話說浩浩其中一個傳家之寶係佢爸爸俾佢的刀!
數量以家用來說,自覺有點嚇人!可睇番呢度
仲未計影漏左把單人牌的菜刀添,唔知以為我地係孖人fans添。
不過坦白講佢係真係好利好用的,唯一缺點係貴。
但自從之前係宿舍煮野食時,因為把刀唔利而切親手縫左幾針後,我都抱住一個心態,就係「寧願小心地用把鋒利的刀,都唔好用把鈍的刀而死斬」!
搬屋後一直覺得少左把順手的小刀,刨薑、水果皮等,下下用5吋的刀其實都有少少嚇人!
有諗過買陶瓷刀,好似防氧化好好用咁,但最少都3XX,幾貴,而且有人話唔跌得,好易斷,又唔可以磨,所以冇買到。
其實以前用開日本城$10生果刀,都OK好用鋒利的,只是搬屋掉左,唔想買番。( 根本已心思思想買把孖人....藉口多多.....)
最近聽工展會有 $1 水果刀,有衝動去買,但又驚入左去搶唔到白去。 ( 其實應該唔會,不如話驚自己失控好過! )
早兩日係吉之島見到做特價,睇中呢兩SET。
1) 刨皮、3"水果刀、5"麵包刀、細竹砧板,$299
2) 菜刀、水果刀,$199!
不過我地有單人菜刀,差無幾,無謂買相近的野。
同埋唔係佢另一把厚身D的斬骨刀。
而小麵包刀、不鏽鋼的刨皮器我地都冇,加埋小砧板都真係幾抵,於是買左佢回來。
哥哥教用油塗滿砧板,浸一晚清水洗,是為開砧板喎!做完真係好潤澤咁。
************************************
後記:
1) 用左個刀同砧板,砧板暫時好好用,細細個方便,但都會有少少滲水入去,要洗乾淨吹乾,同普通木砧板一樣,但竹感覺上冇滲得咁嚴重,衛生D咁。
2) 把水果刀,3.5",長度好好,細細把,切水果仔、批皮剛剛好,但佢刀身好鬼薄,一分錢一分貨吧,同家中其他孖人原全兩回事,我諗應該唔切得太硬的野。
我之前都買左小砧板/小刀set, 特價 $100..很ok 呀, 細細的我覺得比大的好..
回覆刪除[版主回覆01/13/2011 11:11:00]嘩,我仲以為好平,點知原來你仲平我成1/3添!
唔係同一樣KA...我果套得小砧板/小刀, 無其他大刀, 刨刀...
回覆刪除[版主回覆01/14/2011 08:54:00]咁都抵丫,其實我都係想要水果刀同砧板,不過冇呢SET,咁我冇都OK的,不過都係你套抵好多!
佢把家禽剪都好好用架.
回覆刪除[版主回覆01/14/2011 17:38:00]我有另一把骨剪,如果唔係都好可能買呢!:)