捐血@15次

早幾天去左捐血，其實一直想去，但又冇經過開，果日見出開荃灣行街，想起報紙話天氣凍，捐血率低，尤其O型同A型血存貨唔夠，一個人無無聊就去左。

好多人，原來熱心的人也很多，有些慚愧呢！上一次已係年多前了呢。

其實16歲那年已開始去捐血，果時只係想做些16歲先可以做的事，而捐血係我果時可以諗到又有意義又係能力所及的事，於是就做左。



跟住就定時去捐獻咁，哈，每次做完我都會好開心，因為覺得咁渺小的我都可以幫到人，仲拿左幾年長期捐血者的章仔架！




( 宜家諗番，果時好可能係懶勁懶有意義咁，其實一D都唔痛，但人地覺得你好叻咁，幾抵呀！哈！唔好話俾人知...... )





曾經爸爸話過我，話人地賣血都叫有錢收，你又冇錢收，身體又唔係好，咁捐法真係笨！

當年唔知那來的勇氣同知識，竟然敢同爸爸講，捐血只係身體好少的比例，唔影響健康，仲加速新陳代謝！有事仲會有人通知你有事唔適合，好安全！同埋如果個個都唔捐，做手術的人邊有血用呢？你當年做手術都係因為有人去捐血咋！


哈，又俾我過左關，爸爸從此冇再干涉我做呢件事，其實我知佢係因為關心我先咁講，但我覺得佢都真係有咁諗法，因為佢也唔會去捐，不過經此一疫，或者真係覺得個女有自己諗法，都成熟的！哈....自己讚自己，但我真的覺得能過到爸爸呢關，比乜都勁！要知道要爸爸去讓個女去做一件佢唔認同的事係幾咁難的事，但佢做到，我很佩服佢，換轉我未必做到，但我以此為榜樣！







不過後來有幾年因為工作太忙，放工又進修，成日做野做到三更半夜，甚至通頂，第二朝又番工，平均每天得幾個鐘訓，身體極差，有幾次去到滴手指做初步驗血，已經俾工作人員彈番轉頭話唔適合捐，幾唔開心呀！


也試過找埋D朋友仔一起去，好開心架！有時仲有小禮物，好有意外驚喜添，錦上添花也很好呀！





總之，能夠捐血是件福氣！

血是樣很神奇的東西，是有生命氣息的，今日曾在你身體中流動，他日可以在另外一個有需要的人身上繼續流動，讓他的生命得以延續下去，這種傳承，不需要很叻，不需要很聰明，只要你有心，有健康便可以做！

願更多的人願意去作！

願我也能常常繼續做！