露營@灣仔南

距離上次露營一年有多，上年因為搬屋忙左好耐，最近天涼又可以出發了，最緊要浩浩肯陪我！

今次目的地係西貢海下旁的灣仔半島，其實就係上次塔門對面。

選呢度因為據聞佢的設施超正，有洗碗、沖涼的地方云云，又望海，仲可以將架車泊到去附近添 ( 咁會行少好多的喎 ) ！

仲找歷奇朋友搞禁區紙，理論上可去到海下村行20鐘 / 黃石碼頭轉5分鐘船，但點知個朋友仔張FAX收唔到，佢又入左醫院搞唔到，唯有將架車泊左係北潭涌，轉的士入去。

香港冇地方可以好似外國咁駕埋車去露營的，得水浪窩同荃錦可以係附近泊車，不過風景就....有得必有失吧。

2點幾入到去，係南營呢邊落船，假期好多人！聽好多人知假期，星期五已經入定黎。

之前經緯的MIMI姐同阿SZE都叫我地係灣仔南營地呢邊，但睇相西那邊又好似大草原靚D咁喎，但行過去再行番來又驚連少少位都冇埋，點好呢？

最後見到個指示牌話西營地的女洗手間維修，要過番黎南呢邊，半夜三更都係唔好搞，於是疊埋心水係呢邊找個好位。

又俾我地係人地的營陣間找到個近海邊的樹蔭位，算係咁了。( 因為中間實在曬得太厲害，冇天幕唔係咁得。) ( 不過比起塔門的一望無際270度無敵大海景，呢個海景真係窄少少，仲要有山擋住個海。)

熟手技工們把今晚的窩SET好後，出發往西營地探索。其實大概5分鐘的林蔭小徑而已，環境清幽，但中間有牛。

真係好大個草原，不過好曬，同埋好多學校等團體係度玩集體遊戲，唔多O岩我地，好彩冇過來呢邊紥營咋。

我地係度放風箏，呵呵，不過唔多成功，叫做試過，睇黎呢D要學 / 有人教路。有機會再玩吧。

回來5點幾，打開我地的迷你移動廚房！

食物處理好，用保溫袋包住；  水袋x2；  食具、飲品、調味料分別包好；  仲有爐具、燃料添。

調味料，上次我地搜集各式試用裝，今次從家中裝出來。

開工 ing！ (見唔見到我個LC silicon 鏟，去露營都幾好用！)

露營煮野食真係好好玩架！我地都覺得係最好玩的部份！有人影相都掛住煲粥！

是日晚餐：

1) 生菜蜆肉雞粥

2) 薑蔥廣島蠔

食飽飽去洗碗，洗碗設施真係幾完善的。( 上次我地蹲係路邊用有限的水洗乾淨 ) 不過其實點都好，回家都會大洗一次。

估唔到早上熱到咁，晚上呢處好好風，大風到我地要落番d營釘營繩先安心D。

冇乜野做，好早訓，好快ZZ聲添，嘻！仲聽到隔離爸媽叫小朋友細聲D，唔好嘈住人地訓覺！嘻！

訓左幾個鐘，10點幾醒左，起身諗住整番個宵夜，有公仔麵、即沖薑汁燉奶，但結果我地選左焗香蕉蛋糕！

係咪好羨慕露營有得焗蛋糕呢？我都係！

其實有露營用焗爐的，但我地用呢個煲陣而已，朋友仔讚我地好聰明！( 輕飄飄中.. )

材料：香蕉半隻，蛋一隻、200ml奶一盒、植物油20g、betty香蕉蛋糕粉1/4盒

造法：打蛋-->加奶-->加油-->開粉-->加香蕉蓉，隔水焗15分鐘。(不同火力時間不同，自己調較 )

其實一人得一小塊，但露營有呢d野食，好開心！

跟住真係訓，訓到天光。

今次好熱，唔單只唔使穿睡袋，連被都唔使蓋，涼涼地好好訓。

******************************************************

今次呢度因為方位問題，冇得睇日出！

早睡早起，索勝起來周圍行下，清晨的空氣好舒服！那種青草味我好中意！

兩條友四圍行下睇下，傾下計天就光晒。

日出後，我地煮早餐，隔離仲有好多營友訓緊覺，仲有好多狗仔添，好搞笑。

是日早餐餐單：

1) 煎西冷牛扒

2) 煎雙蛋

3) 即沖咖啡 & 熱朱古力

用碗飲野，幾有feel！

剛剛先講起塔門有士多，呢處冇野賣好荒蕪，就俾佢找到個阿婆賣可樂！你睇佢幾開心！

食飽，慢慢收野，悠悠閒睇人地玩，影番張相便搭船回去了。

希望黎緊再有機會去露營，我真係好中意！

如果有朋友仔一齊仲好！