實同巿廣場一樣，係眼鏡房的舊則，有窗台，但呢D則有個好處，就係好似我地以前果度咁，可以做開放式廚房同埋打通兩間房，(唉，好懷念以前果度！)少少情意結吧。

雖則係放租保值用，但以用家角度我地都係中情高層同開揚的單位，望樓的都唔諗，當然講明左，經紀都依然會盡量帶你睇多幾間，當睇則囉，有些好唔俾面一入即出。

睇左6個單位，有3個都可考慮的。

1) 1座頂樓8室連天台，447" ，望友愛超開揚，不過入面好舊，換窗大裝難免，放租唔想花錢搞呢D。

2) 1座25樓3室，557"，房向西，但望屯門泳池，好開揚！廳向南，叫有少少海景。
又夠大，一家四口都冇問題，裝修都OK，最重要廚房已經開左，仲有埋矮BAR枱咁的餐桌位，稍稍執執已經好四正，好好！

3) 呢個最中意！5座28樓5室，一入去已經覺得係呢度的感覺，因為賣家稍為執過，少少化妝樓FEEL，但一室雪白光猛，兩房向南望海，當然有少少遠樓景(嘉悅、學校等)，廿年樓預左要換窗等，但其他都非常好。

呢張地產相好唔得，但我冇影相，用住先。

價錢方面個經紀話180-185萬，但有得講云云，例牌野，聽左就算。
呢個價一D都唔吸引，巿中心都係咁上下，咪玩啦！

回去做網上估價，大果個單位係17X左右，最後果個不過係160左右之嘛！估唔足價點開呢D價呀！後來收到電話再問，只係開170，咁就合理D。

但政府最近出左的措施，兩年內出售要收印花稅，似乎會令樓價跌下，係就O岩晒了，雖則未必會跌好多，但跌得幾多得幾多丫，估計係7-15%，如果跌到13X-140就非常GOOD了。




後記：
昨天行過地產舖，海典細單位都係200多少少，都好吸引呢！我成日想搬埋爸爸媽媽過黎就簡直係PREFECT！當然我要再努力很多先得。