兩貓和平共處大作戰(五) ── 埋身戰

想寫呢篇好耐，但最近好忙，唔知忙乜，但每天番工放工食飯沖涼訓覺就好似唔見晒D時間咁！
或者係天氣凍人又懶些吧。



言歸正轉，無謂多廢話。



2隻貓貓同居1個半月左右，由之前大家對對方皆小心奕奕後，最近進入左新階段。

就係已經接受左對方的存在，不嬲最驚的清清都視素素的存在是正常，不過不是很喜歡就是。

有時素素霸左佢中意的野，如爸爸、床、食物盆、沙盆等，佢會FU佢！但同時佢又會用佢的野，如沙盆、食物咁。
總之佢地的野七國咁亂！
有時同一個沙盆會滿晒，另一個冇人去！真係笑死！

但素素唔知係掛住媽媽定幼貓本能，總是找著我們又舔又咬，大概是找媽媽飲奶般。同樣地佢都會咁對清清，但.....可以想像到剛接受到素素存在的清清對呢位過份熱情的小東西的驚恐吧！

於是佢地開始左以下的場面！
抱著一起大打出手！

起初我地都好擔心！但其實佢地又冇真係傷到大家的，只係咬、抓、踢一輪，然後分開，有時會你追我逐，有時索勝攤係地休息。

我地見佢地其實都適可而止，醫生又話其實兩貓好少會打到流血收場，咁便放心下來。

不過佢地有時真係好似好狼死，素素又唔識死，成鬼日撩清清，清清避無可避便會反擊，素素扮走點知轉頭又搞過，我諗清清都好苦惱。

希望呢個只係過渡階段，不竟佢地係進步左的，只少唔怕對方，敢貼近左大家先。