由大魔怪到小天使 ── 素素手術回來

實不相暪，我們一直私底下幫素素改左個小名──「大魔怪」！哈！
因為佢實在太活躍！
活躍度滿分！破壞度也爆燈！(  受害包括各式紙、書、窗簾繩、叉電線、玩具、同埋玻璃碗！ 小魔怪都不足形容......)

兼之佢又極之野性八卦，浩浩曾經問：「點解佢唔使訓覺的？定係佢係張開眼訓覺的？」人地貓仔平均訓20個鐘，佢一定冇囉！一見到我地就淨係掛住玩！



但今天，我突然覺得佢其實係小天使！

話說前日約左醫生，帶素素去做絕育手術。
以前養第一隻貓有事先知要做，到清清都快一歲先做，素素就一夠年齡就去，7個月！思春期都未到，真好！

手術前一晚食完果餐就要禁食，餓死隻貓仔，早上不停叫要食野，好可憐哦！
跟住仲要出街去診所驚到震！陌生加其他貓貓狗狗，縮係袋入面幾慘！

咁橋診所有急症，醫生要遲些先幫佢做BODY CHECK，不過佢都好盡責咁講解得好詳細俾我地知個流程，3點幾先做手術，餓死佢！

姐姐係屋企不知幾擔心，諗起醫生話會開個1吋的孔，又話會切去整個子宮，唉！諗諗都痛！

清清倒訓得好舒暢，平時難為呢位小姐姐了！

到5點多少少，護士打來話手術做完，素素醒番可以帶佢回家了！
即刻飛車去接佢回家！診所沒有素素咁細個頭的頭罩，好彩買開野的寵物店就係隔離，試住買，質料好好，30元，比清清果時果個實淨，只係清清用左唔夠一日，素素.....我地都唔太樂觀囉！


雖則眼仔碌碌，但個神情呆呆的，麻醉藥力未過吧，仲好記得清清果時回家仲腳軟軟站唔穩的！


趁佢唔為意，戴左個頭罩先，冇反抗，未知咩事吧！

回到家勁掙扎亂衝亂撐，我們驚佢太驚弄傷自己，於是放左佢個金光箍先，佢又冇腳軟行唔到喎，只係少少冇力，但都周圍行行睇睇咁，唔似有咩事。

不過細心睇，都係神情呆滯，唔似平時精靈活潑，我地又擔心佢撞親受傷，推開左佢間房的野，俾個大D的空間佢，將佢的床仔大咕順放落地，等佢唔使跳上跳落，整到傷口痛。



佢又好乖咁攤抖係地，可能真的累了，無端端唔知咩事訓醒受左傷，點都又累又驚吧。

陪左佢一陣，嘗試幫佢再戴番個頭罩，佢好乖唔郁喎！

但10秒後，突然強烈地連貓帶罩地跳向牆跳上櫃亂咁衝！好驚！因為佢好似睇唔到野咁亂黎，好驚佢受傷，仲有個傷口的嘛！一陣扯到咪大件事！唯有按住佢放左佢，如果佢唔舔個傷口都唔緊要的吧。

佢又乖喎，冇搞個傷口，隔左陣俾野佢食，佢都好似呆呆地唔係好食咁。

終於食喇！安樂晒！不過食得少少，都好。

由佢自己訓一陣。

第二朝佢已經若無其事咁周圍彈，周圍跳，我坐佢隔離陪佢，佢真係自己不停咁又跳又彈！我驚過佢囉！
佢無聊起黎竟然玩肚上面條線！嚇得我！即刻阻止兼拿玩具佢玩！佢最愛的波波、蝴蝶公仔、毛毛球棒等等！佢玩得好開心！真係不停咁自己玩！

玩到任我影添！我影到佢傷口，紅紅地好細個，周圍因為剃左D毛毛所以粉紅色肉仔，但冇血漬，鬆了口氣。(但為免恐慌，都係打格仔好！)

到左今天，一早起身，見到呢隻「九尾狐」係度搖尾巴！

咁玩法，應該冇晒事！感謝主！

佢見到我仲訓係度，佢好乖咁走埋黎我旁邊一齊訓，呢刻覺得佢真係好乖！貓貓冇事安樂地訓覺，係主人最幸福的事！

有時又好難怪佢的，佢細過中意玩，咁除左自己之外，就只係我地陪佢玩，唔搞住我地搞邊個喎，自己玩唔識咪搞到亂七八糟囉，同小朋友一樣。
幾前係唔知邊聽過一句：「寵物是你的一部份，但你是寵物的全部。」我係應該體諒佢地的。

唔理佢點曳，大魔怪素素係姐姐心目中都係可愛的小天使！

最緊要你地健健康康，快快樂樂就好了！