自家浸梅酒全記錄

今日做開支記帳，才發現由星期六學左點浸梅酒後，簡直係沉迷到上左腦，日日都買青梅！

回來又浸又洗又曬同吹咁，早晚都為梅忙，難怪浩浩話我緊張D梅多過佢，哈！

真係失左控！


決心將呢個浸酒的過程作一個詳細記錄，因為好多朋友仔見我玩得咁開心，都心思思想試下，而且我也擔心自己明年會忘記左呢！

好，開始！


材料：
1) 梅
2) 酒
3) 糖

用具：
密實玻璃樽 ( 因為用黎浸酒的酒精、糖份濃度高，不宜用膠樽。)
磅 ( 準確度高些，其實好多阿姐講唔使的，比例按個人口味自己調便可！ )

至於買幾多，就視乎你想要有幾多酒，總之浸完，真係飲到的酒大概只有70%左右，其餘會係梅。

梅：酒：糖 的比例係 2：2：1，即如用 1L 的樽，咁要400g的梅，400g的酒，同埋200g的糖。如要浸多些，可以此自己乘大佢計。

( 呢個比例算係比較濃的，但梅酒會加冰飲，又可用來做甜品等，我中意甜D，所以呢個正好！但我買樽時入面附送的日文食譜個比例反而冇咁高，遲些再補番比較下。)

同埋普遍大樽裝的酒係大概 2.5L 同 5L 的，而呢兩個SIZE的酒樽口都可以放到梅入去，即可以用埋黎浸酒，如果預浸得多的話，計數時可預埋呢個數。


例如我今次有一個 8L 樽，加埋酒樽的 5L 樽，咁份量如下：

	8L	5L	共
梅	3200g	2000g	5200g
酒	3200g	2000g	5200g
糖	1600g	1000g	2600g

梅，要係大的街巿先有得賣，我係屯門新墟街巿同旺角廣東道街巿都買到過，但要好留心，因為唔係咁多地方有得賣。主要係賣菜同水果的地方有得賣。

同埋多數用磅黎計，1磅 = 454g，咁上面 5200g 即係要 11.5 磅。

酒，用黎浸水果酒的酒最好有35%以上酒精濃度，因為高濃度先易把水果內的汁逼晒出來！
一般會用米酒，平時的雙蒸酒得 ~ 29%，三蒸酒則 ~ 38%，所以三蒸會比較適合。當然也可按個人飲唔飲得黎再調較，用雙蒸都冇話唔得，高梁酒 ( ~ 55% - 60% ) 也有人用( 據說會更香淳添 )。
新派D有人用清酒、我BLOG友仔用伏特加添！

咁即係一樽大的5.16L酒可浸晒兩樽了。


糖，多數用冰糖，因為甜味較純，冇其他糖 ( 如蜜糖、砂糖 ) 咁易起酸。
另外也有人用單晶冰糖，更純，不過貴好多，同埋據說味道唔差得遠。





買好晒材枓，然後就係開工了！

做法：
1) 買番黎浸水清洗乾淨。

2) 用尖的野如牙籤等把果蒂去除。

有些只係好似一片奄咁，都要剔走佢，據說會有苦澀味的。

3) 然後以大滾水燙D梅約一分鐘，加速梅的成熟度，會睇住佢變成金黃色，好神奇！

一分鐘後浸預先準備好的凍水中冷卻，好似過冷河的原理。

(呢個步驟係我個聰明BLOG友仔──細碧發明的，好勁！整完會聞到好香梅味！)
(如果想用番傳統方法，可以SKIP左呢個步驟，直接吹乾便可。)

4) 跟住將梅攤開吹乾表面水份，免得水份會令梅酒發霉。

5) 然後將梅同冰糖放晒入樽，其實排唔排靚應該冇關係，因為大概一日D糖便會溶左係底。

6) 加酒，然後封蓋。
儲存在陰暗地方 / 用黑袋蓋住，不要被陽光照到，3個月可飲，半年以上更好，1年便成佳品！

另外，儲存前把樽搖幾下，讓梅子上的氣泡清除。每月也拿出來搖下檢查下。

哎呀，真的很期待呢！