清清大喜訊 ( 兩貓見完醫生後 )

清清的大喜訊！

點解有咁多罐頭的？！你兩個冇病嘛！？
哈哈哈！


源由
*************************
聖誕節其中一件好重要要做的事就係帶兩隻貓貓打預防針、食杜蟲藥。


素素先去，佢兩個月番來第二日就去打左第一針！剛好一個月後打第二針，打足三針後就可以每年打一次，見下醫生當檢查下都係好事！

首先係素素，醫生話佢重左差唔多成倍，好健康，好好！出晒牙仔，但要俾野佢咬，否則擔心佢會咬電線，哦，即幫襯隔壁寵物店買波仔、公仔小玩具。

醫生又教我餵食藥，一技傍身總有用得著之時的。( 其實我識，但聽多次無妨丫 )

護士哥哥仲話虎紋的英短貓貓一定頑皮，叫我地小心！哈！對！佢就係太大膽。

佢坐車車唔驚，可以唔入袋，眼仔碌碌四圍望，俾我地抱住行。

第二日到清清去，醫生話佢比上次肥番，情況好好。( 上年我地擔心佢好似瘦左，但CHECK左冇事，只係腎指數有些高，但唔算係問題。但醫生見佢有好多牙石，幫佢洗左牙，免得將來老時先洗 / 蛀牙 )

DR 話好滿意佢的情況，好開心！

阿清好驚出街的，去到有狗有貓的診所仲驚，抓住浩浩唔放。

同醫生講開食糧，醫生建議我地俾佢食罐頭濕糧！話近十年的研究，好多病都係因為乾糧而造成的，始終係人工野，冇天然食物咁好，對腎臟壓力好多喎。

雖然我都有諗罐頭都應該唔多唔少有防腐劑，但應該都比乾糧好的，好吧！

清清今次見醫生的，最大的喜訊！

佢會轉食濕糧，唔再係久唔久先黎一次的獎賞，係每天！仲可能唔只一罐！
不過過渡期會一半半囉，都要食埋果包新買細的老貓糧先得的。



*******************************
題外話

1) 一直幾欣賞呢間獸醫診所，養過的四隻貓，有幾次有事醫生護士都好盡心去醫佢地，也俾好中肯的意見，等的時候見其他動物有事，佢地都唔會嫌棄，反而教主人點做對動物最好，所以一直睇呢間。最近仲有埋廿四小時添。

2) 另外都問過有些養貓朋友，有人會餵新鮮魚柳等貓貓食，長期我地應該唔得，但久唔久都可以試下，好似好過齋食罐頭吧。