冬日保溫百寶

呢幾日真係凍到傻左，足足凍足兩星期有多，有時有太陽會好少少，但天陰陰同下雨時就簡直想死！

最慘係每天起身時個天仲未光，每天都掙扎起來！
唯有同自己講係為家中兩小口買貓罐頭而努力，會好少少。


神仙極之怕凍，係咁凍的天氣唯有出盡法寶！

法寶一、二、三！

法寶1：
暖爐 ── 其實明知會好乾，但點都要有！每次坐係佢隔離時，都覺得呢樣係買得最好的電器！哈！
我用的牌子唔錯，係 Delonghi，意大利製，當年為左靚同慳位，格盡價都要買個最貴最SLIM款，夏天收埋都好正！STRETTO系列，仲可以掛牆安裝的，不過屋小，都係碌來碌去，隨住我走多。

暖爐呢D幾百蚊貨，我部都係一千多少少，真係唔慳得，夏天都要開冷氣啦，冬天有個暖爐好過好多，尤其有小朋友同老人家的屋企。

http://www.delonghi.com/hk_en/products/trsw1225/

其實之前有暖風機添，但吹住先暖，一離開便唔得，冇點用了。



法寶2：
地毯 ── 有左佢真係好好，我同貓貓們黏住佢睇電視好開心！呢張青綠色 Franc Franc好似坐草地咁，嘻，最近買多左張米白色細的添，$360咋！

http://hk.myblog.yahoo.com/jw!oXKvyiOLBRIedrBAIMHmizRm/article?mid=891


法寶3：
熱飲 ── 一直知凍飲對身體同美容都唔好，但一直戒不了口，但天氣凍乜都戒晒！仲整好多花款俾自己，蔘蜜、綠茶、桂圓紅棗水等等。希望呢個習慣維持到下去便好了！




另外想分享新買的兩個法寶！  <-- 講咁耐，呢個先係重點！

法寶4：

珊瑚絨睡袍 ── 呢個牌子之前有珊瑚絨好多產品，聽人講床單同被都好好，但買左類近的 Casablanca 的被 ( 質地差唔多，色靚D，又大牌子D咁 )，冇買佢，見上年買佢果張羽絨被同被單都唔錯，終於買左佢呢件野！

超好！好暖好舒服、冇靜電，長到小腿，買左兩件，宜家成日有兩隻毛絨絨的大熊係屋企行來行去。





法寶5：

雞仔嘜心膚吸內衣 ── 細過最討厭呢個牌子的羊毛內衣，因為刺肉！但成日俾媽媽逼著！
不過原來佢宜家出左好多其他質地的產品，呢件係纖維，原全唔「吉」，仲係大U領，著係入面都唔怕露出來醜怪！

買左兩件短袖，仲送洗衣袋，可以入機洗的，好方便。

其實有萊卡款添，好軟，但姐姐話呢款會暖D，信佢。
( 我仲睇左Columbia的保暖內衣添，但覺得似厚質料的透氣運動衫款，成3百幾件，冇買到。)

試左幾日，真係暖左的，但又冇以前的天蠶衣咁暖，不過佢好薄身，著左好似冇著咁，唔會緊身焗住咁，我中意！


法寶6：
羽絨 ── 冇得好講！現代比我小時候的年代，冬天衣物最大分別就係羽絨的出現！

睡覺會蓋羽絨被！ ( 早前想買電暖毯，但諗起張羽絨有時會暖到出汗，即刻可慳番！) 出外總有件旁身！


呢件係早前係 uniqlo 買的90%羽絨，因為上年浩浩係 quiksilver 買左件好輕好薄但好暖的90%羽絨，我又想買番件類似的，點知呢件太薄，少少凍就得，最近呢D下下低過10度的便唔夠，不過$499，一分錢一分貨吧。

本來諗住拿番舊果件厚羽絨著，但唔中意佢咁大舊，估唔到有次用佢配以前買落的Columbia的外褸著，超夾喎，輕身唔擁腫。

仲有黑色的仿皮手套，好暖，都係 uniqlo，$79咋。( 以前婆婆有對真皮的，但當然唔係呢D價，同埋手套成日會唔見，買貴會好心痛 )

其實我仲有件羽絨背心仔，唔靚，深藍色好似以前的棉襖仔咁，但好似環保袋咁摺得埋，細細件，好暖，好方便，去露營、旅行通常我都會帶住佢的，之前跟公司係太子羽絨廠批發買，$15x，好抵！


所以最近呢兩個幾星期，日日凍成咁，都係靠呢幾樣法寶渡日！


尤其番工時，公司入面超暖，一件保暖底衫 + 一件長面衫 + 毛毛領巾仔最適中，點郁動都好方便，至少唔會好似D小朋友咁企鵝先。
出去溫差咁大， 著番件薄身羽絨，再加一件防水防風的風褸，同埋手套、長boot！簡直就係風雨無敵！哈哈哈哈！ ( 已經捨棄左大褸好耐，雖然大褸好靚！所以除非襯衫等.... )


回家便坐住地毯開暖爐！飲熱飲糖水暖胃！呵呵！